Mga Bilang 17 - Marahay na Bareta Biblia

An Sugkod ni Aaron

¹ Tinaraman nin Kagurangnan si Moises,

² “Sabihan mo an mga Israelita na tawan ka nin doseng sugkod, saro hale sa lider kan lambang tribu. Isurat mo an ngaran kan lambang lider sa saiyang sugkod

³ dangan isurat mo an ngaran ni Aaron sa sugkod kan tribu ni Levi. An lambang lider kan tribu magkakaigwa nin sarong sugkod.

⁴ Darahon mo sa Tabernakulo an mga sugkod asin ibugtak mo sa atubangan kan Kaban nin Tipan, sa lugar na pinagtutuparan ko saimo.

⁵ Matubo an sugkod kan tawong pipilion ko. Sa paaging iyan, papaontokon ko an mga pagreklamo saimo kan mga Israelitang ini.”

⁶ Kaya sinabihan ni Moises an mga Israelita, dangan an lambang lider ninda nagtao saiya nin sarong sugkod, saro para sa lambang tribu, doseng sugkod gabos kaiba na an sugkod ni Aaron.

⁷ Ibinugtak ni Moises an mga sugkod sa atubangan kan Kaban nin Tipan sa laog kan Tabernakulo.

⁸ Sunod na aldaw, kan maglaog sa tabernakulo si Moises, nahiling niya na nagtubo an sugkod ni Aaron, an sugkod na para sa tribu ni Levi. Nagdahon ini, namurak asin namunga nin hinog na mga almendras.

⁹ Kinua ni Moises an mga sugkod dangan ipinahiling sa mga Israelita. Nahiling ninda an nangyari, asin kinua kan lambang lider an saiyang sugkod.

¹⁰ Tinaraman nin Kagurangnan si Moises, “Ibugtak mo giraray an sugkod ni Aaron sa atubangan kan Kaban nin Tipan, tanganing sarayon bilang sarong patanid sa mga rebeldeng Israelita na magagadan sinda sagkod na dai sinda mag-ontok sa pagreklamo.”

¹¹ Ginibo ini ni Moises sosog sa pagboot nin Kagurangnan.

¹² Nagsabi ki Moises an banwaan nin Israel, “Iyo ini an kataposan nyamo!

¹³ Kun an siisay man na magrani sa Tabernakulo kaipuhan na magadan, garo na man sana kami gadan gabos!”