Levitico 20 - Marahay na Bareta Biblia

Mga Padusa sa Dai Pagsunod

¹ Tinaraman nin Kagurangnan si Moises

² na sabihan an mga Israelita, “An siisay man saindo o sa mga dayuhan na nakikihimanwa sa saindo, na magtao kan arin man sa mga aki niya tanganing gamiton sa pagsamba ki Molec, gagapoon kan bilog na komunidad sagkod na magadan.

³ Magigin kaiwal ko siya asin dai na ibibilang na kaayon sa sakuyang banwaan, huli ta dinidigtaan niya an sakong Tabernakulo asin sinosopog niya an sakong ngaran sa pagtao kan saro niyang aki ki Molec.

⁴ Kun pabayaan kan komunidad an saiyang ginibo asin dai siya gadanon,

⁵ ako mismo an mapadusa saiya asin sa saiyang pamilya patin sa gabos na nakisumaro saiya sa pagtalikod sako tanganing sambahon si Molec. Dai ko sinda ibibilang na kaayon sa sakuyang banwaan.

⁶ “An siisay man na magduman sa mga espiritista asin maghagad sainda nin hatol, magigin kaiwal ko asin dai ko na ibibilang na kaayon sa sakuyang banwaan.

⁷ Kaya magpakabanal kamo huli ta ako an Kagurangnan na saindong Dios.

⁸ Kuyogon nindo an sakong mga togon, huli ta ako an Kagurangnan, asin ako an nagpapabanal saindo.”

⁹ Itinao nin Kagurangnan an minasunod na pagsusundon. An siisay man na magsumpa kan saiyang ama o ina gagadanon; responsable siya kan saiyang kagadanan.

¹⁰ An siisay man na lalaking magdorog sa agom kan saiyang kapwa, gagadanon kaiba kan babae.

¹¹ An siisay man na lalaking magdorog sa saro kan mga agom kan saiyang ama, nagdadara nin kasosopgan sa saiyang ama asin dapat gadanon kaiba kan babae. Sinda an responsable kan sadiri nindang kagadanan.

¹² An siisay man na magdorog sa saiyang manugang na babae, gagadanon kaiba kan babae; nakaginibo sinda nin orog karaot na bagay asin responsable sinda kan saindang kagadanan.

¹³ Kun an sarong lalaki magdorog sa kapwa niya lalaki, na garo ini sarong babae, nakaginibo sinda nin karigsokan; gagadanon sindang duwa; sinda an responsable kan saindang kagadanan.

¹⁴ Kun agomon nin sarong lalaki an sarong babae asin an ina kaini, susuloon sindang tolo sagkod na magadan huli ta guminibo sinda nin sarong bagay na makasosopog; dai kamo magtugot na mangyari an siring sa saindo.

^15-16 Kun magdorog an siisay man na lalaki o babae sa sarong hayop, gagadanon siya kaiba kan hayop. Siya an responsable kan saiyang kagadanan.

¹⁷ Kun agomon nin sarong lalaki an saiyang tugang na babae o maski an tugang niya sa ama o ina, guminibo sinda nin makasosopog na bagay asin maninigo na sopogon sa mata kan publiko dangan pahaleon sa komunidad. Dinorogan niya an saiyang tugang na babae asin dapat na padusahan.

¹⁸ Kun an sarong lalaki nakidorog sa sarong babaeng nareregla, papahaleon sinda sa komunidad huli ta linapas ninda an mga pagsusundon manongod sa pagigin maati.

¹⁹ Kun dinorogan kan sarong lalaki an saiyang tiyaon sa ama o sa ina, nagkasala sindang duwa asin maninigong magdusa huli ta naggibo sinda nin orog karaot na bagay.

²⁰ Kun dinorogan kan sarong lalaki an agom kan saiyang tiyo, sinopog niya an saiyang tiyo; siya asin an babae mabayad kan saindang kasalan; dai sinda magkakaigwa nin aki sagkod na sinda magadan.

²¹ Kun agomon kan sarong lalaki an agom kan saiyang tugang, dai sinda magkakaigwa nin aki sagkod na sinda magadan. Guminibo an lalaki nin sarong bagay na maati asin sinopog niya an saiyang tugang.

²² Nagtaram an Kagurangnan, “Otobon nindo an gabos kong mga togon asin mga pagboot, tanganing dai kamo isuka kan daga nin Canaan na pagdadarahan ko saindo.

²³ Dai nindo pag-arogon an mga kaugalean kan mga nag-eerok duman; isinusuka ko sinda, tanganing makalaog kamo sa saindang daga. Naggibo sinda nin mga karigsokan, kaya nauyam ako sainda.

²⁴ Ipinangako ko saindo an mayaman saka matubang na dagang ini na magin sadiri nindo, asin itatao ko iyan saindo. Ako an Kagurangnan na saindong Dios, asin linaen ko kamo sa ibang mga nasyon.

²⁵ Kaya tandaan nindo an kalaenan kan mga hayop asin mga gamgam na malinig saka maati. Dai kamo magkakan kan mga hayop o gamgam na maati. Ipinahayag ko na maati an mga iyan, asin makakapaati sa saindo an pagkakan kaiyan.

²⁶ Magin banal kamo huli ta ako an Kagurangnan banal, asin linaen ko kamo sa ibang mga nasyon tanganing magin sadiri ko.

²⁷ “An siisay man na lalaki o babaeng magkonsulta sa espiritu kan mga gadan, gagapoon sagkod na magadan; siya an responsable kan saiyang kagadanan.”