Jeremias 51 - Marahay na Bareta Biblia

Dagdag na Padusa sa Babilonia

¹ Nagsasabi an Kagurangnan, “Mapadara ako nin sarong espiritu na maraot kan Babilonia asin kan mga nag-eerok diyan.

² Mapadara ako sa Babilonia nin mga dayuhan na garo doros na nagpapalid kan mga ata. Raraoton ninda an Babilonia saka babayaan an daga na mayo nin laog pagsalakay ninda hale sa gabos na direksyon, sa aldaw nin pagraot saiya.

³ An saiyang mga soldados dai nindo pabayaan na makapana o makasulot kan saindang gubing na panggera. Dai nindo pagpaligtason an mga hoben na lalaki; ronoton nanggad nindo an bilog na hukbo!

⁴ Malulugadan sinda saka magagadan sa mga tinampo kan saindang mga syudad.

⁵ Huli ta an saindang daga pano nin kasalan tumang sako, an Banal nin Israel, alagad ako, an Kagurangnan nin mga hukbo, dai nagpabaya sa Israel saka sa Juda.

⁶ Maghale kamo sa Babilonia! Iligtas nindo an sadiri nindong buhay! Dai nindo ipahamak an saindong sadiri nin huli kan kasalan kan Babilonia. Binabalos ko siya ngunyan asin pinapadusahan kan maninigo saiya.

⁷ An Babilonia nagin arog sa bulawan na kalis sa kamot ko, tanganing buraton an bilog na kinaban. Nag-inom kan saiyang arak an mga nasyon, kaya narungaw sinda.

⁸ Bigla an pagbagsak saka pagraot sa Babilonia! Magmondo kamo para saiya! Magkua kamo nin bolong para sa saiyang mga lugad, ta tibaad maomayan siya.

⁹ Nagsabi an mga dayuhan na nag-eerok duman, ‘Hiningowa mi na tabangan an Babilonia, alagad huri na an gabos. Pabayaan ta na siya saka magbalik na kita sa sadiri tang banwaan. Bilog na kosog na pinadusahan nin Dios an Babilonia asin rinumpag niya nanggad ini.’”

¹⁰ Nagsasabi an Kagurangnan, “Nagkukurahaw an sakong banwaan, ‘Ipinahiling nin Kagurangnan na tama kita. Magduman kita sa Sion saka ipahayag ta an ginibo nin Kagurangnan na satong Dios.’”

¹¹ Sinutsutan nin Kagurangnan an mga hade nin Media huli ta boot niyang raoton an Babilonia. Iyan an gigibohon niyang pagbalos huli sa pagkarumpag kan saiyang Templo. Nagboboot an nagsasalakay na mga opisyal, “Pataromon nindo an saindong mga bosog! Andama an saindong mga kalasag!

¹² Iitaas nindo an bandera sa pagsalakay sa mga kudal kan Babilon. Dugangan nindo an mga bantay! Padumana sinda sa lugar na saindang babantayan! Magbugtak nin mga lalaki na mahipa!” Ginibo nin Kagurangnan an sinabi niya manongod sa mga taga Babilonia.

¹³ An nasyon na idto igwa nin kadakul na salog saka kayamanan, alagad nag-abot na an saindang kataposan; sagkod na sana diyan an saindang buhay.

¹⁴ An Kagurangnan nin mga hukbo nagsumpa sa saimong sadiri na mapadara nin mga lalaki na arog kadakul sa mga doron, tanganing salakayon an Babilonia, asin makurahaw sinda nin kapangganahan.

Awit nin Pag-omaw sa Dios

¹⁵ An daga ginibo nin Kagurangnan huli sa saiyang kapangyarihan; huli sa saiyang kadonongan linalang niya an kinaban saka ibiniklad an kalangitan.

¹⁶ Sa pagboot niya minahagubohob an mga tubig sa ibabaw kan langit; pinapaitaas niya an mga alopoop hale sa mga poro kan daga. Pinapasilyab niya an kikilat sa tahaw kan uran, asin pinapaluwas niya an doros hale sa saiyang sarayan.

¹⁷ Sa atubang kaini, mamamatean nin tawo na siya sarong mangmang saka mayo nin pakaaram; mapapasopog an lambang panday na naggigibo nin mga ladawan, huli ta an mga dios-dios niyang ini bakong totoo saka mayo nin buhay.

¹⁸ Mayo sinda nin halaga asin dapat na isikwal; raraoton sinda pag-abot kan aldaw nin pagpadusa sainda.

¹⁹ An Dios ni Jacob bakong arog sainda; huli ta siya an naglalang kan gabos saka pinili niya an Israel na magin sadiri niyang banwaan. Kagurangnan nin mga hukbo an saiyang ngaran.

An Martilyo nin Kagurangnan

²⁰ Nagsasabi an Kagurangnan, “Babilonia, ika an sakong martilyo asin armas sa gera. Ginamit taka sa pagsakop kan mga nasyon saka mga kahadean,

²¹ sa pagronot kan mga kabayo saka mga lunad kaiyan, sa pagronot kan mga karwahe asin sa mga nagpapadalagan kaiyan,

²² sa paggadan kan mga lalaki saka mga babae, sa paggadan kan gurang saka hoben, sa paggadan kan mga aking lalaki saka mga aking babae,

²³ sa paggadan kan mga pastor asin kan saindang mga karnero, sa paggadan kan mga paraoma asin kan saindang katabang na mga baka. sa pagdaog kan mga pamayo asin kan mga haralangkaw na opisyal.”

An Padusa sa Babilonia

²⁴ Nagsasabi an Kagurangnan, “Papadusahan ko sa atubangan nindo an Babilonia saka an mga namamanwaan niya huli kan gabos na karatan na ginibo niya sa Sion.

²⁵ Babilonia, arog ka sa sarong bukid na nagraraot kan bilog na kinaban, alagad ako, an Kagurangnan, iyo an saimong kalaban. Tutupagon taka, papatagon, asin babayaan na abo na sana.

²⁶ Mayo nin gapo na makukua saimo tanganing gibohon na pasikadan o pundasyon. Magigin raot ka sagkod lamang. Ako, an Kagurangnan, an nagtaram.

²⁷ “Iitaas nindo an bandera sa pagsalakay! Patanogon nindo an trompeta tanganing madangog kan mga nasyon. Paandama an mga nasyon sa pakigera laban sa Babilonia! Taraman nindo an mga kahadean nin Ararat, Minni asin Askenaz na magsalakay laban saiya. Pumili kamo nin opisyal na mangengenot sa pagsalakay. Magpadara kamo nin mga kabayo na arog kadakul sa mga lokton.

²⁸ Paandama an mga nasyon sa pakigera laban sa Babilonia. Apoda nindo an mga hade nin Media, an saindang mga lider saka mga opisyal asin an mga hukbo kan mga banwaan na sakop ninda.

²⁹ Nagtatakig saka namimiripit sa kulog an daga, huli ta dai nagbabago an katuyohan nin Kagurangnan laban sa Babilonia, na gibohon ining sarong desyerto, saen mayo na nin mag-eerok.

³⁰ Nag-ontok na sa pakilaban an mga soldados nin Babilonia, asin dai na naghale sa saindang mga bantayan. Nawara na an kosog kan saindang boot asin nagin arog sinda sa mga babae. Garaba na an mga trangkahan kan syudad asin nagkakalayo na an mga harong.

³¹ Sunod-sunod na mga sugo an nagdadalagan pasiring sa hade nin Babilonia tanganing sabihan siya na nalaog na an saiyang syudad.

³² Nasakop na kan kaiwal an kabtang kan salog na binabalyohan, dangan sinulo ninda an mga bantayan. Nagkatararanta an mga soldados nin Babilonia.

³³ Dai na mahahaloy aanihon na sinda kan kaiwal saka titimaktimakan arog kan mga inani sa lugar na pinaggiginikan. Ako, an Kagurangnan nin mga hukbo, an Dios nin Israel, an nagtaram.”

³⁴ An Jerusalem binaak kan hade nin Babilonia dangan kinakan. Binayaan niya iyan na mayo nin laog arog sa sarong tapayan; arog siya sa sarong sawa na huminalon kaiyan. Kinua niya an saiyang nagustohan dangan itinapok an iba.

³⁵ Tugote nindong sabihan kan mga taga Sion, “Magbayad logod an Babilonia huli kan kadahasan na ginibo niya sato.’ Tugote nindong sabihan kan mga taga Jerusalem, “Magbayad logod an Babilonia huli kan tinios nyamo!”

Tatabangan nin Kagurangnan an Israel

³⁶ Kaya tinaraman nin Kagurangnan an mga taga Jerusalem, “Makikilaban ako para saindo; ibabalos ko kamo. Papamarahon ko an dagat asin burabod kan Babilonia.

³⁷ An nasyon na iyan magigin sarong tambak nin mga raot, na pag-eerokan nin mga lalaw na hayop. Siya magigin sarong tanawon na nakakatakot; mayo na nin mag-eerok duman, asin an gabos na makahiling saiya magkakamorongnan.

³⁸ An mga taga Babilonia mag-uungal arog sa mga leon saka mag-aagromod arog sa mga ogbon na leon.

³⁹ Mga unason daw sinda? Ipag-aandam ko sinda nin sarong bangkete, saka buburaton ko sinda asin papaogmahon. Makatorog sinda asin dai na nanggad magigimata.

⁴⁰ Dadarahon ko sinda pasiring sa bunoan arog sa mga kordero, sa kanding, asin sa mga lalaking karnero. Ako, an Kagurangnan, an nagtaram.”

An Aabotan kan Babilon

⁴¹ Nagsasabi an Kagurangnan manongod sa Babilon: “Nasakop na an syudad na pinag-oomaw kan bilog na kinaban! An Babilon nagin sarong tanawon na nakakatakot sa tahaw kan mga nasyon!

⁴² Nag-itaas an dagat saka nalantopan kan naghahagubohob na mga alon an Babilon.

⁴³ An mga banwa nagin sarong tanawon na nakakatakot. Garo sinda mga desyertong mayo nin tubig, na mayo nin siisay man na nag-eerok ni nag-aagi.

⁴⁴ Papadusahan ko si Bel, an dios-dios nin Babilonia, asin ipapabalik ko sa saiya an mga hinabon niya; dai na nanggad masamba saiya an mga nasyon. “Narumpag na an mga kudal kan Babilon.

⁴⁵ Mga taga Israel, maghale kamo diyan! Iligtas nindo an saindong sadiri sa makuri kong kaanggotan.

⁴⁶ Dai kamo mawaraan nin kosog nin boot ni matakot huli kan mga bareta na saindong nadadangog. Lambang taon ibang bareta an minaabot—bareta nin kadahasan sa daga asin nin pag-iriwal kan mga hade.

⁴⁷ Kaya maabot an panahon na papadusahan ko an mga dios-dios nin Babilonia. Mapapasopog an bilog na nasyon saka magagadan an gabos na namamanwaan niya.

⁴⁸ Dangan an langit saka an daga, asin an gabos na yaon diyan, mag-aawit sa kaogmahan sa panahon na an Babilonia bumagsak sa kamot kan mga magaba saiya hale sa amihan.

⁴⁹ An Babilonia iyo an nagin dahelan kan pagkagadan kan mga tawo sa bilog na kinaban, asin ngunyan marurumpag an Babilonia huli ta siya an nagin dahelan kan pagkagadan kan kadakul na mga Israelita. Ako, an Kagurangnan, an nagtaram.”

An Mensahe nin Dios Para sa mga Israelita sa Babilonia

⁵⁰ Nagsasabi an Kagurangnan sa saiyang banwaan na nasa Babilonia: “Kamong mga nakadulag sa kagadanan, humale na kamo diyan. Dai na kamo maghalat! Maski nasa harayo kamo, giromdoma nindo ako, na saindong Kagurangnan, saka giromdoma nindo an Jerusalem.

⁵¹ Nagsasabi kamo, ‘Napasopog kami huli ta nakadangog kami nin pagtuyatuya; namatean mi an pagkawara kan samong onra huli ta nagdatong an mga dayuhan saka naglaog sinda sa mga banal na lugar sa Templo.

⁵² Kaya ako nagsasabi na maabot na an panahon na papadusahan ko an mga dios-dios kan Babilon asin mag-aagrangay an mga nalugadan sa bilog na daga.

⁵³ Maski pa masakat kan Babilon an langit saka makatugdok duman nin makosog na bantayan, mapadara ako nin mga tawo tanganing raoton iyan. Ako, an Kagurangnan, an nagtaram.”

Iba pang Pagraot na Gigibohon sa Babilon

⁵⁴ Nagsasabi an Kagurangnan, “Hinanyoga nindo an tingog nin pagtangis sa Babilon, an tingog nin pagmondo huli sa pagkaraot kan daga.

⁵⁵ Huli ta ginagaba ko an Babilon saka pinapaalo an makosog na tingog niya. An mga hukbo naglalaog na garo naghahagubohob na mga alon saka nagsasalakay kasabay an maribok na kinurahaw.

⁵⁶ Nag-abot sinda tanganing raoton an Babilon; binihag an mga soldados kaini, saka binari an saindang mga pana. Ako an Dios na nagpapadusa kan karatan, asin papabayadon ko an Babilonia sosog sa maninigo saiya.

⁵⁷ Buburaton ko an saiyang mga pamayo— an madodonong na mga lalaki, an mga lider, asin an mga soldados. Makatorog sinda saka dai na nanggad magigimata. Ako, an hade, an nagtaram; Ako, an Kagurangnan nin mga hukbo.

⁵⁸ An mahiwas na kudal nin Babilonia papatagon, saka an halangkaw na mga trangkahan susuloon. Mayo nin halaga an gibo kan mga nasyon; magkakalayo an saindang pinagpagalan. Ako, an Kagurangnan nin mga hukbo, an nagtaram.”

Ipinadara sa Babilonia an Mensahe ni Jeremias

⁵⁹ An parapamahala kan mga kagamitan kan hukbo ni Hadeng Zedekias iyo si Seraias, na aking lalaki ni Nerias saka makoapo ni Maseias. Kan ikaapat na taon kan paghahade ni Zedekias sa Juda, nag-iba si Seraias sa hade kan magduman ini sa Babilonia. Itinao ko kaidto ki Seraias an nagkapirang mga pagboot.

⁶⁰ Isinurat ko sa sarong libro an gabos na kapahamakan na maabot sa Babilonia, sagkod kan iba pang mga bagay dapit sa Babilonia.

⁶¹ Tinaraman ko si Seraias, “Pag-abot mo sa Babilonia, basahon mo nanggad nin makosog sa mga tawo an gabos na nasusurat digdi.

⁶² Dangan mamibi ka, ‘Kagurangnan, sinabi mo na raraoton mo an lugar na ini, tanganing mayo na nin mag-erok digdi, tawo man o hayop, dangan magin sarong desyerto ini sagkod lamang.’

⁶³ Seraias, pakabasa mo kan librong ini, igakod mo sa sarong gapo, dangan itapok mo sa Salog nin Eufrates

⁶⁴ asin magsabi ka, ‘Iyo ini an mangyayari sa Babilonia—mairarom siya asin dai na maibabaw giraray huli kan kapahamakan na ipapadara saiya nin Kagurangnan.’” Digdi natatapos an mga tataramon ni Jeremias.