Jeremias 34 - Marahay na Bareta Biblia

Sarong Mensahe para ki Zedekias

¹ Nagtaram sako an Kagurangnan kan an Jerusalem saka an mga kataraed na banwa kaini sinasalakay ni Hadeng Nebukadnezzar nin Babilonia asin kan saiyang hukbo, katabang an gabos na nasyon saka rasa na sakop niya.

² Tinaraman ako nin Kagurangnan, an Dios nin Israel, na magduman ki Hadeng Zedekias nin Juda saka taraman ini nin siring, “Ako, an Kagurangnan, an matao kan syudad na ini sa hade nin Babilonia, asin susuloon niya an syudad.

³ Dai ka makakadulag; dadakopon ka asin itatao saiya. Makakahampang mo siya asin makakaolay, dangan maduman ka sa Babilonia.

⁴ Zedekias, hinanyoga an sinasabi ko manongod saimo. Dai ka magagadan sa gera.

⁵ Matoninong kang magagadan asin magtututong sinda nin insenso para saimo arog kan pagtutong ninda nin insenso kan ilubong ninda an saimong mga ginikanan, an mga hadeng nagkaerenot saimo. Magmomondo sinda saka magsasabi, ‘Gadan na an samong hade!’ Ako, an Kagurangnan, an nagtaram.”

⁶ Dangan itinao ko an mensaheng ini ki Hadeng Zedekias sa Jerusalem

⁷ mantang sinasalakay kan hukbo kan hade nin Babilonia an Jerusalem, an Lakis asin an Azeka. Iyo na sana ini an natada sa mga pinapusog na syudad sa Juda.

Madayang Pagtratar sa mga Oripon

⁸ Nagkaoroyon si Hadeng Zedekias asin an mga taga Jerusalem na talingkasan

⁹ an mga oripon nindang Hebreyo, lalaki man o babae, tanganing mayo nin magkaigwang oripon na kapwa Israelita.

¹⁰ Nagkaoroyon man an gabos na tawo saka an saindang mga lider na talingkasan an saindang mga oripon asin na dai na nanggad ninda ooriponon an mga ini. Pinatalingkas ninda an mga ini,

¹¹ alagad pakalihis nin halipot na panahon nagbago an saindang isip. Kinua giraray ninda an mga dating oripon saka pirit nindang inoripon.

¹² Dangan tinaraman ako nin Kagurangnan,

¹³ an Dios nin Israel, na magsabi sa mga tawo, “Nakipagtipan ako sa saindong mga ginikanan kan iligtas ko sinda sa Egipto asin haleon sa kaoripnan. Tinaraman ko sinda na sa

¹⁴ lambang ikapitong taon tatalingkasan ninda an siisay man na Hebreyong oripon na naglingkod sainda sa laog nin anom na taon. Alagad dai nagkuyog an saindong mga ginikanan ni naghinanyog kan sinabi ko sainda.

¹⁵ Dai pa sana nahahaloy nagsolsol kamo asin ginibo nindo an matanos sa sakong panhiling sa paagi kan pagpahayag na tatalingkasan nindo an saindong mga oripon na Israelita. Naggibo kamo nin tipan sa atubangan ko sa laog kan Templo na pinagsasambahan sako.

¹⁶ Alagad nagbago an saindong isip asin pinagbasang-basang nindo an sakong ngaran kan kuahon giraray nindo an mga oripon na tinalingkasan nindo sosog sa kamawotan nindo; pinirit nindo sinda na magin oripon giraray.

¹⁷ Kaya ako, an Kagurangnan, nagsasabi na nagsuway kamo sako; dai nindo itinao sa kapwa nindo Israelita an saindang katalingkasan. Huli kaini, itatao ko saindo an katalingkasan: an katalingkasan na magadan sa gera, peste, asin gutom. Gigibohon ko kamong sarong katakotan sa gabos na nasyon sa kinaban.

^18-19 An mga opisyal nin Juda saka nin Jerusalem, kaiba an mga opisyal sa palasyo, an mga padi saka an gabos na lider, nakipagtipan sako sa paagi nin paglakaw sa tahaw kan torilyong baka na binaak ninda. Alagad linapas ninda an tipan asin dai ninda inotob an pagsusundon na inoyonan nindang gibohon. Kaya gigibohon ko sa mga tawong ini an ginibo ninda sa torilyong baka.

²⁰ Itatao ko sinda sa mga kaiwal ninda, na boot gumadan sainda, asin an bangkay ninda kakakanon kan mga gamgam asin kan mga lalaw na hayop.

²¹ Itatao ko man si Hadeng Zedekias nin Juda saka an saiyang mga opisyal sa mga boot gumadan sainda. Itatao ko sinda sa hukbo kan Babilonia, na nag-ontok na sa pagsalakay saindo.

²² Itatao ko an pagboot asin mabalik sinda sa syudad na ini. Sasalakayon ninda ini, sasakopon, saka susuloon. Iaarog ko sa desyerto an mga banwa nin Juda na mayo nin nag-eerok. Ako, an Kagurangnan, an nagtaram.”