Jonas 3 - Marahay na Bareta Biblia

Kinuyog ni Jonas an Kagurangnan

¹ Dangan nagtaram giraray ki Jonas an Kagurangnan.

² Nagsabi siya, “Magduman ka sa Nineve, idtong dakulang syudad, asin ipahayag mo sa mga tawo an mensahe na itinao ko saimo.”

³ Kaya kinuyog ni Jonas an Kagurangnan asin nagduman siya sa Nineve, na sarong syudad na nangangaipo nin tolong aldaw na paglakaw huli sa kadakulaan.

⁴ Nagpoon sa paglakaw sa syudad si Jonas, asin pakalakaw niya nin sarong aldaw, nagpahayag siya, “Matutunaw an Nineve pakalihis nin kwarentang aldaw!”

⁵ Nagtubod sa mensahe nin Dios an mga taga Nineve. Kaya nagkasararo sinda na mag-ayuno, asin an gabos naggubing nin sako sa pagpahiling kan saindang pagsolsol.

⁶ Kan an baretang ini nakaabot sa hade nin Nineve, naghale siya sa natutukawan niyang trono, hinuba an saiyang gubing dangan nagsulot nin sako asin nagtukaw sa abo.

⁷ Nagpaluwas siya nin sarong pagboot sa mga taga Nineve: “Saro ining pagboot hale sa hade asin sa saiyang mga opisyal: Kaipuhan dai nanggad magkakan nin anoman an siisay man; ipinapangalad sa gabos na tawo o hayop, an pagkakan asin an pag-inom.

⁸ An gabos na tawo saka hayop dapat na magsulot nin sako. An lambang saro kaipuhan maigot na magpamibi sa Dios, asin talikodan an saiyang maraot na ugale saka maraot na mga gawe.

⁹ Tibaad pa magbago nin isip an Dios; tibaad dai na siya maanggot, asin dai kita magadan!”

¹⁰ Nahiling nin Dios an ginibo ninda; kun paano sinda nagtalikod sa maraot nindang gawe. Kaya nagbago siya nin isip asin dai na niya sinda pinadusahan siring sa sinabi niyang gigibohon niya.