Josue 24 - Marahay na Bareta Biblia

Kinaolay ni Josue duman sa Shekem an mga Tawo

¹ Tinipon ni Josue sa Shekem an gabos na tribu kan Israel. Inapod niya an kamagurangan, an mga lider, an mga hukom, sagkod an mga opisyal kan Israel, dangan nag-atubang sinda sa Dios.

² Sinabihan ni Josue an mga tawo, “Iyo ini an tataramon nin Kagurangnan, an Dios nin Israel: ‘Kaidtong panahon, an saindong mga ginikanan nag-erok sa ibong kan Salog nin Eufrates asin nagsamba sa ibang mga dios. An saro sa mga ginikanan na ini iyo si Tera, na ama ni Abraham asin ni Nahor.

³ Dangan kinua ko si Abraham na saindong ginikanan, hale sa dagang idto sa ibong kan Eufrates, asin pinangenotan ko siya pasiring sa bilog na daga nin Canaan. Tinawan ko siya nin dakul na kapagarakian. Nagin aki niya si Isaac,

⁴ asin nagin aki ni Isaac si Jacob saka si Esau. Itinao ko ki Esau an mabulod na daga nin Edom bilang kahirasan niya, alagad an saindong ginikanan na si Jacob sagkod an siyang mga aki nagpasiring sa Egipto.

⁵ Dangan sinugo ko si Moises saka si Aaron asin pinadarahan ko nin dakul na kasakitan an Egipto; alagad hinale ko kamo duman.

⁶ Ilinuwas ko hale sa Egipto an saindong mga ginikanan, asin linamag sinda kan mga Egipcio na nakalunad sa saindang mga karwahe saka mga kabayo. Alagad kan makaabot sa Dagat na Pula an saindong mga ginikanan,

⁷ naghagad sinda sako nin tabang asin binugtakan ko nin kadikloman sa pagultanan ninda saka kan mga Egipcio. Tinahoban ko kan dagat an mga Egipcio dangan linamos ko sinda. Aram nindo kun ano an ginibo ko sa Egipto. “‘Haloy kamong nag-erok sa kalangtadan.

⁸ Dangan dinara ko kamo sa daga kan mga Amoreo, na nag-erok sa sirangan kan Jordan. Nakilaban sinda saindo, alagad itinao ko saindo an kapangganahan laban sainda. Nasakop nindo an saindang daga dangan ginaradan ko sinda sa pagdangadang nindo.

⁹ Dangan nakilaban saindo an hade nin Moab, si Balak na aki ni Zippor. Sinugo niya si Balaam na aki ni Beor tanganing maldisyonon kamo.

¹⁰ Alagad dai ko dinangog si Balaam kaya benedisyonan niya kamo, asin sa siring na paagi, ilinigtas ko kamo sa kamot ni Balak.

¹¹ Nagbalyo kamo sa Jordan dangan nakaabot sa Jerico. Linabanan kamo kan mga taga Jerico, siring man kan mga Amoreo, Perezeo, Cananeo, Heteo, Gergeseo, Heveo, asin kan mga Jebuseo. Alagad pinapanggana ko kamo laban sa sainda gabos.

¹² Ginibo kong magkatarakot sinda sa pagdangadang nindo tanganing pahaleon an duwang hadeng Amoreo. Bako iyan gibo kan saindong espada saka pana.

¹³ Tinawan ko kamo nin daga na dai nindo pinagpagalan asin nin mga syudad na dai man nindo itinugdok. Ngunyan, nag-eerok kamo duman asin nagkakakan nin mga ubas sagkod mga oliba hale sa mga poon na dai man nindo itinanom.’

¹⁴ “Kaya ngunyan matakot kamo sa Kagurangnan,” an olay ni Josue. “Tunay asin maimbod nindo siyang paglingkodan. Halea nindo an mga dios-dios na dating sinasamba kan saindong mga ginikanan sa Mesopotamia saka sa Egipto; an Kagurangnan sana an saindong paglingkodan.

¹⁵ Kun habo nindong maglingkod saiya, magpili kamo ngunyan kun siisay an saindong paglilingkodan, an mga dios-dios na dating sinasamba kan saindong mga ginikanan sa Mesopotamia o an mga dios-dios kan mga Amoreo, na an saindang daga iyo an saindong pinag-eerokan ngunyan. Alagad para sako asin para sa sakong pamilya, an Kagurangnan an samong paglilingkodan.”

¹⁶ Nagsimbag an mga tawo, “Sagkod pa man dai mi babayaan an Kagurangnan tanganing maglingkod sa ibang dios.

¹⁷ An Kagurangnan na satong Dios iyo an nagligtas samo asin sa samuyang mga magurang sa kaoripnan duman sa Egipto. Nahiling mi an mga ngangalasan na ginibo niya. Inataman niya kami sa gabos na banwaan na samong inagihan.

¹⁸ Sa samong pagdangadang, pinahale nin Kagurangnan an mga Amoreong nag-erok sa dagang ini. Kaya maglilingkod man kami sa Kagurangnan; siya an samong Dios.”

¹⁹ Nagsabi si Josue sa mga Tawo, “Alagad tibaad dai kamo makapaglingkod sa Kagurangnan. Siya sarong Dios na banal; sarong maimon na Dios. Dai niya mapapatawad an saindong mga kasalan asin kasombikalan.

²⁰ Kun talikodan nindo siya tanganing maglingkod sa dayuhan na mga dios, maaanggot siya saindo saka papadusahan niya kamo. Gagadanon niya kamo, maski ngani marahay siya kaidto sa saindo.”

²¹ Nagsimbag an mga tawo, “Dai! An Kagurangnan an samong paglilingkodan.”

²² Sinabihan sinda ni Josue, “Kamo an mga saksi sa saindo man sana, na pinili nindo an Kagurangnan tanganing paglingkodan.” Nagsimbag sinda, “Mga saksi kami.”

²³ “Kun siring, halea nindo an dayuhan na mga dios na yaon saindo asin manumpa kamo na magigin maimbod kamo sa Kagurangnan, an Dios nin Israel,” an olay ni Josue sa mga tawo.

²⁴ Nagsimbag giraray saiya an mga tawo, “Maglilingkod kami sa Kagurangnan na samong Dios. Kukuyogon mi an saiyang mga pagboot.”

²⁵ Kaya sa aldaw na idto, nakipagtipan si Josue sa mga tawo, asin duman sa Shekem tinawan niya sinda nin mga togon saka mga pagboot na susunodon.

²⁶ Isinurat ni Josue an mga togon na ini sa libro kan mga Togon nin Dios. Dangan nagkua siya nin sarong dakulang gapo asin pinatindog niya sa lindong kan kahoy na hamurawon na nasa santwaryo nin Kagurangnan.

²⁷ Sinabihan niya an gabos na tawo, “An gapong ini iyo an satong saksi. Nadangog kaini an gabos na itinaram sato nin Kagurangnan. Kaya magigin saksi ini laban saindo, tanganing dai kamo magtumang sa saindong Dios.”

²⁸ Dangan pinahale na ni Josue an mga tawo, asin an lambang saro nagpuli sa sadiri niyang daga.

Nagadan si Josue asin si Eleazar

²⁹ Dai nahaloy, nagadan si Josue na aki ni Nun asin sorogoon nin Kagurangnan sa edad na syento dyes na taon.

³⁰ Ilinubong siya ninda sa sadiri niyang daga sa Timnat-sera sa mabulod na daga kan Efraim, sa amihan kan Bukid nin Gaas.

³¹ Mantang nabubuhay pa si Josue, naglingkod sa Kagurangnan an mga Israelita asin pagkagadan niya, nagpadagos sinda sa paglingkod sa Kagurangnan mantang nabubuhay pa an mga lider na nakahiling kan gabos na ginibo nin Kagurangnan para sa Israel.

³² An mga tolang ni Jose, na dinara kan mga Israelita paghale ninda sa Egipto, ilinubong ninda sa Shekem, sa dagang binakal ni Jacob sa mga aki ni Hamor, an ama ni Shekem, sa kantidad na sanggatos na pedasong plata. An dagang ini minana kan kapagarakian ni Jose.

³³ Nagadan man si Eleazar na aking lalaki ni Aaron asin ilinubong siya sa Gibea, an banwang nasa mabulod sa daga nin Efraim na itinao sa saiyang aking lalaki na si Finehas.