Jonas 4 - Marahay na Bareta Biblia

An Kaanggotan ni Jonas asin an Pagkaherak nin Dios

¹ Dai naoyonan ni Jonas an bagay na ini asin naanggot siya.

² Kaya namibi siya, “Kagurangnan, bakong sinabi ko na kaidto bago ako nagdigdi na iyo ini an gigibohon mo? Kaya hiningowa kong magdulag pasiring sa Espanya. Aram ko na ika sarong Dios na mamomoton, maheherakon, matinios, maboot, asin danay na andam na magbago nin isip asin dai na magpadusa.

³ Kaya ngunyan, Kagurangnan, tugote akong magadan. Mas marahay pang magadan na ako ki sa mabuhay.”

⁴ Nagsimbag an Kagurangnan, “May deretso ka daw na maanggot, Jonas?”

⁵ Nagluwas si Jonas sa syudad asin nagduman sa sirangan na parte kan syudad dangan nagtukaw. Guminibo siya nin sarong sirongan saka duman naghalat kun ano an mangyayari sa Nineve.

⁶ Dangan pinatalubo nin Kagurangnan Dios an sarong tinanom sa kataed ni Jonas tanganing malindongan siya asin dai mahorasa. Nawilihan nin marahay ni Jonas an tinanom.

⁷ Alagad pagkaaga kan sunod na aldaw, pinagbotan nin Dios an sarong ulod na ngatngaton an tinanom, asin naalang ini.

⁸ Pagsirang kan aldaw, ipinadara nin Dios an sarong mainit na doros hale sa sirangan, asin huli sa init kan aldaw na minatama sa payo ni Jonas, haros madismayo siya. Kaya minawot niyang magadan. Nagsabi siya, “Mas marahay pa sako an magadan ki sa mabuhay.”

⁹ Alagad sinabihan siya nin Dios, “May deretso ka daw na maanggot huli sa nangyari sa tinanom?” Nagsimbag si Jonas, “May deretso ako na maanggot—maanggot sagkod na magadan!”

¹⁰ Sinabihan siya nin Kagurangnan, “An tinanom na ini nagtalubo sa laog nin sarong banggi dangan nawara sunod na aldaw; mayo kang ginibo para sa tinanom asin dai mo iyan pinatalubo—alagad pinagmomondoan mo iyan!

¹¹ Dai ko man daw dapat na maherakan an Nineve, idtong dakulang syudad, na igwa nin syento beynte mil na inosenteng mga aki, asin dakul na mga hayop?”