Jeremias 44 - Marahay na Bareta Biblia

An Mensahe nin Kagurangnan sa mga Israelita sa Egipto

¹ Nagtaram sako an Kagurangnan manongod sa gabos na Israelita na nag-eerok sa Egipto, sa mga syudad nin Migdol, Tafanhes, Memfis, saka sa habagat na parte kan daga.

² Nagtaram an Kagurangnan nin mga hukbo, an Dios nin Israel, “Nahiling nindo mismo an kasakitan na dinara ko sa Jerusalem asin sa gabos na syudad nin Juda. Sagkod ngunyan raot an mga syudad na iyan saka mayo nin nag-eerok duman

³ huli ta naggibo nin karatan an mga nag-eerok duman saka pinaanggot ninda ako. Nagdolot sinda nin insenso saka naglingkod sa mga dios-dios na dai ninda midbid, dangan dai man nindo midbid ni kan saindong mga ginikanan.

⁴ Padagos kong sinugo saindo an mga propeta na sakong mga sorogoon. Sinabihan ninda kamo na dai nindo paggibohon an makauuyam na bagay na ini na ikinakaongis ko.

⁵ Alagad dai kamo naghinanyog ni nagkuyog. Dai nindo tinalikodan an saindong maraot na gawe nin pagdolot sa mga dios-dios.

⁶ Kaya an sakong labi-labing kaanggotan inula ko sa mga banwa nin Juda asin sa mga tinampo nin Jerusalem, saka sinulo ko an mga ini. Naraot asin nagin sarong tanawon na nakakatakot ini sagkod ngunyan.

⁷ “Kaya ako, an Kagurangnan nin mga hukbo, an Dios nin Israel, minahapot ngunyan saindo kun tadaw ta ginigibo nindo an siring na karatan sa saindong mga sadiri. Boot nindong darahan nin kapahamakan an mga lalaki saka an mga babae, an mga aki saka an mga omboy, tanganing mayo nin matada sa saindong banwaan?

⁸ Tadaw ta pinapaanggot nindo ako sa pagsamba nindo sa mga ladawan asin pagsakripisyo sa mga dios-dios digdi sa Egipto, na saindong pinag-eerokan? Ginigibo daw nindo ini sa pagraot kan saindong mga sadiri, tanganing magin subahan kamo kan gabos na nasyon saka gamiton ninda an saindong ngaran bilang sarong maldisyon?

⁹ Nalingawan na daw nindo an gabos na karatan na ginibo kan saindong mga ginikanan, kan mga hade nin Juda asin kan saindang mga agom, an mga ginibo nindo asin kan saindong mga agom, sa mga banwa nin Juda saka sa mga tinampo nin Jerusalem?

¹⁰ Alagad sagkod ngunyan dai kamo nagpapakumbaba. Dai kamo nag-omaw sako ni namuhay sosog sa gabos na katogonan na itinao ko saindo asin sagkod sa saindong mga ginikanan.

¹¹ “Kaya ako, an Kagurangnan nin mga hukbo, an Dios nin Israel, an makalaban saindo saka matunaw kan bilog na Juda.

¹² Tutunawon ko an gabos na natada sa Juda na nagpirit nanggad na magduman saka mag-erok sa Egipto. Sinda gabos, dakula man o sadit, magagadan sa Egipto; magagadan sinda sa gera o sa gutom. Magigin sarong tanawon sinda na nakakatakot; pagsusubahan sinda kan mga tawo saka gagamiton an saindang ngaran bilang sarong maldisyon.

¹³ Papadusahan ko an mga nag-eerok sa Egipto, siring na pinadusahan ko an Jerusalem sa paagi nin gera, gutom, saka peste.

¹⁴ Mayo kan mga natada sa Juda na nag-eerok na sa Egipto an makakadulag o mabubuhay. Ni saro sa sainda dai makakabalik sa Juda, na boot nindang pag-erokan giraray. Mayo nin makakabalik pwera kan kadikit na makakadulag.”

¹⁵ Dangan an gabos na kalalakihan na nakaaram na an saindang mga agom nagtututong nin insenso sa mga dios-dios, asin an gabos na kababaehan na nagtitindog duman kaiba an mga Israelita na nag-eerok sa habagat na parte kan Egipto—na sarong dakulang katiriponan—nagsimbag sako,

¹⁶ “Dai mi hihinanyogon an sinasabi mo samo sa ngaran nin Kagurangnan.

¹⁷ Gigibohon mi an samong mga ipinanuga. Magtututong kami nin insenso sa reyna nin langit, saka mag-uula kami nin mga dolot na arak para saiya, arog kan dati nyamong ginigibo asin kan samong mga ginikanan, kan samong hade saka mga lider, sa mga banwa sa Juda asin sa mga tinampo nin Jerusalem. Kadakul kaidto kan samong pagkakan, mauswag kami asin mayo nin nag-abot samong kasakitan.

¹⁸ Alagad kan ontokon mi an pagtutong nin insenso sa reyna nin langit saka an pag-ula nin mga dolot na arak para saiya, nawaraan kami nin pagkakan, saka nagadan sa gera asin sa gutom an samong mga kahimanwa.”

¹⁹ Nagtaram pa an kababaehan, “Kan magluto kami nin tinapay na an porma arog kan reyna nin langit, kan nagtutong kami nin insenso saka nag-ula nin mga dolot na arak saiya, inoyonan kan samong mga agom an samong mga ginibo.”

²⁰ Dangan tinaraman ko an gabos na lalaki saka babae na nagsimbag nin siring kaini sako,

²¹ “Manongod sa insenso na tinutong nindo asin kan saindong mga ginikanan, kan saindong mga hade saka mga lider, asin kan mga tawo na nag-eerok sa daga, sa mga banwa nin Juda saka sa mga tinampo nin Jerusalem—naghohona daw kamo na dai iyan aram nin Kagurangnan o nalingawan na niya iyan?

²² Sa mismong aldaw na ini, raot an saindong daga saka mayo nin nag-eerok. Nagin iyan sarong tanawon na nakakatakot, asin an ngaran kaiyan ginagamit kan mga tawo bilang sarong maldisyon, huli ta dai na natagalan nin Kagurangnan an saindong karatan saka makauuyam na mga gibo.

²³ An karatan na ini ngunyan nag-abot saindo huli ta nagtutong kamo nin insenso sa mga dios-dios asin nagkasala tumang sa Kagurangnan sa paagi kan dai nindo pagkuyog kan gabos niyang pagboot.”

^24-25 Sinabihan ko an gabos na tawo, orog na an mga babae, kan itinaram nin Kagurangnan nin mga hukbo, an Dios nin Israel, sa mga taga Juda na nag-eerok na sa Egipto, “Nagsumpa kamo asin an saindong mga agom sa reyna nin langit. Nanuga kamo na magtututong nin insenso saka mag-uula nin mga dolot na arak para saiya, dangan inotob nindo an saindong mga panuga. Marahay iyan! Otoba nindo an saindong mga panuga! Giboha nindo an saindong mga ipinanuga!

²⁶ Alagad hinanyoga nindo ngunyan an sumpa na ginibo ko huli sa mapangyari kong ngaran, para sa saindo gabos na Israelita na yaon sa Egipto: Dai ko na itutugot sa kiisay man na ipagsumpa an sakong ngaran sa pagsasabi, ‘Minasumpa ako huli sa Makakamhan na Dios na buhay!’

²⁷ Babantayan ko nanggad na dai kamo mabuhay kundi magadan. Gabos kamo magagadan sa gera o sa peste, sagkod na mayo saindo nin matada.

²⁸ Alagad an nagkapira saindo makakadulag sa kagadanan saka mabalik sa Juda hale sa Egipto. Dangan maaaraman kan mga natadang ini kun kiisay na tataramon an magkakatotoo, an sako o an sainda.

²⁹ Ako, an Kagurangnan, matao saindo nin tanda na papadusahan ko kamo sa lugar na ini, asin magkakatotoo an panuga ko na darahan kamo nin kapahamakan.

³⁰ Itatao ko si Hadeng Hofra nin Egipto sa saiyang mga kaiwal na boot gumadan saiya, siring na itinao ko si Hadeng Zedekias nin Juda ki Hadeng Nebukadnezzar nin Babilonia, na saiyang kaiwal saka boot gumadan saiya.”