Mga Bilang 13 - Marahay na Bareta Biblia

An Mga Espiya

¹ Nagtaram an Kagurangnan ki Moises,

² “Pumili ka nin sarong lider sa lambang tribu asin ipadara mo sinda bilang mga espiya tanganing magsiyasat sa daga nin Canaan, an dagang itatao ko sa banwaan nin Israel.”

^3-15 Nagkuyog si Moises asin hale sa kalangtadan nin Paran nagpadara siya nin mga lider. Iyo ini an mga ngaran ninda: Tribu Pamayo Ruben si Sammua na aking lalaki ni Zaccur Simeon si Safat na aking lalaki ni Hori Juda si Caleb na aking lalaki ni Jefunne Issakar si Igal na aking lalaki ni Jose Efraim si Oseas na aking lalaki ni Nun Benjamin si Palti na aking lalaki ni Rafu Zabulon si Gaddiel na aking lalaki ni Sodi Manases si Gaddi na aking lalaki ni Susi Dan si Ammiel na aking lalaki ni Gemalli Aser si Setur na aking lalaki ni Miguel Neftali si Nabi na aking lalaki ni Vofsi Gad si Geuel na aking lalaki ni Maki

Tribu Pamayo

¹⁶ Sinda an mga espiya na ipinadara ni Moises tanganing magsiyasat kan daga. An ngaran ni Oseas na aki ni Nun rinibayan niya nin Josue.

¹⁷ Kan palakawon na sinda ni Moises, nagsabi siya, “Hale digdi magduman kamo sa amihan pasiring sa habagat na parte kan daga nin Canaan asin magpadagos kamo sa mabulod na daga.

¹⁸ Hilingon nindo kun ano an kamugtakan kan daga. Aramon nindo kun makokosog o maluluya an nag-eerok duman, asin kun dakul o dikit sinda.

¹⁹ Hilingon nindo kun marahay o bako an daga na saindang pinag-eerokan asin kun nag-eerok sinda sa mga banwa na mayong kudal o sa mga syudad na nakukudalan.

²⁰ Hilingon nindo kun matubang o bako an daga; kun makahoy o bako. Pagmaisog kamo asin pagbalik nindo, magdara kamo nin nagkapirang prutas.” (Panahon kaidto nin paghinog kan ubas.)

²¹ Kaya nagpasiring sa amihan an mga espiya asin siniyasat ninda an daga magpoon sa kalangtadan nin Zin sa parteng habagat sagkod sa Rehob, harani sa Dalan nin Hamat sa amihan.

²² Nagduman ngona sinda sa habagat na parte kan daga nin Canaan dangan sa Hebron, saen nag-eerok an mga kamaganakan ni Ahiman, ni Sesai asin ni Talmai, an kapagarakian kan sarong rasa nin mga higante na inaapod Anakim. (Pinatindog an Hebron mga pitong taon bago mapatindog an Zoan sa Egipto.)

²³ Nakaabot sinda sa Kapantayan nin Escol, asin nagputol sinda duman nin sarong sanga nin ubas na igwa nin sarong pungot na huli sa kagabatan kaipuhan pagbuligan nin duwang tawo. Nagkua man sinda nin bunga kan granada asin higera. (

²⁴ An lugar na idto nginaranan Kapantayan nin Escol huli kan sarong pungot nin ubas na pinutol duman kan mga Israelita.)

²⁵ Pakasiyasat ninda kan daga sa laog nin kwarentang aldaw nagbalik sinda

²⁶ ki Moises, ki Aaron asin sa bilog na komunidad nin Israel duman sa Kades sa kalangtadan nin Paran. Inosip ninda an saindang nahiling dangan ipinahiling ninda an mga dara nindang prutas.

²⁷ Nagsabi sinda ki Moises, “Siniyasat mi an daga asin nahiling ming matubang idto; uya an mga prutas na kinua mi duman.

²⁸ Alagad mapangyari an mga nag-eerok duman. Darakula an saindang mga syudad sagkod matitibay an mga kudal. Laen pa kaiyan nahiling mi man an kapagarakian kan mga higante.

²⁹ An mga Amalekita nag-eerok sa habagat na parte kan daga nin Canaan; an mga Heteo, Jebuseo, asin Amoreo nag-eerok sa mabulod na daga, asin an mga Cananeo nag-eerok sa baybayon kan Dagat nin Mediteraneo dangan sa pangpang kan Salog nin Jordan.”

³⁰ Pinakaalo ni Caleb an mga tawo na nakapalibot ki Moises dangan nagsabi, “Salakayon na nyato ngunyan asin sakopon an daga; kaya tang sakopon idto.”

³¹ Alagad nagsabi an mga lalaking kaibahan ni Caleb, “Dai ta pwedeng salakayon an mga tawong idto; mas makosog sinda ki sa sato.”

³² Kaya pinalakop ninda sa mga Israelita an salang bareta manongod sa dagang siniyasat ninda. Olay ninda, “Hinahalon kan dagang siniyasat mi an mga nag-eerok duman. Haralangkaw an gabos na tawo na nahiling mi.

³³ Dangan nakahiling pa kami duman nin mga higante, an kapagarakian ni Anak. Sa paghiling mi, garo sana kami mga doron, asin arog man siguro kaiyan an paghona ninda samo.”