Levitico 25 - Marahay na Bareta Biblia

An Ikapitong Taon

¹ Tinaraman nin Kagurangnan si Moises duman sa Bukid nin Sinai,

² “Sabihan mo an banwaan nin Israel na paglaog nindo sa dagang itatao ko saindo, maotob kan Sabbath nin Kagurangnan an daga.

³ Sa laog nin anom na taon matanom kamo sa saindong mga oma, mapakarahay kan saindong mga ubasan asin matipon kan saindong inani.

⁴ Alagad an ikapitong taon iyo an taon nin pahingalo para sa daga, sarong taon na Sabbath para sa Kagurangnan. Dai kamo magtanom sa saindong oma o magpakarahay kan saindong ubasan.

⁵ Dai kamo mag-ani kan trigo na nagtalubo maski dai man nindo itinanom, asin dai kamo magtipon kan mga ubas sa saindong ubasan, na dai man nindo inataman; an taon na iyan sarong taon nin pahingalo para sa daga.

⁶ Maski dai nindo inataman an daga sa taon na iyan, matao man giraray iyan nin pagkakan sa saindo, sa mga oripon nindo, sa mga nagpapatandan saindo, sa mga dayuhan na nakikihimanwa saindo,

⁷ sa mga inaataman nindong mga hayop saka sa mga lalaw na hayop na yaon sa saindong kaomahan. An gabos na bunga kan daga sa taon na iyan pwedeng kakanon.

An Taon nin Katalingkasan

⁸ “Dangan bumilang kamo nin kwarenta y nwebeng taon,

⁹ asin sa ika-sampolong aldaw kan ikapitong bulan, an Aldaw nin Pagbayad para sa mga Kasalan, magsugo kamo nin sarong lalaki sa bilog na daga na mapatanog kan trompeta tanganing ipahayag an katalingkasan sa gabos na nag-eerok sa daga.

¹⁰ Sa paaging ini, pinapalaen nindo an ikasingkwentang taon asin ipinapahayag nindo an katalingkasan sa gabos na nag-eerok sa daga. Sa taon na iyan ibabalik nindo sa dating kagsadiri o sa saiyang kapagarakian an gabos na ipinabakal nindang pagsadiri. An siisay man na ipinabakal bilang oripon, mapuli sa sadiri niyang pamilya.

¹¹ An taon na ini magigin sarong taon nin pag-ogma para sa saindo; dai kamo magtanom, ni mag-ani kan trigo na nagsadiring magtalubo sa saindong oma, ni magguno kan ubas sa saindong ubasan na dai nindo inataman.

¹² An bilog na taon na iyan magigin banal para saindo; an kakakanon sana nindo iyo an mga bunga kan saindong mga daga na dai nindo inataman.

¹³ “Sa taon na iyan, an gabos na pagrogaring na ipinabakal ibabalik sa dating kagsadiri kaiyan.

¹⁴ Kaya kun kamo nagpapabakal kan saindong daga sa kapwa nindo Israelita o kun kamo an nagbabakal nin daga, magbarakalan kamo sa matanos na paagi.

¹⁵ Ipapabakal an daga sa kantidad na sosog sa bilang kan mga taon na an daga pwedeng magbunga bago umabot an masunod na Taon nin Katalingkasan.

¹⁶ Kun dakul an bilang kan mga taon, halangkaw man an halaga, alagad kun nagkapira na sanang taon, magigin hababa an kantidad kaiyan, huli ta an ipinapabakal iyo an bilang kan pamumunga kan daga.

¹⁷ Dai nindo pagdayaon an kapwa nindo Israelita, kundi magkaigwa kamo nin takot sa Dios; huli ta ako an Kagurangnan na saindong Dios.

An Problema kan Ikapitong Taon

¹⁸ “Kaya kuyogon nindo an sakong mga togon asin otobon nindo an sakong mga pagboot tanganing matoninong kamong mag-erok sa daga.

¹⁹ An daga mamumunga, asin mapapasaindo an gabos na boot nindong kakanon, patin matoninong kamong mag-eerok sa daga.

²⁰ “Alagad kun igwa saindo nin maghapot, ‘Ano an satong kakakanon sa laog kan ikapitong taon, kun kita dai pwedeng magtanom asin magtipon kan bunga nin satong oma?’

²¹ Bebendisyonan ko an daga sa ikaanom na taon tanganing mamunga iyan kan kakakanon nindo para sa tolong taon.

²² Magtatanom kamo sa saindong oma sa ikawalong taon, alagad an kakakanon nindo iyo idtong inani nindo kan ikaanom na taon asin padagos kamong magkakakan kaiyan sagkod na mag-ani kamo kan itinanom nindo sa taon na iyan.

Pagbalik kan Pagrogaring

²³ “Dai nindo pwedeng ipabakal an saindong daga na an kondisyon kan kabakalan sagkod na lamang, huli ta bako nindong sadiri iyan; sadiri ko iyan, asin siring kamo sa mga dayuhan na nakikihimanwa sako.

²⁴ “Kaya kun ipabakal an sarong daga, dapat na midbidon kan mabakal an deretso nin pagbalukat kaiyan saiya kan nagpabakal.

²⁵ Kun magin dukha an sarong Israelita asin mapiritan siya na ipabakal an saiyang daga, an pinakaharani niyang kadugo iyo an mabalukat kaiyan.

²⁶ Kun an sarong lalaki mayo nin kadugo na mabalukat kan pagrogaring dangan magin mayaman siya ngapit asin pwede na niyang balukaton an saiyang daga,

²⁷ kaipuhan bayadan niya an nakabakal kan maninigong kantidad para sa mga taon na natatada pa bago umabot an masunod na Taon nin Katalingkasan, na iyo an talaan na panahon na ipupuli man sana saiya an daga minsan dai niya iyan balukaton.

²⁸ Alagad kun kulang an kwartang pambalukat niya, an daga padagos na masasadirihan kan nakabakal sagkod na umabot an masunod na Taon nin Katalingkasan na iyo an panahon nin pagbalik kan daga sa dating kagsadiri kaiyan.

²⁹ “Kun an ipinabakal nin sarong lalaki sarong harong na nasa laog kan syudad na nakukudalan, an nagpabakal igwa nin deretso na balukaton iyan sa laog nin sarong taon poon kan aldaw nin pagpabakal.

³⁰ Kun dai niya iyan mabalukat sa laog kan taon na iyan, mawawaraan siya kan deretso nin pagbalukat; an harong magigin permanenteng pagsadiri kan nakabakal asin kapagarakian niya. Dai na iyan ibabalik saiya sa Taon nin Katalingkasan.

³¹ Alagad an mga harong na nasa luwas kan nakukudalan na syudad mimidbidon na arog sa mga oma; an dating kagsadiri kaiyan igwa nin deretsong balukaton giraray iyan asin ibabalik iyan saiya sa Taon nin Katalingkasan kun dai niya nabalukat.

³² Alagad an mga Levita igwa nin deretsong balukaton ano man na oras an saindang pagsadiri na yaon sa syudad na itinao sainda.

³³ Kun ipinabakal nin sarong Levita an saiyang harong na yaon sa saro kan mga syudad na itinao sainda asin dai niya iyan nabalukat, sa Taon nin Katalingkasan, ibabalik iyan saiya kan nakabakal, huli ta an mga harong na pagsadiri kan mga Levita sa saindang mga syudad, pamana sainda kan banwaan nin Israel sagkod lamang.

³⁴ Alagad an mga dagang pasabsaban sa palibot kan mga syudad kan mga Levita dai pwedeng ipabakal; sadiri ninda iyan sagkod lamang.

Mga Pautang sa mga Dukha

³⁵ “Kun magin dukha an kapwa nindo Israelita na nag-eerok sa harani nindo asin dai na niya kayang buhayon an saiyang sadiri, dapat na tawan nindo siya kan kaipuhan niya sa buhay, tanganing padagos siyang mamuhay sa kaibahan nindo, arog sa sarong dayuhan o nakikihimanwa.

³⁶ Dai kamo maghagad nin tubo kun siya mag-utang, kundi matakot kamo sa Dios tanganing an kapwa nindo Israelita padagos na mamuhay harani saindo.

³⁷ Dai nindo pagpatuboan an kwartang ipinautang nindo saiya, ni an pagkakan na ipinabakal nindo saiya.

³⁸ Ako an Kagurangnan na saindong Dios, na kuminua saindo hale sa daga nin Egipto tanganing itao saindo an daga nin Canaan asin tanganing ako an magin Dios nindo.

Pagpatalingkas sa mga Oripon

³⁹ “Kun an kapwa nindo Israelita na nag-eerok sa harani nindo magin dukha, asin ipabakal saindo an saiyang sadiri bilang oripon, dai nindo siya pagpalingkodon na arog sa sarong oripon.

⁴⁰ Mag-eerok siya sa kaibahan nindo bilang sarong parapatandan na sorogoon o sarong nakikihimanwa. Maglilingkod siya saindo sagkod na umabot an masunod na Taon nin Katalingkasan.

⁴¹ Pag-abot kan panahon na iyan, babayaan niya kamo asin ipag-iiba niya an saiyang mga aki tanganing magpuli sa saiyang pamilya saka sa pagsadiri kan saiyang mga ginikanan.

⁴² An banwaan nin Israel iyo an mga oripon ko, asin ako an kuminua sainda sa Egipto; dai sinda dapat ipabakal bilang mga oripon.

⁴³ Dai nindo sinda pag-apihon kundi matakot kamo sa saindong Dios.

⁴⁴ Kun nangangaipo kamo nin mga oripon, makakabakal kamo sa mga nasyon na nasa palibot nindo.

⁴⁵ Pwede man nindong bakalon an mga aki kan mga dayuhan na nakikihimanwa saindo. An siring na mga aki na namundag sa saindong daga pwedeng magin pagsadiri nindo.

⁴⁶ Pwede nindo sindang ipamana sa saindong mga aking lalaki, na saindang paglilingkodan sa bilog nindang buhay. Alagad dai nanggad nindo pag-apihon an kapwa nindo Israelita.

⁴⁷ “Halimbawa nagyaman an sarong dayuhan o an sarong nakikihimanwa saindo, mantang an sarong Israelita nagin dukha asin ipinabakal niya an saiyang sadiri duman sa dayuhan o sa nakikihimanwa saindo o sa sarong kaayon kan pamilya kan dayuhan.

⁴⁸ Maski nabakal na siya, igwa pa siya nin deretso na balukaton. Pwede siyang balukaton kan saro sa mga tugang niya

⁴⁹ o kan saiyang tiyo o kan saiyang primo o kan saro niyang kadugo na kaayon sa saiyang pamilya; o kun magyaman siya, siya na mismo an mabalukat sa sadiri niya.

⁵⁰ Makikiolay siya sa nagbakal saiya, asin bibilangon nindang duwa an mga taon poon kan ipabakal niya an saiyang sadiri sagkod sa masunod na Taon nin Katalingkasan. Dapat pag-olayan ninda an maninigong kantidad para sa saiyang katalingkasan sosog sa ibinabayad sa sarong nagpapatandan.

^51-52 Ibabalik niya an ibang parte kan kabakalan sosog sa bilang kan natatadang mga taon

⁵³ na garo man sana siya nagpapatandan taon-taon. Dai siya pwedeng pag-apihon kan saiyang kagurangnan.

⁵⁴ Kun dai pa siya makatalingkas huli sa mga nasambit na paagi, papatalingkason siya asin an saiyang mga aki sa masunod na Taon nin Katalingkasan.

⁵⁵ An sarong Israelita dai pwedeng magin oripon sagkod lamang, huli ta an banwaan nin Israel iyo an sakong oripon. Ako an nagkua sainda sa Egipto. Ako an Kagurangnan na saindong Dios.”