Josue 18 - Marahay na Bareta Biblia

An Pagbanga Kan Natada Pang Daga

¹ Kan masakop na ninda an daga, an bilog na Israel nagtiripon sa Shilo asin pinatindog duman an Tabernakulo nin Kagurangnan.

² Igwa pa nin pitong tribu sa banwaan nin Israel na dai pa natatawan kan saindang kahirasan sa daga.

³ Kaya sinabihan ni Josue an mga Israelita, “Sagkod nuarin kamo maghahalat bago nindo laogon asin sakopon an dagang itinao saindo nin Kagurangnan na Dios kan saindong mga ginikanan?

⁴ Tawe ako nindo nin tolong lalaki hale sa lambang tribu. Papadumanon ko sinda sa bilog na daga tanganing maggibo nin mapa kan lugar na boot nindang magin kahirasan. Dangan mabalik sinda sako.

⁵ Babangaon ninda sa pitong parte an bilog na daga; mag-eerok si Juda sa saiyang teritoryo sa habagat, asin si Jose sa saiyang teritoryo sa amihan.

⁶ Isurat nindo an ngaran asin kamugtakan kan pitong parteng ini asin darahon nindo sako. Dangan riripahon ko iyan tanganing aramon an parteng boot nin Kagurangnan na saindong Dios para saindo.

⁷ Alagad an mga Levita dai mag-aako kan daga huli ta an kahirasan ninda iyo an maglingkod bilang mga padi nin Kagurangnan; dai na man hihirasan an mga tribu ni Gad, ni Ruben asin ni Manases sa sirangan huli ta nag-ako na sinda kan saindang daga sa sirangan kan Jordan na itinao sainda ni Moises, an sorogoon nin Kagurangnan.”

⁸ Nagralakaw an mga lalaki tanganing gumibo nin mapa kan daga, pakatawan sainda ni Josue kaining mga togon, “Magduman kamo sa bilog na daga asin gumibo kamo nin mapa. Pakatapos bumalik kamo sako digdi sa Shilo, asin hahapoton ko an Kagurangnan para saindo sa paagi nin pagripa.”

⁹ Kaya linibot ninda an bilog na daga asin isinurat kun paano an pagbanga ninda kaiyan sa pitong parte; ilinista ninda an mga banwa. Dangan nagbalik sinda ki Josue duman sa kampo sa Shilo.

¹⁰ Nagripa si Josue tanganing hapoton an Kagurangnan para sainda. Dangan an lambang saro kan natatadang mga tribu tinawan niya kan kahirasan na daga.

An Dagang Itinao ki Benjamin

¹¹ An daga na manongod sa mga pamilya kan tribu ni Benjamin iyo an enot na itinao. An saindang daga nasa tahaw kan mga daga kan tribu ni Juda saka ni Jose.

¹² Sa parteng amihan, an pagdolonan ninda minapoon sa Salog nin Jordan dangan minatukad pasiring sa amihan nin Jerico; sa solnopan, lampas ini sa mabulod na daga asin sagkod sa kalangtadan nin Bet-aven.

¹³ Dangan an pagdolonan minapasiring sa tukadon na nasa habagat na parte kan Luz (inapod man Betel), dangan minaibaba sa Atarot Addar, sa bukid na nasa habagat kan Ibabang Bet-horon.

¹⁴ Dangan minaliwat nin direksyon an pagdolonan, minaliko sa habagat hale sa solnopan kan bukid asin minaduman sa Kiriat-baal (o Kiriat-jearim), na sakop kan tribu ni Juda. Iyo ini an pagdolonan sa solnopan.

¹⁵ Sa habagat, an pagdolonan minapoon sa gilid kan Kiriat-jearim asin minapasiring sa mga burabod nin Neftoa.

¹⁶ Minaibaba ini pasiring sa pamitisan kan bukid na nakadungaw sa Kapantayan nin Hinnom, sa amihan na poro kan Kapantayan nin Refaim, dangan minapasiring sa habagat, na minaagi sa Kapantayan nin Hinnom, sa habagat kan tukadon kan mga Jebuseo, pasiring sa En-rogel.

¹⁷ An pagultanan minaliko pasiring sa amihan dangan minadagos sa En-semes, asin sa Gelilot na kahampang kan Dalan nin Adummim. Minaibaba ini sa Gapo ni Bohan (si Bohan sarong aki ni Ruben)

¹⁸ asin minaagi sa amihan kan tukadon na nakadungaw sa Kapantayan nin Jordan. Dangan minaibaba sa kapantayan,

¹⁹ na minaagi sa amihan na parte kan tukadon nin Bet-hogla asin sagkod sa amihan, sa sadit na sapa kan Gadan na Dagat na binubulosan kan Salog nin Jordan. Iyo ini an pagdolonan sa habagat.

²⁰ An Salog nin Jordan iyo an pagdolonan sa sirangan. Ini an mga pagdolonan kan dagang itinao bilang pamana sa mga pamilya kan tribu ni Benjamin.

²¹ An mga syudad na itinao sa mga pamilya kan tribu ni Benjamin iyo an Jerico, Bet-hogla, Emek-keziz,

²² Bet-araba, Zemaraim, Betel,

²³ Avvim, Para, Ofra,

²⁴ Kefar-ammoni, Ofni, asin Geba: doseng syudad gabos, kaiba an mga banwa sa palibot kan mga iyan.

²⁵ Kairiba man an Gibeon, Rama, Beerot,

²⁶ Mizpa, Kefira, Moza,

²⁷ Rekem, Irpeel, Tarala,

²⁸ Zela, Haelef, Jebus, (o Jerusalem), Gibea, asin Kiriat-jearim: katorseng syudad gabos, kaiba an mga banwa sa palibot kan mga iyan. Iyo ini an daga na itinao bilang pamana sa mga pamilya kan tribu ni Benjamin.