Jeremias 32 - Marahay na Bareta Biblia

Nagbakal nin Oma si Jeremias

¹ Nagtaram sako an Kagurangnan kan ikasampolong taon kan paghahade sa Juda ni Zedekias, na iyo an ikadyes y otsong taon kan paghahade ni Nebukadnezzar sa Babilonia.

² Kan panahon na idto, sinasalakay an Jerusalem kan hukbo kan hade nin Babilonia, asin nabibilanggo ako sa patyo kan palasyo kan hade nin Juda.

³ Ibinilanggo ako duman ni Hadeng Zedekias huli kan pagpahayag ko na an Kagurangnan nagtaram nin siring, “Ipapasakop ko an syudad na ini sa hade nin Babilonia

⁴ asin dai makakadulag si Hadeng Zedekias. Itatao siya sa hade nin Babilonia; makakahampang niya ini asin makakaolay.

⁵ Dadarahon si Zedekias sa Babilonia saka magdadanay duman sagkod na magiromdoman ko siya. Maski pa labanan niya an mga taga Babilonia, dai siya manggagana. Ako, an Kagurangnan, an nagtaram.”

⁶ Tinaraman ako nin Kagurangnan

⁷ na si Hanamel, na aking lalaki kan tiyo kong si Sallum, madolok sako tanganing ipabakal an saiyang oma sa Anatot, sa teritoryo ni Benjamin, huli ta ako an pinakaharani niyang kadugo asin igwa nin deretso na magbakal kan daga.

⁸ Siring kan itinaram nin Kagurangnan, nagduman sako sa patyo si Hanamel, dangan kinaolay ako na bakalon an oma niya. Kaya naaraman ko na totoong nagtaram sako an Kagurangnan.

⁹ Binakal ko ki Hanamel an oma saka tinimbang ko saiya an kwarta; an oma nag-abot sa kantidad na dyes y syeteng pedaso nin plata.

¹⁰ Pinirmahan ko an kasuratan nin kabaklan saka sinelyohan; nagkua ako nin mga saksi asin an kwarta tinimbang ko.

¹¹ Dangan kinua ko an mga kasuratan nin kabaklan—an selyadong kopya na nasusuratan kan kontrata saka mga kondisyon kaini, asin an bukas na kopya—

¹² saka itinao ko ki Baruc, na aking lalaki ni Nerias saka makoapo ni Maseias. Itinao ko saiya an mga kopya sa atubangan ni Hanamel, sa atubangan kan mga saksi na nagpirma kan kasuratan, asin kan mga Judio na nagtuturukaw sa patyo.

¹³ Sa atubangan ninda gabos, tinaraman ko si Baruc,

¹⁴ “Pinagbotan ka nin Kagurangnan nin mga hukbo, an Dios nin Israel, na kuahon an mga kasuratan na ini, an selyadong kasuratan nin kabaklan saka an bukas na kopya, asin ibugtak mo an mga iyan sa sarong tapayan, tanganing maingatan iyan sa halawig na panahon.

¹⁵ Nagtaram an Kagurangnan nin mga hukbo, an Dios nin Israel, na magkakaigwa giraray nin pagbabarakalan nin mga harong, oma, asin ubasan sa dagang ini.”

An Pamibi ni Jeremias

¹⁶ Kan ikatao ko na ki Baruc an kasuratan nin kabaklan, namibi ako,

¹⁷ “O Kagurangnan Dios, ginibo mo an kalangitan asin an daga huli kan dakula mong kapangyarihan saka kosog; mayo nin dipisil para saimo.

¹⁸ Nagpahiling ka nin danay na pagkamoot sa rinibong tawo, alagad pinadusahan mo an mga aki huli kan kasalan kan saindang mga magurang. O dakula asin mapangyaring Dios, na an ngaran Kagurangnan nin mga hukbo,

¹⁹ dakula an saimong katuyohan asin makangangalas an saimong mga gibo. Nahihiling mo an ginigibo kan tawo, asin binabalosan mo sinda sosog sa saindang gibo.

²⁰ Naggibo ka nin mga tanda saka ngangalasan sa daga nin Egipto, asin sagkod ngunyan padagos kang naggigibo kaiyan sa Israel saka sa ibang mga nasyon, kaya midbid ka na ngunyan maski saen.

²¹ Sa paagi nin mga tanda saka ngangalasan na natakotan kan samong mga kaiwal, ginamit mo an saimong kapangyarihan saka kosog tanganing iluwas sa Egipto an saimong banwaan.

²² Itinao mo sainda an mayaman saka matubang na dagang ini, siring kan ipinanuga mo sa saindang mga ginikanan.

²³ Alagad kan mag-abot sinda asin masakop an dagang ini, dai ninda kinuyog an mga pagboot mo, ni namuhay sosog sa saimong katukdoan. Dai ninda ginibo an arin man sa mga pagboot mo, kaya pinadarahan mo sinda kan gabos na kasakitan na ini.

²⁴ “An mga taga Babilonia nagtambak na nin daga sa palibot kan syudad tanganing masakop ini, asin nagsasalakay na sinda. An syudad mahuhulog sa saindang kamot huli kan gera, gutom, asin peste. Nagkakatotoo na an gabos mong itinaram.

²⁵ Alagad ika an nagsugo sako, o Kagurangnan Dios, na bakalon an oma sa atubangan kan mga saksi, maski an syudad na ini nakatalaan nang sakopon kan mga taga Babilonia.”

²⁶ Dangan tinaraman ako nin Kagurangnan,

²⁷ “Ako an Kagurangnan, an Dios kan gabos na tawo; mayo nin dipisil para sako.

²⁸ Itatao ko an syudad na ini ki Hadeng Nebukadnezzar nin Babilonia saka sa saiyang hukbo; sasakopon ninda ini

²⁹ saka susuloon. Susuloon ninda ini kaiba an mga harong saen pinaanggot ako kan mga tawo huli kan pagtutong ninda nin insenso para ki Baal sa saindang mga atop, saka pag-ula nin arak na dolot sa mga dios-dios.

³⁰ Magpoon sa kapinonan pinauyam na ako saka pinaanggot kan mga taga Israel asin taga Juda huli kan saindang mga gibo.

³¹ Pinaanggot ako nin labi-labi kan mga tawo sa syudad na ini magpoon kan ini itinugdok. Raraoton ko ini

³² huli kan gabos na karatan na ginibo kan mga taga Juda saka mga taga Jerusalem kaiba an saindang mga hade saka mga lider, an saindang mga padi saka mga propeta.

³³ Tinalikodan ninda ako asin maski padagos ko sindang tinutukdoan, dai sinda naghinanyog saka nag-adal.

³⁴ Ibinugtak pa ninda an saindang makauuyam na mga dios-dios sa Templo na itinugdok para sa pagsamba sako, asin dinigtaan ninda iyan.

³⁵ Naggibo sinda nin mga altar ki Baal sa Kapantayan nin Hinnom, tanganing idolot sa dios-dios na si Molec an saindang mga aking lalaki saka babae. Dai ako nagboot ni nag-isip na ipagibo sainda an siring na bagay asin papagkasalaon an mga taga Juda.”

An Panugang Paglaom

³⁶ Nagtaram sako an Kagurangnan, an Dios nin Israel, “Jeremias, sinasabi kan mga tawo na an syudad na ini mahuhulog sa kamot kan hade nin Babilonia huli sa gera, gutom, asin peste. Hinanyoga ngunyan an iba pang sasabihon ko.

³⁷ Titiponon ko an mga tawo hale sa gabos na nasyon na pinagwarakan ko sainda kan ako maongis saka maanggot sainda. Ibabalik ko sinda sa lugar na ini asin matiwasay na pag-eerokan digdi.

³⁸ Dangan sinda an magigin banwaan ko, asin ako an magigin Dios ninda.

³⁹ Itatao ko sainda an sarong katuyohan sa buhay, an omawon ako sa gabos na panahon para sa sadiri nindang karahayan asin sa karahayan kan saindang mga kapagarakian.

⁴⁰ Magibo ako sainda nin sarong tipan na mayo nin kataposan. Dai ako maontok sa paggibo nin mga marahay na bagay para sa sainda. Gigibohon ko na matakot sinda sako sa bilog nindang puso tanganing dai na ninda ako pagtalikodan.

⁴¹ Ikakaogma ko an paggibo nin marahay na mga bagay para sainda, saka papagdanayon ko sindang pusog sa dagang ini.

⁴² “Siring kan pagpadara ko kan dakulang kasakitan na ini sa banwaan na ini, papadarahan ko man sinda kan marahay na mga bagay na ipinanuga ko sainda.

⁴³ Sinasabi kan mga tawo na an dagang ini makakaarog sa sarong desyerto na mayo nin tawo o hayop na nag-eerok, asin itatao ini sa mga taga Babilonia. Alagad an mga oma babakalon giraray sa dagang ini.

⁴⁴ Babakalon iyan kan mga tawo, asin sa atubangan nin mga saksi, pipirmahan saka seselyohan an kasuratan nin pagpabakal. Mangyayari ini sa teritoryo ni Benjamin, sa mga baryo sa palibot kan Jerusalem, sa mga banwa nin Juda, sa mga banwa sa mabulod na daga, sa pamitisan kan mga bulod, asin sa parteng habagat nin Juda. An mga tawo ibabalik ko sa saindang daga. Ako, an Kagurangnan, an nagtaram.”