Mga Bilang 10 - Marahay na Bareta Biblia

An Mga Platang Trompeta

¹ Nagtaram an Kagurangnan ki Moises,

² “Gumibo ka nin duwang trompeta sa pinulpog na plata, na gagamiton mo sa pag-apod kan mga tawo tanganing magtiripon asin tanganing magpadagos sa pagbaklay.

³ Kun sabay na patanogon an duwa, matiripon an bilog na komunidad sa may pintoan kan Tabernakulo.

⁴ Alagad kun saro sana an pinatanog, an mga pamayo sana kan mga kamaganakan an maatubang saimo.

⁵ Kun patanogon an trompeta bilang alarma, malakaw an mga tribung nakakampo sa sirangan.

⁶ Kun patanogon iyan nin ikaduwang beses, malakaw an mga tribung nakakampo sa habagat, kaya papatanogon an trompeta bilang alarma kun mapadagos sa pagbaklay,

⁷ alagad kun aapodon an bilog na komunidad, papatanogon nin sabay an duwang trompeta.

⁸ An mga trompeta papatanogon kan mga pading aki ni Aaron. “An minasunod na pagsusundon kaipuhan otobon sa gabos na panahon.

⁹ Kun kamo makigera sa mga kaiwal na nagsalakay saindo sa sadiri nindong daga, patanogon nindo an mga trompeta bilang alarma, tanganing ako, an Kagurangnan na saindong Dios, an matabang saindo asin maligtas sa saindo.

¹⁰ Siring man sa aldaw nin kaogmahan, sa itinalaan na mga pyesta asin sa enot na aldaw kan lambang bulan, papatanogon nindo an mga trompeta kun idodolot na nindo an saindong mga tinutong na atang asin an saindong dolot para sa katoninongan. Dangan tatabangan ko kamo. Ako an Kagurangnan na saindong Dios.”

Naghale sa Sinai an mga Israelita

¹¹ Kan ikabeynteng aldaw kan ikaduwang bulan sa ikaduwang taon, magpoon kan maghale sinda sa Egipto, uminitaas hale sa ibabaw kan Tabernakulo an panganoron.

¹² Kaya naghale sa Sinai an mga Israelita asin nagpadagos sa pagbaklay. An panganoron nag-ontok sa kalangtadan nin Paran.

¹³ Nagpoon sindang magbaklay sosog sa pagboot nin Kagurangnan ki Moises,

¹⁴ asin sa lambang pagbaklay ninda, an nangengenot iyo an nasa irarom kan bandera kan dibisyon na pinapamayohan kan tribu ni Juda na an lider iyo si Nason na aki ni Amminadab.

¹⁵ An lider kan tribu ni Issakar iyo si Netanel na aki ni Zuar,

¹⁶ asin an lider kan tribu ni Zabulon iyo si Eliab na aki ni Helon.

¹⁷ Masunod an mga kamaganakan ni Gerson asin ni Merari na mga paradara kan Tabernakulo, pakatangkas kaiyan.

¹⁸ An masunod iyo an mga nasa irarom kan bandera kan dibisyon na pinamamayohan kan tribu ni Ruben na an lider iyo si Elizur na aki ni Sedeur.

¹⁹ An lider kan tribu ni Simeon iyo si Selumiel na aki ni Zurisaddai,

²⁰ asin an lider kan tribu ni Gad iyo si Eliasaf na aki ni Deuel.

²¹ Masunod an mga Levitang kamaganakan ni Kohat na dara an mga sagradong bagay. Pag-abot ninda sa bagong kampo, napatindog na an Tabernakulo.

²² Masunod an nasa irarom kan bandera kan dibisyon na pinamamayohan kan tribu ni Efraim na an lider iyo si Elisama na aki ni Ammihud.

²³ An lider kan tribu ni Manases iyo si Gamaliel na aki ni Pedazur,

²⁴ asin an lider kan tribu ni Benjamin iyo si Abidan na aki ni Gideoni.

²⁵ An nasa irarom kan bandera kan dibisyon na pinamamayohan kan tribu ni Dan, na iyo an nasa hurihan asin iyo an panlikod na bantay kan gabos na dibisyon, iyo an huring malakaw, sa pamamayo ni Ahiezer na aki ni Ammisaddai.

²⁶ An lider kan tribu ni Aser iyo si Pagiel na aki ni Okran,

²⁷ asin an lider kan tribu ni Neftali iyo si Ahira na aki ni Enan.

²⁸ Iyo ini an orden kan banwaan nin Israel kun sinda nagpapadagos sa pagbaklay.

²⁹ Sinabihan ni Moises an saiyang bayaw na si Hobab na aki kan panugangan niyang si Jetro na Midianita, “Maduman na kami sa lugar na ipinanugang itatao samo nin Kagurangnan. Nanuga siya na tatawan nin mauswag na pamumuhay an Israel kaya umiba ka samo asin hihirasan mi ika kan biyayang samong makakamtan.”

³⁰ Nagsimbag si Hobab, “Dai ako maiba saindo; mapuli ako sa sadiri kong banwaan.”

³¹ Nagsabi si Moises, “Nakikimaherak ako na dai mo kami pagbayaan. Aram mo kun saen kami pwedeng magkampo duman sa kalangtadan, asin pwede mo kaming giyahan.

³² Kun ibahan mo kami, hihirasan mi ika kan gabos na biyayang itatao samo nin Kagurangnan.”

Nagbaklay an mga Tawo

³³ Pakahale kan mga Israelita sa Sinai, an banal na bukid, tolong aldaw sindang naglakaw. Naenot sainda an Kaban nin Tipan nin Kagurangnan tanganing maghanap nin lugar na saindang mapapahingaloan.

³⁴ Kun aldaw, linilindongan sinda kan panganoron nin Kagurangnan mantang sinda nagbabaklay.

³⁵ Kun ilalakaw na an Kaban nin Tipan minasabi si Moises, “Pagtindog, O Kagurangnan; magkawararak logod an saimong mga kaiwal asin magdurulag an mga anggot saimo!”

³⁶ Kun minaontok na an Kaban nin Tipan, minasabi si Moises, “Pagbalik, O Kagurangnan, sa ribo-ribong pamilya nin Israel.”