Jeremias 49 - Marahay na Bareta Biblia

An Padusa nin Kagurangnan sa Ammon

¹ Iyo ini an itinaram nin Kagurangnan manongod sa Ammon: “Haen an kalalakihan nin Israel? Mayo na daw nin makikilaban para sa saiyang daga? Tadaw ta pinabayaan nindang maagaw kan mga tawong nagsasamba ki Milcom an teritoryo kan tribu ni Gad saka mag-erok duman?

² Alagad maabot an panahon na an tingog nin gera ipapadangog ko sa mga tawong nag-eerok sa pangenot na syudad nin Rabba. An syudad na iyan marurumpag asin susuloon an mga baryo kaiyan. Dangan makukua giraray kan Israel an dagang inagaw saiya.

³ Magtangis kamo, mga taga Hesbon, huli ta rinaot na an Ai! Magmondo kamo, kababaehan nin Rabba! Magsulot kamo nin sako asin manambitan. Magdaralagan kamo sa karibongan. Bibihagon an saindong dios-dios na si Milcom, kaiba an saiyang mga padi saka mga prinsipe.

⁴ Kamong mga bakong maimbod na tawo, tadaw ta naghahambog kamo? Nanluluya na kamo. Tadaw ta nananarig kamo sa saindong kapangyarihan saka nagsasabi na mayo nin mangangahas na magsalakay saindo?

⁵ Papadarahan ko kamo nin katakotan hale sa gabos na direksyon. An lambang saro saindo madulag asin mayo na nin matipon giraray kan saindong mga soldados.

⁶ “Alagad pakalihis kaini, papauswagon ko giraray an Ammon. Ako, an Kagurangnan, an nagtaram.”

An Padusa nin Kagurangnan sa Edom

⁷ Iyo ini an itinaram kan Kagurangnan nin mga hukbo manongod sa Edom: “Mayo na daw nin sarong may marahay na kaisipan sa Edom? Dai na daw naghuhulit an mga parahatol duman? Napara na daw an saindang kadonongan?

⁸ Mga taga Dedan, magdulag saka magtago kamo. Roronoton ko an mga kapagarakian ni Esau huli ta nag-abot na an panahon tanganing padusahan ko sinda.

⁹ Kun an mga tawo nagguguno nin mga ubas, iwinawalat ninda sa mga balagon an nagkapirang ubas. Kun nananalakat an mga mahabon, kinukua sana ninda an saindang nagustohan.

¹⁰ Alagad hinubaan ko an mga kapagarakian ni Esau. Ihinayag ko an saindang mga pinagtatagoan, kaya dai na sinda makakatago maski saen. Ginadan an gabos na taga Edom. Mayo nin natada sainda maski saro.

¹¹ Walatan nindo sako an saindong mga aking ilo na sa ama, asin aatamanon ko sinda; tugoteng magsarig sako an saindong mga babaeng balo.

¹² “Kun an mga dai maninigong padusahan pinapainom sa kalis nin padusa, tadaw ta dai kamo dapat na padusahan? Dapat man kamong mag-inom sa kalis nin padusa!

¹³ Isinumpa ko na sa sakong sadiri na an syudad nin Bozra magigin sarong tanawon na nakakatakot asin sarong desyerto; pagsusubahan ini kan mga tawo saka gagamiton an ngaran kaini bilang sarong maldisyon. An gabos na baryo na nasa harani kaini magigin raot sagkod lamang. Ako, an Kagurangnan, an nagtaram.”

¹⁴ Nagsabi ako, “Edom, nag-abot sako an sarong mensahe hale sa Kagurangnan. Pinaduman niya sa mga nasyon an sarong sugo tanganing magsabi sainda na tiponon an saindang mga soldados saka mag-andam sa pagsalakay saimo.

¹⁵ Gigibohon ka nin Kagurangnan na sarong maluyang nasyon, na pagtutuyatuyaon kan mga tawo.

¹⁶ Dinaya ka kan saimong kapalangkawan. Mayo nin natatakot saimo, arog kan iniisip mo. Nag-eerok ka sa mga lungib sa kagapoan, na nasa kaitaasan kan bukid. Alagad maski nag-eerok ka sa halangkaw na lugar arog kan agila, ibababa ka nin Kagurangnan. An Kagurangnan an nagtaram.”

¹⁷ Nagtaram an Kagurangnan, “Makangirhat an karatan na maabot sa Edom kaya mamomongnan saka matitikbahan an lambang mag-agi duman.

¹⁸ Mangyayari sa Edom an siring kan nangyari sa Sodoma saka sa Gomorra kan rumpagon an mga ini saka an kataraed na mga banwa. Mayo na nanggad nin mag-eerok duman. Ako, an Kagurangnan, an nagtaram.

¹⁹ Arog sa sarong leon na minaluwas sa kadlagan kan Jordan asin minapasiring sa berdeng dagang pasabsaban, maabot ako dangan bigla kong papadulagon an mga taga Edom hale sa saindang syudad. Dangan an lider na pipilion ko iyo an mamamahala sa nasyon. Siisay an pwedeng ibaing sako? Siisay an mangangahas na lumaban sako? Siisay na pamayo an pwedeng sumalungat sako?

²⁰ Kaya hinanyoga an plano ko laban sa mga taga Edom, asin an boot kong gibohon sa mga taga Teman. Maski an mga saradit nindang aki guguyodon, asin magkakatirikbahan an lambang saro.

²¹ Sa ribok kan pagbagsak kan Edom, makonogkonog an bilog na daga, asin an kinurahaw huli sa takot madadangog sagkod sa Dagat na Pula.

²² An kaiwal masalakay sa Bozra, na garo agilang nag-iibabang nakaunat an mga pakpak. Sa aldaw na iyan, magkakatarakot an mga soldados nin Edom, arog sa pagkatakot nin sarong babae na madali nang mangaki.”

An Padusa nin Kagurangnan sa Damasco

²³ Iyo ini an itinaram nin Kagurangnan manongod sa Damasco: “Nahahadit saka napupurisaw an mga taga Hamat asin an mga taga Arpad huli ta nakadangog sinda nin maraot na bareta. Dai sinda napapaontok huli sa kahaditan, arog sinda sa dagat na maalon.

²⁴ Nanluluya na an mga taga Damasco; nagdurulag sinda huli sa takot. Nakukulogan sinda saka namomondo arog sa namamatean nin sarong babae na madali nang mangaki.

²⁵ Pinabayaan na an bantog na syudad na dati sarong maogmang syudad.

²⁶ Sa aldaw na iyan, an saiyang mga hoben na lalaki gagadanon sa mga tinampo kan syudad, asin mauubos an saiyang soldados.

²⁷ Susuloon ko an mga kudal kan Damasco saka tututongon ko an palasyo ni Hadeng Ben-hadad. Ako, an Kagurangnan nin mga hukbo, an nagtaram.”

An Padusa sa Tribu nin Kedar saka sa Syudad ni Hazor

²⁸ Iyo ini an itinaram nin Kagurangnan manongod sa tribu nin Kedar saka sa mga distrito na kontrolado ni Hazor, na nasakop ni Hadeng Nebukadnezzar nin Babilonia: “Salakayon nindo an Kedar! Gadanon nindo an mga tawo na nag-eerok sa sirangan!

²⁹ Samsamon nindo an saindang mga tolda saka mga hayop, an mga kurtina kan tolda asin an gabos na yaon sa laog kan mga iyan. Kuahon nindo an saindang mga kamelyo dangan sabihan nindo an mga tawo na, ‘An katakotan nasa palibot nindo!’

³⁰ Mga taga Hazor, ako, an Kagurangnan, minapatanid saindo na magdulag na kamo sa harayo saka magtago. May plano laban saindo si Hadeng Nebukadnezzar nin Babilonia, asin iyo ini an sinasabi niya,

³¹ ‘Magbangon kamo, dangan salakayon ta an sarong nasyon na namumuhay na matiwasay saka maginhawa. An saindang syudad mayo nin mga trangkahan saka mga barat asin yaon ini sa sarong siblag na lugar.’

³² “Kuahon nindo an saindang mga kamelyo saka an gabos nindang mga baka! Iwawarak ko sa gabos na direksyon an mga tawong iyan na nagpuputol kan saindang buhok. Dadarahan ko sinda nin kasakitan hale sa gabos na direksyon.

³³ An Hazor magigin sarong desyerto sagkod lamang, sarong lugar na pag-eerokan nin mga lalaw na ayam. Mayo na nin tawo na mag-eerok duman. Ako, an Kagurangnan, an nagtaram.”

An Padusa nin Kagurangnan sa Elam

³⁴ Nagtaram sako an Kagurangnan manongod sa Elam, kan magpoon sa paghahade si Zedekias sa Juda.

³⁵ Nagsabi an Kagurangnan nin mga hukbo, “Babarion ko an pana nin Elam, an armas na tanda kan saindang kosog.

³⁶ Hale sa gabos na direksyon, papahuyopon ko an mga doros pasiring sa Elam, dangan iwawarak ko an mga tawo duman, sagkod na mayo maski sarong nasyon na dai ninda pakikihimanwahan.

³⁷ Gigibohon kong matakot an mga taga Elam sa saindang mga kaiwal, na boot gumadan sainda. Gagadanon ko an mga taga Elam sa atubangan kan saindang mga kaiwal, na boot gumadan sainda. Gagadanon ko an mga taga Elam huli sa labi-labi kong kaanggotan. Mapadara ako nin mga hukbo laban sainda sagkod na mapara ko sinda.

³⁸ Gagadanon ko an saindang mga hade saka mga lider, dangan ibubugtak ko duman an sakong trono.

³⁹ Alagad maabot an panahon na papauswagon ko giraray an Elam. Ako, an Kagurangnan, an nagtaram.”