Jeremias 42 - Marahay na Bareta Biblia

Hinagad kan mga Tawo na Ipamibi Sinda ni Jeremias

¹ Dangan nagdolok sako an gabos na lider kan hukbo, kaiba si Johanan na aking lalaki ni Kareas, si Azarias na aking lalaki ni Hesaias, asin an gabos na tawo magpoon sa kasaradayan sagkod sa haralangkaw

² saka nakiolay sinda sako, “Ipamibi mo kami sa Kagurangnan na saimong Dios. Mamibi ka para sa samo gabos na natada. Kadakul mi kaidto; alagad ngunyan kadikit na sana kaming natada, siring sa nahihiling mo.

³ Mamibi ka na ipahiling samo nin Kagurangnan na satong Dios an dalan na dapat nyamong lakawan asin kun ano an dapat nyamong gibohon.”

⁴ Nagsimbag ako, “Mamimibi ako sa Kagurangnan na satong Dios, sosog sa saindong kahagadan, dangan sasabihon ko saindo kun ano an simbag niya. Mayo ako nin itatago saindo.”

⁵ Dangan nagsabi sinda sako, “Magin logod totoo saka maimbod na saksi laban samo an Kagurangnan kun dai mi sunodon an gabos na pagboot na itatao saimo nin Kagurangnan na satong Dios para samo.

⁶ Mawilihan mi man iyan o dai, susunodon mi an Kagurangnan na satong Dios, na papamibian mo sosog sa samong kahagadan. Mapapakarhay kami kun susunodon mi siya.”

An Simbag nin Kagurangnan sa Pamibi ni Jeremias

⁷ Pakalihis nin sampolong aldaw nagtaram sako an Kagurangnan.

⁸ Kaya inapod ko si Johanan, an gabos na lider kan hukbo na kaiba niya, asin an iba pang mga tawo.

⁹ Tinaraman ko sinda, “An Kagurangnan, an Dios nin Israel, na pinadumanan nindo sako dara an saindong kahagadan, nagtaram nin siring,

¹⁰ ‘Kun magdanay kamo sa dagang ini, papatindogon ko kamo asin dai rurumpagon; itatanom ko kamo asin dai gagaboton. An karatan na dinara ko saindo nagin dahelan kan dakulang kamondoan ko.

¹¹ Dai kamo matakot sa hade nin Babilonia. Kaibahan nindo ako, asin ililigtas ko kamo sa saiyang kapangyarihan.

¹² Maheherakan ko kamo tanganing maherakan man kamo kan hade asin tugotan kamong magdanay sa saindong daga. Ako, an Kagurangnan, an nagtaram.’

^13-15 “Alagad kamo na natada sa Juda, dai kamo magsinutil sa Kagurangnan na saindong Dios. Dai kamo magsayuma na mag-erok sa dagang ini. Dai kamo magsabing, ‘Maduman kami saka maerok sa Egipto. Dai na kami duman makakahiling nin gera o makakadangog kan tanog nin trompeta, o magugutom.’ Kun sabihon nindo iyan, an Kagurangnan nin mga hukbo, an Dios nin Israel, nagsasabi, ‘Kun magduman nanggad kamo saka mag-erok sa Egipto,

¹⁶ aabotan kamo duman kan gera na saindong natatakotan, asin susunodon kamo kan gutom na hinahaditan nindo, saka magagadan kamo sa Egipto.

¹⁷ An gabos na tawo na boot nanggad na magduman saka mag-erok sa Egipto magagadan sa gera o sa gutom o sa peste. Mayo sainda nin matatada, maski saro dai makakadulag sa kasakitan na dadarahon ko sainda.’

¹⁸ “Nagtataram an Kagurangnan, an Dios nin Israel, ‘Kun paano ko inula an sakong labi-labing kaanggotan sa mga taga Jerusalem, siring man iuula ko an sakong kaanggotan sa saindo kun magduman kamo sa Egipto. Kamo magigin sarong nakakatakot na tanawon; susubahan kamo kan mga tawo asin gagamiton ninda an saindong ngaran bilang sarong maldisyon. Dai na nanggad nindo mahihiling an lugar na ini.’”

¹⁹ Nagpadagos ako sa pagtaram, “Sinasabihan kamo nin Kagurangnan, kamo na natada sa Juda, na dai magduman sa Egipto. Kaya pinapatanidan ko kamo ngunyan

²⁰ na magabat an ginigibo nindong karatan. Hinagad nindo sako na mamibi sa Kagurangnan na satong Dios para saindo, saka nanuga kamo na gigibohon nindo an gabos na pagboot niya.

²¹ Ipinahayag ko ini saindo ngunyan, alagad dai nindo kinukuyog an lambang itinaram ko na hale sa Kagurangnan na satong Dios.

²² Kaya giromdoma nindo ini: magagadan kamo sa gera o sa gutom o sa peste sa daga na boot nindong dumanan saka erokan.”