Jeremias 37 - Marahay na Bareta Biblia

An Kahagadan ni Zedekias ki Jeremias

¹ Si Zedekias na aking lalaki ni Josias iyo an ibinugtak ni Hadeng Nebukadnezzar nin Babilonia na hade sa Juda, bilang kasalihid ni Jehoiakin na aking lalaki ni Jehoiakim.

² Alagad an mensahe nin Kagurangnan na itinao niya sako, dai kinuyog ni Zedekias, ni kan saiyang mga opisyal asin kan mga tawo.

³ Sinugo ni Hadeng Zedekias si Jehucal na aking lalaki ni Selemias, asin an padi na si Sofonias, na aking lalaki ni Maaseias, tanganing pakiolayan ako na ipamibi sa Kagurangnan na samong Dios an samong nasyon.

⁴ Dai pa ako kaidto ibinilanggo asin mayo nin kaolangan na naglakaw ako sa kaibahan kan mga tawo.

⁵ Pinapalibotan na an Jerusalem kan hukbo nin Babilonia kan madangog ninda na nagbalyo na sa pagdolonan nin Egipto an hukbo kan Egipto, kaya nag-atras sinda.

⁶ Tinaraman ako nin Kagurangnan, an Dios nin Israel,

⁷ na sabihan si Zedekias nin siring, “Nagdadangadang na an hukbo nin Egipto tanganing tabangan ka, alagad mabalik sinda sa Egipto.

⁸ Dangan maabot giraray an mga taga Babilonia. Sasalakayon ninda an syudad, sasakopon saka susuloon.

⁹ Ako, an Kagurangnan, nagpapatanid saimo na dai mo pagdayaon an saimong sadiri sa pag-isip na dai na mabalik an mga taga Babilonia, huli ta mabalik sinda.

¹⁰ Maski pa madaog mo an bilog na hukbo nin Babilonia, kun kaya mayo nin matada sainda kundi an mga nalugadan na nasa saindang mga tolda, mabangon an mga lalaking ini saka susuloon ninda an syudad.”

Dinakop saka Ibinilanggo si Jeremias

¹¹ Naghale sa Jerusalem an hukbo nin Babilonia huli ta nagdadangadang an hukbo nin Egipto.

¹² Kaya nagpoon akong maglakaw hale sa Jerusalem pasiring sa teritoryo nin Benjamin tanganing kuahon an sakong kahirasan sa samong rogaring.

¹³ Alagad kan mag-abot ako sa Trangkahan nin Benjamin, pinugol ako ni Irias, na aking lalaki ni Selemias saka makoapo ni Ananias; siya an pamayo kan mga bantay sa trangkahan na iyan. Nagsabi siya, “Nagdudulag ka tanganing mag-apil sa mga taga Babilonia!”

¹⁴ Nagsimbag ako, “Bakong totoo iyan! Dai ako nagdudulag.” Alagad dai ako dinangog ni Irias. Dinakop niya ako saka dinara sa mga opisyal.

¹⁵ Anggot sinda nin marahay sako; hinampak ninda ako saka ibinilanggo sa harong ni Jonatan, an sekretaryo, huli ta an harong niya ginibo nang sarong bilanggoan.

¹⁶ Ilinaog ninda ako sa sarong selda sa irarom kan daga asin haloy akong ibinilanggo duman.

¹⁷ Sarong aldaw ipinaapod ako ni Hadeng Zedekias, asin duman sa palasyo hilom na hinapot niya ako, “Igwa ka nin mensahe hale sa Kagurangnan?” Nagsimbag ako, “Igwa. Itatao ka sa hade nin Babilonia.”

¹⁸ Dangan naghapot ako, “Anong karatan an ginibo ko saimo, o sa saimong mga opisyal o sa mga tawong ini, kaya ipinabilanggo mo ako?

¹⁹ Ano an nangyari sa saimong mga propeta na nagsabi saimo na an hade nin Babilonia dai masalakay saimo ni kan nasyon na ini?

²⁰ Kaya ngunyan, mahal na hade, nakikimaherak ako na hinanyogon mo ako saka gibohon an hahagadon ko. Dai mo na ako ipagbalik sa harong ni Jonatan na sekretaryo. Magagadan ako duman.”

²¹ Kaya nagboot si Hadeng Zedekias na ibilanggo ako sa patyo kan palasyo. Nag-ontok ako duman, asin aroaldaw tinatawan ako nin sarong tinapay hale sa panaderia sagkod na naubos an gabos na tinapay sa syudad.