Jeremias 7 - Marahay na Bareta Biblia

Naghulit si Jeremias sa Templo

^1-3 Pinaduman ako nin Kagurangnan sa trangkahan kan Templo saen nag-aaragi an mga taga Juda tanganing magsamba sa Kagurangnan. Tinaraman niya ako na magtindog duman saka ipahayag sainda an tataramon kan Kagurangnan nin mga hukbo, an Dios nin Israel: “Bagohon na nindo an saindong mga gawe saka gibo, asin tutugotan ko kamong mag-erok sa lugar na ini.

⁴ Dai kamo magtubod sa mga madayang tataramon na ini: ‘Ligtas kami digdi! Ini an Templo nin Kagurangnan, an Templo nin Kagurangnan, an Templo nin Kagurangnan!’

⁵ “Bagohon na nindo an saindong gawe saka pamumuhay. Magin matanos kamo sa pagtratar sa lambang saro.

⁶ Dai na nindo pag-apihon an mga dayuhan, mga ilo, saka mga babaeng balo. Mag-ontok na kamo sa paggadan kan mga mayong sala sa dagang ini. Mag-ontok na kamo sa pagsamba sa mga dios-dios, huli ta mapapahamak kamo.

⁷ Kun magbago kamo, papaerokon ko kamo digdi sa daga na itinao ko sa mga ginikanan nindo bilang pamana sagkod lamang.

⁸ “Hilinga, nananarig kamo sa madayang mga tataramon.

⁹ Naghahabon kamo, nanggagadan, nagdodorog sa bakong agom, nanunumpa sa bakong katotoohan, nagdodolot nin mga sakripisyo ki Baal, asin nagsasamba sa mga dios-dios na dai man nindo midbid.

¹⁰ Ginigibo nindo an mga bagay na ini na kinakaongisan ko, dangan minadigdi kamo saka minatindog sa atubangan ko, sa laog kan sakong Templo, dangan minasabi kamo, ‘Ligtas kami!’

¹¹ Naghohona daw kamo na an sakong Templo tagoan nin mga mahabon? Nahihiling ko an saindong ginigibo.

¹² Dumuman kamo sa Shilo, an lugar na enot kong pinili tanganing duman ako nindo sambahon, asin hilingon nindo an ginibo ko sa lugar na idto huli kan mga kasalan kan sakong banwaan na Israel.

¹³ Ginibo nindo an mga kasalan na ini, asin maski maigot ko kamong kinaolay, dai kamo naghinanyog. Habo kamong magsimbag kan apodon ko kamo.

¹⁴ Kaya an ginibo ko sa Shilo gigibohon ko man sa Templo kong ini, na sinasarigan nindo. Digdi sa lugar na ini na itinao ko saindo asin sa mga ginikanan nindo, gigibohon ko an parehong ginibo ko sa Shilo.

¹⁵ Papahaleon ko kamo sa atubangan ko arog kan pagpahale ko sa saindong mga kadugo, an banwaan nin Israel. Ako, an Kagurangnan, an nagtaram.”

An Pagsuway kan mga Tawo

¹⁶ Nagtaram an Kagurangnan, “Jeremias, dai mo ipagpamibi an mga tawong ini. Dai ka maghibi ni mamibi para sainda; dai ka makimaherak sako huli ta dai taka dadangogon.

¹⁷ Dai mo nahihiling an ginigibo ninda sa mga syudad nin Juda saka sa mga tinampo nin Jerusalem?

¹⁸ Nagkukua nin igatong an mga aki, nagmamakot nin kalayo an mga kalalakihan asin nagmamasa nin arina an kababaehan tanganing magluto nin mga tinapay para sa diosang inaapod nindang Reyna nin Langit. Inuula man ninda an mga dolot na inomon para sa ibang dios, tanganing kulogan an boot ko.

¹⁹ Alagad ako daw an nakukulogan ninda? Bako, kundi sinda man sana an nakukulogan asin nasosopgan.

²⁰ Kaya ako, an Kagurangnan Dios, an maula kan labi-labi kong kaanggotan sa Templong ini. Iuula ko iyan sa mga tawo saka sa mga hayop, asin maski sa mga kahoy saka sa mga tinanom. Malaad an sakong kaanggotan asin mayo nin siisay man na makakasigbo kaiyan.

²¹ “Banwaan ko, an ibang sakripisyo tinututong nindo sa altar, asin an iba itinutugot na kakanon nindo. Alagad ako, an Kagurangnan, nagsasabi na kakanon na sana nindo an gabos.

²² Kan iluwas ko sa Egipto an saindong mga ginikanan, dai ko ipinagboot sainda an manongod sa mga tinutong na atang o iba pang mga sakripisyo.

²³ Alagad ipinagboot ko sainda na kuyogon ako, tanganing ako an magin Dios ninda asin sinda an magin banwaan ko. Tinaraman ko sinda na mamuhay sosog sa ipinagboot ko, tanganing mapakarhay sinda.

²⁴ Alagad dai sinda nagkuyog; dai ninda ako dinangog. Ginibo ninda an lambang ipinapagibo sainda kan matagas saka maraot nindang puso. Orog sindang nagin maraot embes na nagin marahay.

²⁵ Magpoon kan maghale sa Egipto an saindong mga ginikanan sagkod ngunyan, padagos akong nagpadara saindo kan sakong mga sorogoon, an mga propeta.

²⁶ Alagad mayo nin nagdangog ni nagpahalaga kan sakong tataramon. Orog na nagin matagas an saindang payo asin mas rebelde pa kamo ki sa saindong mga ginikanan.

²⁷ “Kaya, Jeremias, sasabihon mo an gabos na tataramon na ini sa sakong banwaan, alagad dai sinda mahinanyog saimo. Aapodon mo sinda alagad dai sinda masimbag.

²⁸ Sasabihan mo sinda na an nasyon ninda dai minakuyog sako, an saindang Kagurangnan Dios, ni minaako nin pagsagwe. Mayo na sa sainda an katotoohan; dai na ngani ninda ini nasasambit.

Mga Maraot na Gawe sa Kapantayan nin Hinnom

²⁹ “Pagmondo kamo, mga taga Jerusalem; putolon nindo an saindong buhok asin tapokan sa harayo. Manambitan kamo sa ibabaw kan kabubuldan, huli ta ako, an Kagurangnan, naaanggot asin isinisikwal ko an sakong banwaan.

³⁰ “Guminibo nin karatan an mga taga Juda. An mga ladawan na kinakaongisan ko ibinugtak ninda sa sakong Templo asin dinigtaan ninda ini.

³¹ Sa Kapantayan nin Hinnom guminibo sinda nin altar na inapod Tofet, tanganing tutongon duman an saindang mga aking lalaki asin mga aking babae bilang sakripisyo. Dai ko ipinagboot sainda na gibohon ini—dai ngani ini naglaog sa sakong isip.

³² Kaya maabot an panahon na an lugar na iyan dai na aapodon na Tofet o Kapantayan nin Hinnom, kundi Kapantayan na Pinaggagadanan. Duman ninda ilulubong an mga tawo huli ta mayo na nin ibang paglulubongan sainda.

³³ An mga bangkay magigin pagkakan kan mga gamgam saka mga lalaw na hayop; mayo nin mabugaw sainda.

³⁴ An daga magigin sarong desyerto. Sa mga syudad nin Juda saka sa mga tinampo nin Jerusalem paoontokon ko an mga tingog nin kaogmahan asin kagayagayahan. Paoontokon ko an maogmang tingog nin mga bagong kasal.