Levitico 4 - Marahay na Bareta Biblia

Mga Dolot Para sa Dai Tuyong Pagkasala

¹ Nagtaram an Kagurangnan ki Moises,

² na sabihan an banwaan nin Israel na kun an saro sainda magkasala asin maglapas kan arin man sa ipinagboboot nin Kagurangnan na dai man tinutuyo, kaipuhan otobon niya ining mga pagboot.

³ Kun an magkasala iyo an Halangkaw na Padi, asin huli kaiyan nadamay sa pagkakasala an mga tawo, madara siya nin torilyong baka na mayo nin kaninan asin iaatang niya iyan sa Kagurangnan para sa saiyang kasalan.

⁴ Dadarahon niya an baka sa pintoan kan Tabernakulo asin iduduta niya an saiyang kamot sa payo kan hayop dangan bubunoon niya iyan duman sa atubang nin Kagurangnan.

⁵ Pakatapos, an Halangkaw na Padi makua nin dugo kan hayop asin dadarahon niya iyan sa laog kan Tabernakulo.

⁶ Idodotdot niya an saiyang muro sa dugo dangan wiwirikan niya nin pitong beses an panlipod na kurtina kan santwaryo.

⁷ Dangan lalahidan niya nin dugo an mga sungay kan altar nin insenso na yaon sa Tabernakulo. Pakatapos, iuula niya an natatadang dugo sa pamitisan kan altar na tinututongan kan mga atang na yaon sa may pintoan kan Tabernakulo.

⁸ Hale sa torilyong bakang ini, kukuahon niya an gabos na taba, an taba na nakakatahob kan bituka,

⁹ an duwang bato kaiba an taba kaiyan, asin an pinakamarahay na kabtang kan katoy.

¹⁰ Dangan dadarahon niya an tabang iyan duman sa altar na tinututongan kan mga dolot asin tututongon niya iyan duman siring kan ginigibo niya sa taba kan hayop na binubuno bilang atang para sa katoninongan.

¹¹ Alagad kukuahon niya an anit kan hayop kaiba an gabos na laman, an payo, an mga bitis asin an mga bituka sagkod an gabos na nasa laog kan hawak kan hayop dangan

¹² dadarahon niya iyan gabos sa luwas kan kampo, sa sarong malinig na lugar na pinag-uulaan kan abo, asin duman niya iyan tututongon sa ibabaw kan nagkakalayong kahoy.

¹³ Kun an magkasala na dai man tinutuyo iyo an bilog na komunidad nin Israel huli sa paglapas kan arin man sa mga pagboot nin Kagurangnan,

¹⁴ sa oras na maaraman iyan, an komunidad madara nin torilyong baka sa Tabernakulo bilang sarong dolot para sa saindang kasalan.

¹⁵ Iduduta kan mga lider kan komunidad an saindang mga kamot sa ibabaw kan payo kan hayop asin bubunoon ninda iyan sa atubang nin Kagurangnan.

¹⁶ Makua nin dugo an Halangkaw na Padi asin dadarahon niya iyan sa laog kan Tabernakulo;

¹⁷ idodotdot niya an saiyang muro sa dugo asin wiwirikan niya nin pitong beses an panlipod na kurtina kan santwaryo.

¹⁸ Dangan lalahidan niya nin dugo an mga sungay kan altar nin insenso na yaon sa laog kan Tabernakulo asin iuula niya an matatada kan dugo duman sa pamitisan kan altar na tinututongan kan mga atang na yaon sa pintoan kan Tabernakulo.

¹⁹ Pakatapos, kukuahon niya an gabos na taba dangan tututongon niya iyan sa altar.

²⁰ Iyo iyan an gigibohon niya sa hayop, arog kan ginigibo niya sa hayop na idinolot para sa kasalan; sa paaging iyan, idodolot kan padi an atang para sa kasalan kan mga tawo asin papatawadon sinda.

²¹ Dangan dadarahon niya an hayop sa luwas kan kampo asin tututongon niya duman, siring kan ginibo niya sa hayop na idinolot para sa kasalan. Iyo iyan an dolot na mahale kan kasalan kan mga tawo.

²² Kun an magkasala iyo an pamayo kan banwaan, alagad dai man tinutuyo na makaginibo siya nin paglapas kan arin man sa mga pagboot nin Kagurangnan na saiyang Dios,

²³ sa oras na maaraman niya an kasalan niya, madara siya nin lalaking kanding na mayo nin kaninan bilang saiyang dolot.

²⁴ Iduduta niya an saiyang kamot sa payo kan hayop asin bubunoon niya iyan duman sa amihan na parte kan altar saen binubuno an mga hayop na iaatang. Iyan an dolot na mahale kan kasalan.

²⁵ Idodotdot kan padi an saiyang muro sa dugo kan kanding asin lalahidan niya an mga sungay kan altar, dangan iuula niya an matatadang dugo sa pamitisan kan altar.

²⁶ Pakatapos, susuloon niya sa altar an gabos na taba arog kan ginigibo niyang pagsulo kan taba kan mga hayop na binubuno para sa dolot para sa katoninongan. Sa paaging ini, idodolot kan padi an atang para sa pamayo kan banwaan asin papatawadon siya.

²⁷ Kun sarong ordinaryong tawo an dai tinutuyong magkasala huli sa paglapas kan arin man sa mga pagboot nin Kagurangnan,

²⁸ sa oras na maaraman niya an saiyang kasalan, madara siya nin sarong babaeng kanding na mayo nin kaninan.

²⁹ Iduduta niya an saiyang kamot sa payo kan kanding asin bubunoon niya ini duman sa amihan na parte kan altar saen binubuno an mga hayop na tinututong.

³⁰ Idodotdot kan padi an saiyang muro sa dugo kan hayop dangan lalahidan niya an mga sungay kan altar. Pakatapos, iuula niya an matatadang dugo sa pamitisan kan altar.

³¹ Dangan hahaleon niya an gabos na taba, siring kan paghale niya sa taba kan mga hayop na binubuno bilang atang para sa katoninongan, asin tututongon niya iyan sa altar. An parong kaiyan nawiwilihan nin Kagurangnan. Sa paaging ini, idodolot kan padi an atang para sa kasalan kan nasabing tawo asin papatawadon siya.

³² Kun sarong karnero an dadarahon nin sarong tawo bilang dolot para sa saiyang kasalan, kaipuhan sarong babaeng karnero na mayo nin kaninan an saiyang darahon.

³³ Iduduta niya an saiyang kamot sa ibabaw kan payo kan hayop asin bubunoon niya iyan duman sa parteng amihan kan altar saen binubuno an mga hayop na tinututong.

³⁴ Idodotdot kan padi an saiyang muro sa dugo kan hayop asin lalahidan niya an mga sungay kan altar, dangan iuula niya an matatadang dugo sa pamitisan kan altar.

³⁵ Pakatapos, hahaleon niya an gabos na taba, siring kan paghale niya sa taba kan karnerong binuno bilang dolot para sa katoninongan, asin tututongon niya iyan duman sa altar kaiba kan mga dolot na pagkakan na itinatao sa Kagurangnan. Sa paaging ini, idodolot kan padi an atang para sa kasalan kan nasabing tawo asin papatawadon siya.