Joel 1 - Marahay na Bareta Biblia

¹ Iyo ini an mensahe nin Kagurangnan ki Joel na aking lalaki ni Petuel.

Ipinagmondo kan mga Tawo an Pagkaraot kan mga Tinanom

² Dangoga nindo ini, kamong mga gurang na; paghinanyog, kamong nag-eerok sa Juda! Nangyari na daw an siring kaini sa saindong panahon o sa panahon kan saindong mga magurang?

³ Isaysay nindo iyan sa saindong kaakian; isasaysay man ninda sa saindang kaakian, na iyo man an masaysay sa masunod na henerasyon.

⁴ Grupo-grupong mga doron an nagtugdon sa mga tinanom; an nalihisan kan sarong grupo, kinakakan kan masunod.

⁵ Pagmata kamo asin pagtangis, kamong mga paraburat; paghibi, kamong mga parainom nin arak; raot na an mga ubas na gigibohon na bagong arak.

⁶ Sarong hukbo nin mga doron an nagsalakay sa satong daga; mapangyari sinda asin dai mabibilang; matarom an saindang mga ngipon arog kan sa leon.

⁷ Rinaot ninda an satong mga ubasan asin nginutanguta an satong mga kahoy na higera. Hinale ninda an mga ubak, sagkod na magputi an mga sanga.

⁸ Pagtangis kamo, arog sa sarong daraga na ipinagmomondo an kagadanan kan lalaking saiyang magigin agom.

⁹ Mayo na nin trigo o arak na idodolot sa Templo; nagmomondo an mga padi huli ta mayo sindang mga dolot para sa Kagurangnan.

¹⁰ Mayo nang kaomahan; an daga nagmomondo huli ta naraot an mga tanom na trigo, naalang an mga ubas, asin nagkaaralang an mga kahoy na oliba.

¹¹ Kamong mga paraoma, pagmondo; paghibi, kamong paraataman nin mga ubasan, huli ta an trigo, an sebada, asin an gabos na tinanom nawara na nanggad.

¹² Nagkaruluyos na an mga poon nin ubas saka an mga kahoy na higera; nagkaruluyos dangan nagkagaradan an gabos na kahoy na namumunga. An kaogmahan kan mga tawo nawara man.

¹³ Pagsulot nin sako asin pagtangis, kamong mga padi na naglilingkod duman sa altar! Paglaog kamo sa Templo asin pagmondo sa bilog na banggi! Mayo nang trigo o arak na ikakadolot sa saindong Dios.

¹⁴ Magpaluwas kamo nin mga pagboot para sa pag-ayuno; patiripona an gabos na tawo! Tipona an mga lider asin an mga taga Juda sa laog kan Templo nin Kagurangnan na saindong Dios dangan mag-agrangay kamo saiya!

¹⁵ Harani na an aldaw nin Kagurangnan, an aldaw na manraraot an Makakamhan. Mangirhat na gayo an aldaw na iyan!

¹⁶ Mayo kitang naginibo mantang rinaraot an satong mga tinanom. Mayo na nin kaogmahan sa Templo kan satong Dios.

¹⁷ An mga banhi nagkakagaradan sa alang na daga. Mayo na nin trigong sasarayon, kaya nagkararaot an mga harong-harong na mayo nin laog.

¹⁸ An mga baka nag-uungal sa kasakitan, huli ta para sainda mayo na an mga pasabsaban; an mga karnero nagtitios man.

¹⁹ Ako minaagrangay sa saimo Kagurangnan, huli ta nagkakaaralang an mga kahoy saka mga pasabsaban, na garo man sana sinurulo.

²⁰ Maski an mga lalaw na hayop nag-aagrangay sa saimo huli ta nagmarara an mga sapa, asin hinalon nin kalayo an mga pasabsaban kan kalangtadan.