Jeremias 38 - Marahay na Bareta Biblia

Si Jeremias sa Mamarang Bubon

¹ Nadangog ni Sefatias na aking lalaki ni Mattan, ni Gedalias na aking lalaki ni Pasur, ni Jehucal na aking lalaki ni Selemias, asin ni Pasur na aking lalaki ni Malkias na sinasabihan ko an mga tawo

² na an Kagurangnan nagtaram nin siring, “Magagadan sa gera o sa gutom o sa peste an siisay man na padagos na mag-erok sa syudad na ini. Alagad an magluwas saka magsuko sa mga taga Babilonia mabubuhay; ikakaligtas niya an saiyang buhay.”

³ Sinabihan ko man sinda na an Kagurangnan nagtaram nin siring, “An syudad na ini itatao ko sa hukbo nin Babilonia dangan sasakopon ninda.”

⁴ Dangan nagduman sa hade an mga opisyal saka nagsabi, “Kaipuhan ipagadan an tawong ini. Pinapaluya niya an boot kan mga soldados asin kan mga tawo na natada sa syudad huli kan mga itinataram niya. Dai siya naghihingowa na tabangan an mga tawo; an boot sana niya iyo na mapahamak sinda.”

⁵ Nagsimbag si Hadeng Zedekias, “Giboha nindo an gusto nindo saiya; dai ko kamo pwedeng pugolan.”

⁶ Kaya kinua ninda ako saka itinunton sa bubon ni Prinsipe Malkias, na yaon sa patyo kan palasyo. Bakong tubig kundi laboy an laog kan bubon, asin nag-irarom ako sa laboy.

⁷ Nabaretaan ni Ebed-melec, na sarong eunuko na taga Etiopia asin nagtatrabaho sa palasyo, na ibinugtak ninda ako sa bubon. Kan panahon na iyan an hade yaon sa Trangkahan ni Benjamin.

⁸ Kaya nagduman si Ebed-melec saka nagsabi sa hade,

⁹ “Mahal na hade, sala an ginibo kan saimong mga opisyal. Ibinugtak ninda si Jeremias sa bubon; magagadan siya duman sa gutom, huli ta mayo na nin pagkakan sa syudad.”

¹⁰ Dangan pinagbotan kan hade si Ebed-melec na mag-iba nin tolong lalaki saka hawason ako sa bubon bago ako magadan.

¹¹ Kaya ipinag-iba ni Ebed-melec an tolong lalaki sa kwartong sarayan kan palasyo saka nagkua nin mga daan na gubing na itinao niya sako sa paagi nin mga lubid.

¹² Tinaraman niya ako na ibugtak sa yukyuk an mga gubing tanganing dai ako makulogan kan mga lubid. Ginibo ko ini,

¹³ asin binaton ninda ako sagkod na ikaluwas sa bubon. Pakatapos, nag-ontok ako sa patyo kan palasyo.

Si Zedekias Naghagad nin Hatol ki Jeremias

¹⁴ Ipinaapod ako ni Hadeng Zedekias asin kinaolay sa ikatolong agihan palaog kan Templo. Nagsabi siya, “Igwa ako nin ihahapot saimo, asin boot kong taraman mo ako kan bilog na katotoohan.”

¹⁵ Nagsimbag ako, “Kun taraman taka kan katotoohan, ipapagadan mo ako, asin kun hatolan taka, dai mo iyan pahahalagahan.”

¹⁶ Kaya hilom na nanuga sako si Hadeng Zedekias, “Minasumpa ako sa buhay na Dios, an Dios na nagtao sato nin buhay, na dai taka ipapagadan o itatao sa mga tawo na boot gumadan saimo.”

¹⁷ Dangan sinabihan ko si Zedekias na an Kagurangnan, an Dios nin mga hukbo, an Dios nin Israel, nagtaram nin siring, “Kun magsuko ka sa mga opisyal kan hade nin Babilonia, dai ka magagadan saka dai susuloon an syudad na ini. Ika asin an saimong pamilya makakaligtas.

¹⁸ Alagad kun dai ka magsuko, itatao an syudad na ini sa mga taga Babilonia. Susuloon ninda ini, asin dai ka makakadulag sainda.”

¹⁹ Nagsimbag an hade, “Natatakot ako sa mga Judio na nag-apil sa mga taga Babilonia. Tibaad itao ako sainda saka pasakitan.”

²⁰ Nagsabi ako, “Dai ka itatao sainda. Nakikimaherak ako na sunodon mo an mensahe nin Kagurangnan asin mapapakarhay ka saka dai magagadan.

²¹ Alagad ipinahiling sako nin Kagurangnan sa sarong bisyon an mangyayari kun dai ka magsuko.

²² Nahiling ko sa bisyon na ilinuluwas kan mga opisyal kan hade nin Babilonia an gabos na babaeng natada sa palasyo sa Juda. Hinanyoga an sinasabi ninda mantang naglalakaw sinda, ‘An Hade dinaya kan pinakaharani niyang mga katood, asin dinaog ninda siya. Ngunyan na nag-irarom sa laboy an saiyang mga bitis, binayaan siya kan saiyang mga katood.’”

²³ Nagsabi pa ako, “Dadarahon kan mga taga Babilonia an gabos mong agom saka aki; dai ka makakadulag sainda. Dadarahon ka bilang sarong bihag kan hade nin Babilonia, asin susuloon an syudad na ini.”

²⁴ Nagsimbag si Zedekias, “Dai mo ipagpaaram maski kiisay an satong pinag-olayan, asin dai mamumugtak sa pag-alaman an saimong buhay.

²⁵ Kun maaraman kan mga opisyal na nakipag-olay ako saimo, maarabot sinda tanganing hapoton ka kan pinag-olayan ta. Manunuga sinda na dai ka ninda ipapagadan kun isasabi mo sainda an gabos.

²⁶ Sabihan mo sinda na nakimaherak ka sako na dai ka na ibalik sa bilanggoan tanganing dai magadan duman.”

²⁷ Dangan nag-abot an gabos na opisyal saka hinapot ako. Sinabihan ko sinda kan ipinapataram sako kan hade. Mayo sinda nin naginibo, huli ta mayo nin siisay man na nakadangog kan pinag-olayan nyamo.

²⁸ Nag-ontok ako sa patyo kan palasyo sagkod kan aldaw na nasakop an Jerusalem.