Mga Bilang 19 - Marahay na Bareta Biblia

An Abo kan Pulang Baka

¹ Pinagbotan nin Kagurangnan si Moises saka si Aaron,

² na itao sa mga Israelita an minasunod na pagsusundon. Magdara kamo nin pulang baka na mayo nin kaninan asin dai pa lamang nasasakalan.

³ Itao nindo an baka ki Eleazar na padi asin darahon iyan sa luwas kan kampo dangan bunoon sa saiyang atubang.

⁴ Makua si Eleazar nin dikit na dugo kan hayop sa paagi kan saiyang muro, dangan pitong beses niyang iwiwirik iyan sa direksyon kan Tabernakulo.

⁵ Tututongon na bilog an baka kaiba an anit, karne, dugo, saka bituka, sa atubang kan padi.

⁶ Dangan makua siya nin kahoy na sedro, sarong sanga nin isopo, asin sarong pulang lubid; an mga iyan itatapok niya sa kalayong pinagtututongan kan baka.

⁷ Pakatapos, lalabahan niya an saiyang mga gubing, mangangarigos siya, asin pwede na siyang maglaog sa kampo; alagad magigin maati siya sagkod magbanggi.

⁸ Kaipuhan labahan man kan lalaking nagtutong kan baka an saiyang mga gubing; magkarigos siya, alagad magigin maati man siya sagkod magbanggi.

⁹ Dangan sarong malinig na lalaki an mapunpon kan abo kan baka asin ibubugtak niya iyan sa sarong malinig na lugar sa luwas kan kampo. Sasarayon an abo para sa komunidad nin Israel tanganing gamiton sa pag-andam kan tubig na panhale kan pagkanimaati. An seremonyang ini ginigibo sa paghale nin kasalan.

¹⁰ Kaipuhan labahan kan lalaking nagpunpon kan abo an saiyang mga gubing, alagad magigin maati siya sagkod magbanggi. An pagsusundon na ini kukuyogon sagkod lamang kan mga Israelita asin kan mga dayuhan na nakikihimanwa sainda.

An Pagduta sa Gadan

¹¹ An magduta sa tawong gadan magigin maati sa laog nin pitong aldaw.

¹² Sa ikatolo asin sa ikapitong aldaw, kaipuhan linigan niya an saiyang sadiri kan tubig na panlinig dangan magigin malinig siya. Alagad kun dai niya linigan an saiyang sadiri sa ikatolo saka sa ikapitong aldaw, dai siya magigin malinig.

¹³ An magduta sa tawong gadan asin dai maglinig kan saiyang sadiri, magdadanay na maati huli ta dai inula saiya an tubig na panlinig. Dinigtaan niya an Tabernakulo nin Kagurangnan, asin dai na siya ibibilang na kaayon sa banwaan nin Dios.

¹⁴ Iyo ini an pagsusundon kun may magadan sa laog nin tolda: an lumaog sa tolda asin an yaon duman magigin maati sa laog nin pitong aldaw.

¹⁵ An gabos na tapayan saka koron na mayo nin takop magigin maati man.

¹⁶ Sa luwas kan tolda, kun may magduta sa tawong ginadan o nagadan sa natural na paagi, o kun may magduta sa tolang nin sarong tawo o sa sarong lulubngan, magigin maati sa laog nin pitong aldaw.

¹⁷ Tanganing mahale an pagkanimaati, makua sinda nin dikit na abo kan tinutong na dolot para sa kasalan, ibubugtak ninda iyan sa sarong koron dangan sasalakan nin preskong tubig.

¹⁸ Sa enot na kaso, an sarong malinig na tawo iyo an makua nin sanga nin isopo, ibubuntog niya iyan duman sa tubig, asin wiwirikan niya an tolda, an mga kagamitan sagkod an mga tawong yaon duman. Sa ikaduwang kaso, wiwirikan nin sarong malinig na tawo an nagduta sa tolang nin tawo, sa bangkay o sa lulubngan.

¹⁹ Sa ikatolo asin sa ikapitong aldaw, wiwirikan niya an maating tawo. Sa ikapitong aldaw, lilinigan niya an tawo, na pakalaba kaini kan mga gubing asin pakakarigos, magigin malinig pagsolnop kan aldaw.

²⁰ Alagad an tawong nagin maati asin dai maglinig kan saiyang sadiri magdadanay na maati huli ta dai inula saiya an tubig na panlinig. Dinigtaan niya an Tabernakulo nin Kagurangnan asin dai na siya ibibilang na kaayon sa banwaan nin Dios.

²¹ An pagsusundon na ini kukuyogon nindo sagkod lamang. An nagwirik kan tubig na panlinig kaipuhan maglaba man kan saiyang mga gubing; an makaduta kan tubig magigin maati sagkod magbanggi.

²² Magigin maati an anoman na kinapotan kan maating tawo asin an siisay man na kumapot kaiyan magigin maati sagkod pagkabanggi.