Jeremias 35 - Marahay na Bareta Biblia

Si Jeremias saka an mga Recabita

¹ Kan si Jehoiakim na aking lalaki ni Josias iyo an hade sa Juda, nagtaram sako an Kagurangnan,

² “Magduman ka sa mga kaayon kan kamaganakan ni Recab, asin kaolayon mo sinda. Dangan darahon mo sinda sa saro sa mga kwarto sa Templo saka dolotan mo sinda nin arak.”

³ Kaya kinua ko an bilog na kamaganakan ni Recab—si Jaazanias (na aking lalaki nin sarong Jeremias man an ngaran, na aking lalaki ni Habazzinias), asin an gabos niyang tugang na lalaki saka mga aking lalaki

⁴ dangan dinara ko sinda sa Templo. Ipinag-iba ko sinda sa kwarto kan mga disipulo ni Hanan na aking lalaki ni Igdalias. An kwartong ini nasa itaas kan kwarto ni Maaseias na aking lalaki ni Sallum, na sarong halangkaw na opisyal sa Templo, asin harani sa mga kwarto kan ibang mga opisyal.

⁵ Nagbugtak ako sa atubangan ninda nin pitsel na pano nin arak saka mga kalis dangan sinabihan ko sinda, “Uminom kamo.”

⁶ Alagad nagsimbag sinda, “Dai kami nag-iinom nin arak huli ta pinagbotan kami kan samong ginikanan na si Jonadab, na aking lalaki ni Recab na sagkod pa man dai kami mag-inom nin arak, siring man an samong mga kapagarakian.

⁷ Sinabihan man niya kami na dai magtugdok nin mga harong, mag-oma asin dai magtanom sa ubasan o magbakal kaini. Pinagbotan niya kami na danay kaming mag-erok sa mga tolda, tanganing magpadagos kami sa pag-erok sa dagang ini saen nag-eerok kami arog sa mga dayuhan.

⁸ Sinunod nyamo an gabos na pagboot ni Jonadab. Dai nanggad kami nag-inom nin arak, siring man an samong mga agom, mga aking lalaki saka mga aking babae.

^9-10 Dai kami nagtugdok nin mga harong—nag-erok kami sa mga tolda—asin mayo kaming sadiring mga ubasan, oma, asin banhi. Sinunod nanggad nyamo an lambang pagboot samo ni Jonadab na samong ginikanan.

¹¹ Alagad kan sakopon ni Hadeng Nebukadnezzar an dagang ini, nagduman kami sa Jerusalem tanganing makalikay sa mga hukbo kan Babilonia saka Siria. Ini an dahelan kun tadaw ta nag-eerok kami sa Jerusalem.”

^12-13 Dangan nagtaram sako an Kagurangnan nin mga hukbo, an Dios nin Israel, na magduman sa mga taga Juda saka sa mga taga Jerusalem dangan magsabi nin siring, “Ako, an Kagurangnan, naghahapot saindo kun tadaw ta habo kamong maghinanyog sako asin magkuyog kan katukdoan ko.

¹⁴ An mga kapagarakian ni Jonadab nagkuyog kan saiyang pagboot na dai mag-inom nin arak, asin sagkod ngunyan mayo sainda nin nag-iinom nin arak. Danay akong nagtaram saindo, alagad dai kamo nagkuyog sako.

¹⁵ Nagpadagos ako sa pagpadara saindo kan gabos kong sorogoon, an mga propeta, asin tinaraman ninda kamo na talikodan na an saindong mga maraot na gawe saka gibohon an tama. Pinatanidan ninda kamo na dai magsamba saka maglingkod sa mga dios-dios, tanganing padagos kamong mag-erok sa daga na itinao ko saindo asin sa saindong mga ginikanan. Alagad habo kamong maghinanyog sako; dai nindo ako pinahalagahan.

¹⁶ An mga kapagarakian ni Jonadab nagkuyog kan pagboot na itinao sainda kan ginikanan ninda, alagad kamo dai nagkuyog sako.

¹⁷ Kaya ako, an Kagurangnan nin mga hukbo, an Dios nin Israel, mapadara saindo, mga taga Juda saka mga taga Jerusalem, kan gabos na karatan na ipinanuga ko. Gigibohon ko ini huli ta habo kamong maghinanyog kan magtaram ako saindo, asin huli ta habo kamong magsimbag kan apodon ko kamo.”

¹⁸ Dangan sinabihan ko an mga Recabita na an Kagurangnan nin mga hukbo, an Dios nin Israel, nagtaram, “Kinuyog nindo an pagboot na itinao saindo kan ginikanan nindong si Jonadab; sinunod nindo an gabos niyang katukdoan, saka ginibo nindo an gabos na ipinagboot niya saindo.

¹⁹ Kaya ako, an Kagurangnan nin mga hukbo, an Dios nin Israel, nanunuga na si Jonadab na aking lalaki ni Recab danay na magkakaigwa nin sarong lalaking kapagarakian na maglilingkod sako.”