Josue 11 - Marahay na Bareta Biblia

Nadaog ni Josue si Jabin asin an Saiyang mga Kairiba

¹ Kan makaabot ki Hadeng Jabin kan Hazor an bareta kan mga kapangganahan nin Israel, nagpadara siya nin mensahe ki Hadeng Jobab kan Madon, sa mga hade kan Simron asin Acsaf,

² sa mga hade sa kabubuldan sa parteng amihan, sa kapantayan nin Jordan sa timog kan Danaw nin Galilea, sa mga kababan, asin sa baybayon harani sa Dor.

³ Nagpasabi man siya sa mga Cananeo sa mag-ibong na gilid kan Jordan, sa mga Amoreo, Heteo, Perezeo, asin sa mga Jebuseo na nag-eerok sa kabubuldan, siring man sa mga Heveo na nag-eerok sa pamitisan kan Bukid nin Hermon sa daga nin Mizpa.

⁴ Nag-abot an mga hadeng ini kaiba an gabos nindang soldados—sarong dakulang hukbo na an bilang siring sa mga baybay sa pangpang kan dagat. Igwa pa sinda nin dakul na mga kabayo saka mga karwahe.

⁵ Pinagsararo kan mga hadeng ini an saindang hukbo asin nagtiripon sinda sa may Sapa nin Merom tanganing labanan an Israel.

⁶ Tinaraman nin Kagurangnan si Josue, “Dai ka matakot sainda. Sa siring na oras sa aga, garadan nang itatao ko sinda sa Israel; pipilayan nindo an saindang mga kabayo asin susuloon an saindang mga karwahe.”

⁷ Kaya biglang sinalakay sinda ni Josue asin kan saiyang mga soldados sa may Sapa nin Merom.

⁸ Itinao nin Kagurangnan an kapangganahan sa mga Israelita; sinalakay ninda an mga kaiwal asin linamag sagkod sa Misrefot-maim saka Sidon sa parteng amihan, patin sagkod sa Kapantayan nin Mizpa sa sirangan. An ralaban nagpadagos sagkod na mayo na nin natadang buhay sa mga kaiwal.

⁹ Ginibo sainda ni Josue an ipinagboot nin Kagurangnan: pinilayan niya an saindang mga kabayo asin sinulo an saindang mga karwahe.

¹⁰ Dangan nagbalik si Josue asin sinakop an Hazor saka ginadan an hade duman. (Kaidtong panahon, an Hazor iyo an pinakamakosog sa mga kahadean na idto.)

¹¹ Ginadan kan mga Israelita an mga tawo duman; mayo sindang itinadang buhay, dangan sinulo ninda an syudad.

¹² Sinakop ni Josue an gabos na syudad na idto asin an saindang mga hade. Ginadan niya an mga tawo duman siring sa ipinagboot ni Moises na sorogoon nin Kagurangnan.

¹³ Alagad dai sinulo kan mga Israelita an arin man sa mga syudad na itinugdok sa mga bulod; an Hazor sana an sinulo ni Josue.

¹⁴ Sinamsam kan mga Israelita an mga mahalagang kagamitan saka an mga hayop sa mga syudad na idto para sa sainda. Alagad ginadan ninda an mga tawo; mayo sindang itinadang buhay.

¹⁵ Pinagbotan nin Kagurangnan an saiyang sorogoon na si Moises asin pinagbotan ni Moises si Josue. Kinuyog ni Josue an gabos na ipinagboot nin Kagurangnan ki Moises.

An Teritoryo na Sinakop ni Josue

¹⁶ Sinakop ni Josue an bilog na daga—an mga syudad sa kabubuldan asin sa kababan, sa amihan saka sa habagat, an bilog na teritoryo kan Gosen, an habagat na parte kan Canaan, sagkod an Kapantayan nin Jordan.

^17-18 An teritoryo minapoon sa Bukid nin Halak sa habagat harani sa Edom, sagkod sa Baal-gad sa amihan, sa Kapantayan nin Lebanon sa habagat kan Bukid nin Hermon. Haloy na nakigera si Josue sa mga hade kan teritoryong idto, alagad nabihag niya sinda gabos asin saiyang ginadan.

¹⁹ An nakipagtipan sa Israel iyo sana an syudad kan Gibeon na pinag-erokan kan nagkapirang Heveo. Nadaog gabos sa gera an iba.

²⁰ Ginibo nin Kagurangnan na maigot sindang makipaglaban sa mga Israelita tanganing ronoton sinda asin gadanon na mayo nin pagkaherak. Iyo ini an ipinagboot nin Kagurangnan ki Moises.

²¹ Kan panahon na idto, nagduman si Josue asin tinunaw an rasa kan mga higante na inapod Anakim na nag-erok sa kabubuldan—sa Hebron, Debir, Anab, sagkod sa gabos na kabubuldan kan Juda saka Israel. Ginadan sinda gabos ni Josue asin sinakop an saindang mga syudad.

²² Mayo nin natada sa mga Anakim sa daga nin Israel; alagad sa Gaza, Gat asin Asdod, igwa nin natadang nagkapira.

²³ Sinakop ni Josue an bilog na daga, siring sa ipinagboot nin Kagurangnan ki Moises. Binaranga ni Josue an daga bilang pamana sa lambang tribu nin Israel. Dangan nagpahingalo sa pakigera an mga tawo.