Josue 4 - Marahay na Bareta Biblia

Pinatindog an mga Gapong Giromdoman

¹ Kan makabalyo na sa Jordan an bilog na Israel, nagtaram an Kagurangnan ki Josue,

² “Pumili ka nin doseng lalaki, saro sa lambang tribu,

³ asin pagbotan mo sinda na magkua nin doseng gapo sa tahaw kan salog, duman mismo sa tinindogan kan mga padi. Sabihan mo sinda na darahon an mga gapo sa lugar na pagkakampohan nindo ngunyan na banggi.”

⁴ Inapod ni Josue an doseng lalaki na saiyang pinili

⁵ asin sinabihan, “Magduman kamo sa Jordan, sa enotan kan Kaban nin Tipan nin Kagurangnan na saindong Dios. An lambang saro saindo magpasan nin gapo na kukuahon nindo duman, saro para sa lambang tribu kan Israel.

⁶ An mga gapong iyan iyo an magpapagiromdom sa mga tawo kan ginibo nin Kagurangnan. Sa maabot na panahon, kun maghapot an saindong mga aki kun ano an kahulogan para saindo kan mga gapong iyan,

⁷ sabihan nindo sinda na an tubig kan Jordan nag-ontok sa pagbulos kan magbalyo sa salog an Kaban nin Tipan nin Kagurangnan. An mga gapong iyan danay na magpapagiromdom sa mga Israelita kan nangyari digdi.”

⁸ Sinunod kan mga lalaki an mga pagboot ni Josue. Siring sa ipinagboot nin Kagurangnan ki Josue, nagkua sinda nin doseng gapo sa tahaw kan Salog nin Jordan, saro para sa lambang tribu kan Israel, pinasan pasiring sa lugar na saindang pagkakampohan asin ibinugtak ninda duman.

⁹ Nagpatindog man si Josue nin doseng gapo sa tahaw kan Jordan, sa tinindogan kan mga padi na nagdadara kan Kaban nin Tipan. (Sagkod ngunyan yaon pa duman an mga gapong idto.)

¹⁰ An mga padi nagtirindog sa tahaw kan Jordan sagkod na natapos an mga ipinagboot nin Kagurangnan ki Josue na gibohon kan mga tawo. Ini an ipinagboot ni Moises. Naghidali an mga tawo sa pagbalyo sa salog.

¹¹ Kan nasa ibong na sinda gabos, nangenotan sa mga tawo an mga pading nagdadara kan Kaban nin Tipan nin Kagurangnan.

¹² Siring sa sinabi sainda ni Moises, enot na nagbalyo sa mga Israelita an mga lalaking hale sa tribu ni Ruben, Gad asin sa kabanga kan tribu ni Manases. Sinda gabos andam sa pakilaban.

¹³ Sa atubang nin Kagurangnan, maabot sa kwarenta mil na lalaki na andam sa pakilaban an buminalyo pasiring sa kapatagan nin Jerico.

¹⁴ Huli sa ginibo nin Kagurangnan kan aldaw na idto, minidbid kan mga tawo si Josue bilang dakulang tawo. Iginalang siya ninda sa gabos na aldaw nin saiyang pagkabuhay siring na iginalang ninda si Moises.

¹⁵ Dangan tinaraman nin Kagurangnan si Josue

¹⁶ na pagbotan an mga pading nagdadara kan Kaban nin Tipan na maghale na sa tahaw kan Jordan.

¹⁷ Ginibo ini ni Josue,

¹⁸ asin kan makaabot na sa pangpang kan salog an mga padi, nagbulos giraray an tubig asin binaha kaiyan an pangpang kan salog.

¹⁹ Nagbalyo sa Jordan an mga tawo kan ikasampolong aldaw kan enot na bulan, asin nagkampo sinda sa Gilgal, sa sirangan nin Jerico.

²⁰ Duman pinatindog ni Josue an doseng gapo na kinua sa tahaw kan Jordan.

²¹ Sinabihan niya an mga Israelita, “Sa maabot na panahon, kun hapoton kamo kan saindong mga aki kun ano an kahulogan kan mga gapong iyan,

²² sabihan nindo sinda na naglakaw sa mamarang daga an Israel kan magbalyo sinda sa Jordan.

²³ Sabihan nindo sinda na pinamara nin Kagurangnan an tubig kan Jordan para sa saindo sagkod na kamo nakabalyo, siring kan pagpamara niya kan Dagat na Pula para samo.

²⁴ Huli kaini maaaraman kan lambang saro sa kinaban kun gurano kadakula an kapangyarihan nin Kagurangnan, asin oomawon nindo an Kagurangnan na saindong Dios sagkod lamang.”