Josue 14 - Marahay na Bareta Biblia

An Pagbanga kan Teritoryo sa Solnopan kan Jordan

¹ An masunod iyo an istorya kun paano binanga sa mga Israelita an daga nin Canaan sa solnopan kan Salog nin Jordan. Binaranga idto sa mga tawo kan padi na si Eleazar, ni Josue na aki ni Nun, asin kan mga lider kan mga pamilya kan mga tribu nin Israel.

² Siring sa ipinagboot nin Kagurangnan ki Moises, an daga kan siyam may kabangang tribu sa parteng solnopan kan Jordan pinagbaranga sa paagi nin pagripa.

^3-4 Itinao na ni Moises sa duwa may kabangang tribu an daga sa sirangan kan Salog nin Jordan. (An kapagarakian ni Jose binanga sa duwang tribu: an tribu ni Manases asin ni Efraim.) Dai tinawan ni Moises nin daga an mga Levita. Alagad tinawan niya sinda nin mga syudad na pag-eerokan na igwa nin mga pasabsaban para sa saindang mga hayop.

⁵ Binanga kan mga Israelita an daga siring sa ipinagboot nin Kagurangnan ki Moises.

Itinao ki Caleb an Hebron

⁶ Sarong aldaw, nagkapirang mga tawo na gikan sa tribu ni Juda an nagduman ki Josue sa Gilgal. An saro sainda, si Caleb na aki ni Jefunne na Keneceo, nagsabi saiya, “Aram mo an itinaram nin Kagurangnan ki Moises, an sorogoon nin Dios, manongod sa satong duwa duman sa Kades-barnea.

⁷ Kwarenta an sakong edad kan sugoon ako ni Moises na sorogoon nin Kagurangnan hale sa Kades-barnea tanganing siyasaton an dagang ini. Ipinahayag ko saiya an katotoohan.

⁸ Tinakot an mga tawo kan mga kairiba ko, alagad maimbod na kinuyog ko an Kagurangnan na sakong Dios.

⁹ Huli ta ginibo ko ini, nanuga sako si Moises na itatao niya sako sagkod sa mga aki ko bilang samong pamana an daga na sakong lalakawan.

¹⁰ Alagad kwarenta y singkong taon na ngunyan an nakaagi magpoon kan itaram iyan nin Kagurangnan ki Moises. Sa panahon na iyan naglakaw sa kalangtadan an Israel, asin pinahalawig pa nin Kagurangnan an sakong buhay, siring sa saiyang panuga. Hilinga ako! Otsenta y singkong taon na an edad ko

¹¹ alagad makosog pa ako ngunyan siring kan aldaw na sugoon ako ni Moises. Makosog pa ako para sa pakilaban o para sa ano man.

¹² Kaya itao mo sako ngunyan an mabulod na daga na ipinanuga sako nin Kagurangnan kan aldaw na ako asin an mga kairiba ko nagpahayag manongod sa ginibo ming pagsiyasat. Sinabihan mi kamo kaidto na an rasa kan mga higanteng Anakim yaon duman sa mga syudad na napapalibotan nin kudal. Tibaad ibahan ako nin Kagurangnan, asin mapahale ko sinda siring sa itinaram nin Kagurangnan.”

¹³ Benendisyonan ni Josue si Caleb na aki ni Jefunne asin itinao niya saiya an syudad nin Hebron bilang saiyang pamana.

¹⁴ An Hebron sadiri ngunyan kan mga kapagarakian ni Caleb na aki ni Jefunne na Keneceo, huli ta maimbod siyang nagkuyog sa Kagurangnan, an Dios nin Israel.

¹⁵ Kaidto an Hebron inapod na syudad ni Arba. (Si Arba iyo an pinakabantog sa mga Anakim.) Matoninong na kaidto sa daga.