Levitico 22 - Marahay na Bareta Biblia

An Kabanalan kan mga Dolot

¹ Tinaraman nin Kagurangnan si Moises,

² “Sabihan mo si Aaron asin an saiyang mga aki na dai ninda pagdarahan nin kasosopgan an banal kong ngaran, kaya galangan ninda an mga banal na dolot na dinadara sako kan mga Israelita. Ako an Kagurangnan.

³ Kun an siisay man sa saiyang kapagarakian sa gabos na henerasyon, mantang maati, magdolok sa banal na mga dolot na dinara sako kan mga Israelita, siya dai na nanggad makapaglilingkod sa altar. Ako an Kagurangnan.

⁴ “Mayo nin siisay man sa kapagarakian ni Aaron na igwang nakakatakot na helang sa kublit o helang na turo an pwedeng magkakan kan arin man sa mga banal na dolot, sagkod na dai pa siya nagigin malinig. Magigin maati an siisay man na padi kun makadotdot siya nin ano man na maati arog baga sa sarong gadan o sa sarong lalaking linuluwasan nin sadiring banhi,

⁵ o sa ano man na maating hayop o tawo.

⁶ An padi na nagin maati magdadanay na maati sagkod magbanggi asin dai pwedeng kumakan kan banal na mga dolot sagkod na dai pa siya nagkakarigos.

⁷ Pakasolnop kan aldaw, magigin malinig na siya, asin pwede na siyang magkakan kan banal na mga dolot, huli ta iyo ini an saiyang pagkakan.

⁸ Dai siya dapat magkakan kan karne kan arin man na hayop na nagadan o ginadan kan mga maringis na hayop; makakaati iyan saiya. Ako an Kagurangnan.

⁹ “Kaipuhan otobon kan gabos na padi an itinao kong mga pagboot, tanganing dai sinda magkasala asin magadan huli sa paglapas ninda kaiyan. Ako an Kagurangnan na nagpapabanal sainda.

¹⁰ “An mga kaayon sana kan pamilya kan padi an pwedeng kumakan kan mga banal na dolot. Dai pwedeng kumakan kaiyan maski an dayuhan na nag-eerok sa harong kan padi o an saiyang tinandanan na sorogoon.

¹¹ Alagad an mga oripon na nabakal kan padi kan sadiri niyang kwarta o an namundag duman sa saiyang harong, pwedeng kumakan kan pagkakan na inako kan padi.

¹² An aking babae kan padi na naagom nin bakong padi, dai pwedeng kumakan kan arin man kan mga banal na dolot.

¹³ Alagad kun an aking babae kan padi nabalo o sinuhayan kan saiyang agom asin dai nag-aki, dangan buminalik sa harong nin saiyang ama arog kan daraga pa siya, pwede siyang kumakan kan pagkakan kan saiyang ama. An kaayon sana kan pamilya kan padi an pwedeng kumakan kaini.

¹⁴ “Kun an sarong tawo na bako man kaayon kan pamilya kan padi dai tuyong makakakan kan arin man sa mga banal na dolot, kaipuhan bayadan niya an padi kan bilog na kantidad kaiyan asin madagdag pa siya nin beynte porsyento.

¹⁵ Dai nanggad paglanghadan kan mga padi an mga banal na dolot sa Kagurangnan kan banwaan nin Israel,

¹⁶ huli sa pagpakakan kaiyan sa mga bakong maninigo; magdadara iyan nin kasalan asin padusa sa tawong iyan. Ako an Kagurangnan asin ako an nagpapabanal kan mga dolot.”

¹⁷ Dangan tinaraman nin Kagurangnan si Moises,

¹⁸ “Sabihan mo si Aaron asin an saiyang mga aki patin an bilog na banwaan nin Israel na kun an sarong Israelita o an siisay man na dayuhan na nag-eerok sa Israel magdara nin sarong atang sa pag-otob nin sarong panuga o bilang sarong boluntad na dolot, kaipuhan mayo nin ano man na kaninan an hayop.

¹⁹ Tanganing akoon ko an dolot, kaipuhan lalaki an hayop asin mayo nin kaninan.

²⁰ Dai kamo magdolot nin hayop na igwa nin kaninan, huli ta dai ko iyan aakoon.

²¹ Kun may magdara sa Kagurangnan nin dolot para sa katoninongan sa pag-otob nin sarong panuga o bilang sarong boluntad na dolot, kaipuhan mayo nin kaninan an hayop, tanganing akoon ko iyan.

²² Dai kamo magdolot sa Kagurangnan nin arin man na hayop na buta o pilay o igwang pinutolan sa hawak, o may gatok sa kublit o pigsa o sangaw. Dai nanggad kamo magdolot nin siring na hayop sa altar bilang dolot na pagkakan.

²³ Bilang boluntad na dolot, pwede nindong idolot an sarong hayop na dai nagdakula o may makanos na hawak; alagad dai iyan aakoon kun idolot nindo iyan sa pag-otob nin sarong panuga.

²⁴ Dai man kamo magdara sa Kagurangnan nin ano man na hayop na an bayag naronot o naputol, nalugad o nahale. Dai iyan itinutugot sa saindong daga.

²⁵ “Dai kamo magdolot nin hayop na hale sa sarong dayuhan bilang dolot na pagkakan. An mga siring na hayop ibibilang na may kaninan asin dai iyan aakoon.”

²⁶ Dangan tinaraman nin Kagurangnan si Moises,

²⁷ “Kun mamundag an sarong baka o karnero o kanding, papabayaan ngona nindo iyan sa kaibahan kan saiyang ina sa laog nin pitong aldaw, alagad poon sa ikawalong aldaw, pwede nang akoon iyan bilang dolot na pagkakan sa Kagurangnan.

²⁸ Dai nindo pagbunoon sa parehong aldaw an mag-inang hayop, baka man o karnero o kanding.

²⁹ Kun magdolot kamo nin sakripisyo nin pasasalamat sa Kagurangnan, sunodon nindo an mga pagboot tanganing akoon iyan.

³⁰ Kaipuhan kakanon nindo iyan sa aldaw man sanang iyan asin dai kamo magtada para sa masunod na aldaw.

³¹ “Kuyogon nindo an sakong mga pagboot; ako an Kagurangnan.

³² Dai nindo pagdarahan nin kasosopgan an sakong banal na ngaran; kaipuhan mamidbidan kan bilog na Israel na ako banal. Ako an Kagurangnan, asin ako an nagpapabanal saindo.

³³ Ako an kuminua saindo hale sa Egipto tanganing magin saindong Dios. Ako an Kagurangnan.”