Levitico 2 - Marahay na Bareta Biblia

Mga Dolot na Pagkakan

¹ Kun magdara nin trigo an siisay man tanganing idolot sa Kagurangnan bilang dolot na pagkakan, kaipuhan na gilingon niya ngona iyan na magin arina. Uulaan niya iyan nin lana nin oliba asin bubugtakan nin insenso sa ibabaw,

² dangan dadarahon niya sa mga pading aki ni Aaron. Mahakbot an padi nin sarong gugom kan arina saka lana, kaiba an gabos na insenso dangan tututongon niya iyan sa altar bilang tanda na an gabos idinolot na sa Kagurangnan. An parong kaiyan nawiwilihan nin Kagurangnan.

³ An tada kan idinolot na pagkakan mapapaduman sa mga padi; banal iyan huli ta kabtang iyan kan pagkakan na idinolot sa Kagurangnan.

⁴ Kun tinapay na linuto sa horno an idodolot, kaipuhan linuto iyan na mayo nin lebadura. Pwedeng mahibog iyan o manipis, sinalakan nin lana nin oliba o linahidan sana.

⁵ Kun an idodolot tinapay na linuto sa parilya, kaipuhan gibohon iyan hale sa arina na may salak na lana nin oliba alagad mayo nin lebadura.

⁶ Dangan roronoton ngona iyan asin uulaan nin lana; iyan sarong dolot na pagkakan.

⁷ Kun an idodolot tinapay na linuto sa kawali, kaipuhan gibohon iyan sa arina asin sa lana nin oliba.

⁸ Darahon nindo iyan bilang dolot na pagkakan sa Kagurangnan asin itao nindo sa padi; an padi an madara kaiyan sa altar.

⁹ Makua nin sadit na kabtang an padi bilang tanda na an gabos idinolot sa Kagurangnan asin tututongon niya iyan sa altar. An parong kaiyan nawiwilihan nin Kagurangnan.

¹⁰ An tada kan idinolot mapapaduman sa mga padi; banal iyan huli ta kabtang iyan kan pagkakan na idinolot sa Kagurangnan.

¹¹ Dai nanggad kamo magdara nin dolot na pagkakan sa Kagurangnan na may lebadura; dai kamo maggamit nin lebadura o dugos sa saindong mga dolot na pagkakan para sa Kagurangnan.

¹² An enot na inani nindo taon-taon dadarahon nindo sa Kagurangnan bilang dolot, alagad dai iyan susuloon duman sa altar.

¹³ An gabos na dolot na gibo sa arina kaipuhan may timplang asin. An asin iyo an tanda kan tipan na satong ginibo. (Kaya bugtakan nindo nin asin an gabos nindong dolot.)

¹⁴ Kun kamo madara sa Kagurangnan nin dolot na hale sa saindong mga enot na ani kan trigo, an idolot nindo iyo an dinarang o giniling.

¹⁵ Ulaan nindo nin lana nin oliba sa ibabaw dangan bugtakan nin insenso.

¹⁶ Bilang tanda, tututongon kan padi an kabtang kan dolot, an lana, asin an gabos na insenso. Iyan sarong dolot na pagkakan para sa Kagurangnan.