Jeremias 43 - Marahay na Bareta Biblia

Si Jeremias Dinara sa Egipto

¹ Pakatapos na sabihon ko sa mga tawo an gabos na tataramon nin Kagurangnan para sainda,

² nagsabi sako si Azarias na aking lalaki ni Osaias, si Johanan na aking lalaki ni Kareas, asin an gabos na mapalangkaw na lalaki, “Nagpuputik ka. Dai ka sinugo nin Kagurangnan na satong Dios tanganing sabihan kami na dai magduman saka mag-erok sa Egipto.

³ Si Baruc na aking lalaki ni Nerias iyo an nagpapasunod saimo laban samo, tanganing ikatao kami sa kamot kan mga taga Babilonia, asin tanganing magadan kami o madarang bihag sa Babilonia.”

⁴ Si Johanan, an gabos na opisyal kan hukbo, asin an gabos na tawo dai nagkuyog sa pagboot nin Kagurangnan na magdanay sa daga nin Juda.

⁵ Dangan dinara ni Johanan asin kan gabos na opisyal kan hukbo pasiring sa Egipto an gabos na natada sa Juda, kaiba an gabos na tawo na nagbalik sa Juda hale sa mga nasyon na pinagwarakan sainda:

⁶ mga lalaki, mga babae, mga aki, asin an mga aking babae kan hade. Dinara ninda an lambang tawo na ibinugtak ni Nebuzaradan, an pinakahalangkaw na opisyal, sa pamamahala ni Gedalias; kaiba ako asin si Baruc sa mga dinara ninda.

⁷ Dai ninda kinuyog an pagboot nin Kagurangnan asin nagduman sa Egipto sagkod sa syudad nin Tafanhes.

⁸ Tinaraman ako nin Kagurangnan duman sa Tafanhes,

⁹ “Kumua ka nin nagkapirang darakulang gapo saka ilubong mo sa palitada na nasa agihan palaog sa palasyo kan hade sa Tafanhes; gibohon mo iyan na nahihiling ka kan mga Israelita.

¹⁰ Dangan taraman mo sinda na ako, an Kagurangnan nin mga hukbo, an Dios nin Israel, iyo an madara sa lugar na ini sa sorogoon kong si Hadeng Nebukadnezzar nin Babilonia, asin ibubugtak niya an saiyang trono sa ibabaw kan mga gapo na ilinubong mo saka ibibiklad niya an saiyang tolda sa ibabaw kaiyan.

¹¹ Maabot si Nebukadnezzar saka dadaogon niya an Egipto. An mga tawong nakatalaan na magadan sa peste, magagadan sa peste; an mga nakatalaan na mabihag, mabibihag, asin an mga nakatalaan na magadan sa gera, magagadan sa gera.

¹² Susuloon ko an mga templo kan mga dios-dios nin Egipto, asin susuloon kan hade nin Babilonia o kaya sasamsamon an saindang mga dios-dios. Lilinigan niya an daga nin Egipto arog kan paglinig kan pastor sa saiyang gubing tanganing mahale an mga kuto. Pakatapos kaiyan, mapanggana siyang mahale sa Egipto.

¹³ Raraoton niya an mga banal na gapong monumento sa Heliopolis sa Egipto, dangan susuloon niya an mga templo kan mga dios-dios nin Egipto.”