Malakias 3 - Marahay na Bareta Biblia

¹ Nagsisimbag an Kagurangnan nin mga hukbo, “Ipapadara ko an sakong sugo sa pag-andam kan dalan para sako. Dangan an Kagurangnan na saindong hinahanap bigla na sanang matunga sa saiyang Templo. Maabot an sugo na haloy na nindong mawot na mahiling asin ipapahayag niya an sakong tipan.”

² Alagad siisay an makakatagal kun mag-abot na an aldaw na iyan? Siisay an mabubuhay kun magpahiling na siya? Huli ta makakaagid siya sa makosog na sabon, arog sa kalayo na naglilinig sa metal.

³ Maabot siya sa paghukom siring sa sarong naglilinig asin nagpapagayon nin plata. Siring na linilinigan nin sarong alahero an plata saka bulawan, lilinigan man kan sugo nin Kagurangnan an mga padi, tanganing magdara sinda sa saiya kan tamang mga dolot.

⁴ Dangan magigin makawiwili an mga dolot na dara kan mga taga Juda saka Jerusalem sa Kagurangnan, arog kaidtong nakaaging panahon.

⁵ Nagsasabi an Kagurangnan nin mga hukbo, “Madatong ako sa tahaw nindo sa paghukom, asin ako an masaksi laban sa mga parakulam, sa parasambay, sa mga nagsasaksi nin putik, sa mga nagdadaya kan bayad kan mga parapatandan, asin sa mga nang-aapi sa mga babaeng balo, mga ilo, asin mga dayuhan—sa gabos na dai minagalang sako.

An Pagbayad nin Himoloan

⁶ “Ako an Kagurangnan, asin dai ako nagliliwat. Kaya kamo, an mga kapagarakian ni Jacob, dai pa napupuho.

⁷ Kamo, siring kan saindong mga ginikanan na naenot saindo, nagtalikod sa sakong mga togon asin dai nindo iyan inotob. Magbalik kamo sako, asin mabalik man ako saindo. Alagad minahapot kamo, ‘Ano an kaipuhan ming gibohon tanganing makabalik sa saimo?’

⁸ Hahapoton ko kamo. Tama daw na dayaon nin sarong tawo an Dios? Bako, alagad dinadaya nindo ako. ‘Sa paanong paagi?’ an hapot nindo. Sa paagi kan saindong mga himoloan saka mga dolot.

⁹ Yaon sa saindo gabos an sarong maldisyon huli ta dinadaya ako kan bilog na nasyon.

¹⁰ Daraha nindo an bilog na halaga kan saindong mga himoloan sa Templo, tanganing magkaigwa nin dakul na pagkakan duman. Baloa nindo ako asin mahihiling nindo na bubukasan ko an mga bintana nin kalangitan dangan iuula ko sa saindo an nagsusupay na mga marahay na bagay.

¹¹ Dai ko itutugot na raoton kan mga insekto an saindong mga oma; mamumunga nin dakul an saindong mga balagon nin ubas.

¹² Dangan aapodon kamong paladan kan mga tawo sa gabos na nasyon, huli ta magigin sarong marahay na lugar na erokan an saindong daga.

An Panugang Pagkaherak nin Dios

¹³ “Maraot na mga tataramon an sinabi nindo tumang sako,” an sabi nin Kagurangnan. “Alagad minahapot kamo, ‘Ano an itinaram ming tumang saimo?’

¹⁴ Nagsabi kamong, ‘Mayong pakinabang an paglingkod sa Dios. Ano an halaga kan pagsunod sa sinasabi niya o an pagpahiling sa Kagurangnan nin mga hukbo na kita nagmomondo huli kan ginibo ta?

¹⁵ Sosog sa samong nahihiling, an mapalangkaw iyo an mga paladan. Bako sanang nag-uuswag an mga maraot na tawo kundi binabalo pa ninda an Dios sa paggibo ninda kan mga maraot asin dai sinda napapadusahan.’”

¹⁶ Dangan nag-orolay an mga tawong natatakot sa Kagurangnan, asin hininanyog sinda nin marahay kan Kagurangnan. An saindang mga sinabi dinangog niya man. Sa atubangan niya, isinurat sa sarong libro an ngaran kan mga natatakot sa Kagurangnan asin minagalang saiya.

¹⁷ “Sinda an sakong magigin banwaan,” an sabi kan Kagurangnan nin mga hukbo. “Sa aldaw na humiro ako, masasadirihan ko sinda. Maheherak ako sainda siring na an sarong ama naheherak sa saiyang aking lalaki na naglilingkod saiya.

¹⁸ Mahihiling giraray kan sakong banwaan an kalaenan kan nangyayari sa mga matanos asin sa mga tampalasan, sa tawong naglilingkod sa sako saka sa dai.”