Malakias 1 - Marahay na Bareta Biblia

¹ Iyo ini an mensaheng itinao nin Kagurangnan ki Malakias tanganing isabi sa banwaan nin Israel.

An Pagkamoot nin Kagurangnan sa Israel

² An Kagurangnan nagtataram sa saiyang banwaan, “Danay takang namotan.” Alagad minasimbag sinda, “Paano mo ipinahiling an saimong pagkamoot samo?” Minasimbag an Kagurangnan, “Magtugang si Esau asin si Jacob, alagad orog kong namotan si Jacob dangan an saiyang kapagarakian.

³ Ikinaongis ko si Esau saka an saiyang kapagarakian. Rinaot ko an mabulod na daga ni Esau asin pinabayaan ko sa mga lalaw na ayam.”

⁴ Kun magsabi an mga Edomita, an kapagarakian ni Esau, “Rinaot an samong mga banwa, alagad papatindogon mi giraray an mga iyan,” masimbag an Kagurangnan, “Pwede nindang patindogon an mga iyan alagad gagarabaon ko giraray iyan sagkod na apodon sinda kan mga tawo nin ‘An maraot na daga’ asin ‘An Nasyon na naanggotan nin Kagurangnan sagkod lamang.’”

⁵ Mahihiling iyan mismo kan mga Israelita, asin masabi sinda, “Mapangyari an Kagurangnan maski sa luwas kan daga nin Israel!”

Tinuyaw nin Kagurangnan an mga Padi

⁶ Nagsasabi an Kagurangnan nin mga hukbo sa mga padi, “Ginagalangan kan aking lalaki an saiyang ama, asin kan sorogoon an saiyang kagurangnan. Ako an saindong ama—tadaw ta dai nindo ako ginagalangan? Ako an saindong kagurangnan—tano ta dai nindo ako ginagalangan? Binabasang-basang nindo ako, asin minahapot pa kamo, ‘Paano mi ika binasang-basang?’

⁷ Binasang-basang nindo ako huli sa pagdolot nindo nin mga mayong halagang pagkakan sa sakong altar. Dangan minahapot kamo, ‘Sa paanong paagi kami dai nagtaong galang sa saimo?’ Sasabihan ko kamo—huli ta dai nindo iginalang an sakong altar.

⁸ Kun minadara kamo nin buta o may helang o pilay na hayop tanganing isakripisyo sa sako, sa paghona nindo bakong sala an gibong iyan? Dolotan daw an siring na hayop sa saindong gobernador; mawiwilihan daw niya kamo o papahilingan nin marahay na boot?”

⁹ Ngunyan, kamong mga padi, makimaherak kamo sa Dios tanganing magin marahay siya sato. Dai niya sisimbagon an saindong pamibi, asin kamo an may sala.

¹⁰ Nagsasabi an Kagurangnan nin mga hukbo, “Mawot kong saro sa saindo an magsera kan pintoan kan Templo tanganing dai na kamo mag-amak kan mga mayo nin halagang kalayo sa sakong altar. Dai ko kamo nawiwilihan; dai ko aakoon an mga dolot na dara nindo sako.

¹¹ Inoomaw ako kan katawohan magpoon sa sarong poro kan kinaban sagkod sa ibong na poro kaiyan. Nagtututong sinda nin insenso sa sako saen man na lugar asin nagdodolot sinda nin maninigong mga sakripisyo. Gabos sinda nag-oomaw sako!

¹² Alagad dai nindo ako inoomaw kun minasabi kamo na mayong halaga an sakong altar asin kun minadolot kamo diyan nin kakanon na bakong maninigo.

¹³ Minasabi kamo, ‘Pagal na kami sa paggibo kan gabos na ini!’ dangan tinatami-tamian nindo ako. Bilang dolot dinadarahan nindo ako nin hinabonan na hayop o sarong hayop na pilay o may helang. Sa paghona nindo, aakoon ko daw saindo an siring na dolot?

¹⁴ Humugpa logod an maldisyon sa paradaya na nagsasakripisyo sa sako nin mayong halagang hayop, mantang igwa man sana siya nin mga marahay na hayop na saiyang itinugang itatao sako! Dakula akong hade, asin kinakatakotan ako kan mga tawo sa gabos na nasyon.”