Mga Bilang 15 - Marahay na Bareta Biblia

Mga Togon Manongod sa Sakripisyo

¹ Itinao nin Kagurangnan ki Moises,

² an minasunod na pagsusundon para sa mga Israelita sa daga na itatao niya sainda.

³ Pwede sindang magdolot sa Kagurangnan nin sarong torong baka o sarong lalaking karnero o sarong kordero o sarong kanding bilang tinutong na atang, o dolot sa pag-otob nin sarong panuga, o boluntad na dolot, o dolot kun panahon nin pyesta; an parong kan mga dolot na pagkakan na ini nakakawili sa Kagurangnan.

^4-5 An siisay man na magdara nin sarong kordero o sarong kanding bilang sarong tinutong na atang sa Kagurangnan, madara man nin sarong kilong arina na sinalakan nin sarong litrong lana nin oliba bilang dolot na pagkakan, asin sarong litrong arak.

⁶ Kun sarong lalaking karnero an idodolot, iibahan iyan nin duwang kilong arina na sinalakan nin saro may kabangang litrong lana nin oliba bilang dolot na pagkakan,

⁷ asin saro may kabangang litrong arak. An parong kan mga sakripisyong ini nakakawili sa Kagurangnan.

⁸ Kun idodolot sa Kagurangnan an sarong torong baka bilang sarong tinutong na atang, o dolot sa pag-otob nin sarong panuga, o dolot para sa katoninongan,

⁹ iibahan iyan nin tolong kilong arina na sinalakan nin duwang litrong lana nin oliba bilang dolot na pagkakan

¹⁰ kaiba an duwang litrong arak. An parong kan sakripisyong ini nakakawili sa Kagurangnan.

¹¹ Iyan an idodolot nindo kaiba kan lambang torong baka, lalaking karnero, lalaking kordero, o kanding.

¹² An dadarahon nindong pagkakan asin arak kaipuhan sosog sa bilang kan idinolot na hayop.

¹³ Gigibohon iyan nin lambang Israelita kun siya madolot nin dolot na pagkakan, na an parong nakakawili sa Kagurangnan.

¹⁴ Siring man, kun sarong dayuhan na nakikihimanwa saindo o permanenteng nag-eerok sa kaibahan nindo an boot magdolot nin dolot na pagkakan na an parong nakakawili sa Kagurangnan, gigibohon man niya an ginigibo nindo.

¹⁵ Sagkod lamang, saro sana an pagsusundon nindo asin kan mga dayuhan na nag-eerok sa kaibahan nindo. Sa atubangan nin Kagurangnan, kamo saka an mga dayuhan pareho sana;

¹⁶ magkakaigwa nin saro sanang togon asin saro sanang pagsusundon para saindo saka para sa dayuhan na nag-eerok sa kaibahan nindo.

¹⁷ Itinao nin Kagurangnan ki Moises,

¹⁸ an minasunod na pagsusundon para sa mga Israelita sa daga na itatao niya sainda.

¹⁹ Kun magkakan kamo kan pagkakan na gikan sa dagang idto, maglaen kamo nin pagkakan bilang dolot sa Kagurangnan.

²⁰ Kun magluto kamo nin tinapay, idodolot nindo sa Kagurangnan an enot na pedaso kan enot na tinapay na ginibo hale sa bagong aning trigo. Idodolot nindo iyan siring kan pagdolot nindo kan espesyal na regalo na kinukua nindo hale sa gininik na trigo.

²¹ Sagkod lamang, an espesyal na regalong iyan itatao nindo sa Kagurangnan hale sa tinapay na linuto nindo.

²² Halimbawa dai tuyong linapas kan sarong tawo an nagkapira sa mga pagboot na ini na itinao nin Kagurangnan ki Moises,

²³ asin halimbawa sa maabot na panahon dai kinuyog kan komunidad an gabos na pagboot nin Kagurangnan sa paagi ni Moises;

²⁴ kun an naginibong sala dai tinutuyo huli ta dai nin pakaisi an komunidad, an bilog na komunidad madolot nin sarong torilyong baka bilang sarong tinutong na atang na an parong nakakawili sa Kagurangnan, kaiba an maninigong dolot na pagkakan saka dolot na arak. Laen pa kaini, an komunidad madolot nin sarong lalaking kanding bilang dolot para sa kasalan.

²⁵ Gigibohon kan padi an seremonya nin paglinig para sa komunidad, dangan papatawadon sinda, huli ta an kasalan na naginibo ninda dai tinuyo, asin nagdara sinda nin dolot para sa kasalan bilang dolot na pagkakan sa Kagurangnan.

²⁶ Papatawadon an bilog na komunidad nin Israel asin an mga dayuhan na nag-eerok sa kaibahan ninda, huli ta an lambang saro sainda kadamay sa kasalan.

²⁷ Kun an sarong tawo dai tuyong magkasala, madolot siya nin sarong babaeng kanding na sangtaon an edad bilang dolot para sa kasalan.

²⁸ Sa atubangan nin Kagurangnan, gigibohon kan padi an seremonya nin paglinig tanganing linigan an tawo kan saiyang kasalan dangan papatawadon siya.

²⁹ Igwa nin parehong pagsusundon para sa dai tuyong nagkasala, Israelita man o nakikihimanwa na dayuhan.

³⁰ Alagad gagadanon an tawong tuyong nagkasala, Israelita man o dayuhan, huli ta dai niya ginalangan an Kagurangnan.

³¹ Isinikwal niya an tataramon nin Kagurangnan asin tuyo niyang linapas an saro kan mga pagboot nin Kagurangnan. Siya an babasolon kan saiyang kagadanan.

An Tawong Naglapas kan Sabbath

³² Kan nasa kalangtadan pa an mga Israelita, nahiling an sarong lalaki na nangangahoy sa aldaw nin Sabbath.

³³ Dinara siya ki Moises, ki Aaron asin sa bilog na komunidad.

³⁴ Pinabantayan ngona ninda siya, huli ta bako pang malinaw kun ano an gigibohon saiya.

³⁵ Dangan tinaraman nin Kagurangnan si Moises, “Kaipuhan gadanon an lalaki; gagapoon siya sagkod na magadan kan bilog na komunidad sa luwas kan kampo.”

³⁶ Kaya dinara siya kan bilog na komunidad sa luwas kan kampo asin ginapo sagkod na nagadan, siring sa pagboot nin Kagurangnan ki Moises.

Mga Pagsusundon Manongod sa mga Kordon

³⁷ Pinagbotan nin Kagurangnan si Moises na sabihan an mga Israelita kan mga tataramon na ini;

³⁸ Bugtakan nindo nin mga kordon an kanto kan saindong mga gubing asin bugtakan man nindo nin sarong asul na lubid an lambang kordon. Gigibohon nindo ini sa gabos nindong henerasyon.

³⁹ An mga kordon magigin mga pagiromdom, kaya sa panahon na mahiling nindo iyan, magigiromdoman nindo an gabos kong pagboot asin makuyog kamo kaiyan; dangan dai na kamo matalikod sako patin dai na kamo magibo kan gabos nindong magustohan.

⁴⁰ An mga kordon iyo an magpapagiromdom saindo sa pagkuyog kan gabos kong pagboot, asin magigin banal kamo para sa saindong Dios.

⁴¹ Ako an Kagurangnan na saindong Dios; ilinuwas ko kamo sa Egipto tanganing magin saindong Dios. Ako an Kagurangnan.”