Josue 6 - Marahay na Bareta Biblia

An Pagkarumpag kan Jerico

¹ Danay na serado asin may bantay an mga trangkahan nin Jerico tanganing dai makalaog an mga Israelita. Mayo nin nakakalaog o nakakaluwas sa syudad.

² Tinaraman nin Kagurangnan si Josue, “Itinatao ko sa saimong mga kamot an Jerico kaiba an saiyang hade saka maiisog na mga soldados.

³ Magmartsa ka asin an saimong mga soldados sa palibot kan Jerico sarong beses an aldaw sa laog nin anom na aldaw.

⁴ Mangengenot sa Kaban nin Tipan an pitong padi, na an lambang saro may darang trompeta. Sa ikapitong aldaw, mamartsa ka asin an saimong mga soldados nin pitong beses sa palibot kan syudad mantang pinapatanog kan mga padi an saindang mga trompeta.

⁵ Dangan mapatanog sinda nin sarong halawig na tanog. Pagkadangog nindo kaiyan, makurahaw kamo gabos, asin marurumpag an gabos na kudal kan syudad. Dangan malaog sa syudad an bilog na hukbo.”

⁶ Inapod ni Josue an mga padi dangan sinabihan, “Kuahon nindo an Kaban nin Tipan asin magpaenotan an pito saindo na may darang mga trompeta.”

⁷ Dangan pinagbotan niya an saiyang mga soldados na magpoon sa pagmartsa sa palibot kan syudad; nangenotan sa Kaban nin Tipan nin Kagurangnan an mga bantay na soldados.

^8-9 Siring sa ipinagboot ni Josue, an mga bantay na soldados nangenot sa mga padi na nagpapatanog kan mga trompeta. Kasunod ninda an mga pading nagdadara kan Kaban nin Tipan, dangan an mga soldados na panghuri, mantang daing ontok an pagtanog kan trompeta.

¹⁰ Alagad pinagbotan ni Josue an saiyang mga soldados na dai magkurahaw asin dai magtaram sagkod na dai niya ipinagboboot.

¹¹ Kaya ipinalibot niya sa syudad an Kaban nin Tipan nin sarong beses. Pakatapos, nagbalik sinda sa kampo asin duman nagpalihis kan banggi.

^12-13 Amay na nagbangon si Josue kan sunod na aldaw asin sa ikaduwang beses naglibot sa syudad an mga padi saka an mga soldados arog kan ginibo ninda kan nakaaging aldaw. Nangenot an mga bantay na soldados, nagsunod an pitong padi na nagpapatanog kan pitong trompeta, dangan an mga padi na nagdadara kan Kaban nin Tipan nin Kagurangnan, asin kasunod an mga soldados na panghuri. Sa bilog na paglibot, padagos an pagtanog kan mga trompeta.

¹⁴ Naglibot sinda nin sarong beses sa syudad kan ikaduwang aldaw dangan nagbalik sa kampo. Ginibo ninda ini sa laog nin anom na aldaw.

¹⁵ Sa ikapitong aldaw, nagbangon sinda kan nagliliwanag na an kaagahon asin nagmartsa nin pitong beses sa palibot kan syudad sa siring man na paagi; iyo sana ini an aldaw na naglibot sinda sa syudad nin pitong beses.

¹⁶ Sa ikapitong paglibot, kan papatanogon na kan mga padi an saindang mga trompeta, pinagbotan ni Josue an saiyang mga soldados, “Magkurahaw kamo, huli ta itinao na saindo nin Kagurangnan an bilog na syudad!

¹⁷ Suloon nindo an gabos na yaon diyan bilang sarong atang sa Kagurangnan. An maraot na babae sanang si Rahab asin an mga kaibahan niya sa harong an bubuhayon nindo huli ta tinago niya an satong mga espiya.

¹⁸ Alagad dai kamo magkua kan mga bagay na susuloon. Kun magkua kamo nin ano man, magdadara kamo nin kadimalasan asin kadaogan sa bilog na kampo nin Israel.

¹⁹ Lalaenon para sa Kagurangnan an gabos na bagay na gibo sa plata, bulawan, bronse o lansang. Ibubugtak iyan sa kaban nin yaman nin Kagurangnan.”

²⁰ Kaya pinatanog kan mga padi an mga trompeta. Pagkadangog kaini kan mga lalaki, nagkurahaw sinda nin makosog asin narumpag an mga kudal. Dangan tinukad kan bilog na hukbo an bulod pasiring sa syudad asin sinakop an syudad.

²¹ Ginadan ninda an gabos na tawo duman, lalaki saka babae, aki asin gurang. Ginadan man ninda an mga baka, karnero sagkod mga asno.

²² Dangan sinabihan ni Josue an duwang lalaki na nagsiyasat kan syudad, “Magduman kamo sa harong kan maraot na babae, asin iluwas nindo siya kaiba an saiyang pamilya, siring sa ipinanuga nindo saiya.”

²³ Kaya nagduman sinda asin ilinuwas ninda si Rahab, kaiba an saiyang ama saka ina, an saiyang mga tugang, sagkod an iba pang kaayon kan saiyang pamilya. Dinara sinda gabos kan mga espiya sa ligtas na lugar harani sa kampo kan Israel.

²⁴ Dangan sinulo ninda an syudad asin an gabos na yaon duman, pwera an mga bagay na gibo sa bulawan, plata, bronse asin lansang na kinua ninda saka ibinugtak sa kaban nin yaman nin Kagurangnan.

²⁵ Alagad dai ipinagadan ni Josue an maraot na babaeng si Rahab saka an gabos niyang kadugo, huli ta tinago ni Rahab an duwang espiya na sinugo niya sa Jerico. (Sagkod ngunyan nag-eerok sa Israel an saiyang kapagarakian.)

²⁶ Sa panahon na ini, nagtao si Josue nin sarong patanid: “Mamaldisyonon nin Kagurangnan an siisay man na magpatindog giraray kan syudad nin Jerico. Magagadan an matuang aking lalaki kan siisay man na magbugtak kan pundasyon kan syudad; Magagadan an ngohod na aking lalaki kan siisay man na magpatindog kan mga trangkahan kaiyan.”

²⁷ An Kagurangnan danay na kaibahan ni Josue, asin an dangog niya nakalakop sa bilog na daga.