Jeremias 31 - Marahay na Bareta Biblia

An Pagbalik kan Israel

¹ Nagtataram an Kagurangnan, “Maabot an panahon na ako an magigin Dios kan gabos na tribu sa Israel, asin sinda an magigin banwaan ko.

² An mga tawong nakaligtas sa kagadanan naherakan ko sa desyerto. Kan an Israel maghanap nin kapahingaloan,

³ nagpahiling ako sainda hale sa harayo. Banwaan nin Israel, danay ko kamong namotan, kaya padagos kong ipinapahiling saindo an danay kong pagkamoot.

⁴ Papatindogon ko giraray kamo. Magtutugtog giraray kamo kan saindong mga tamborin asin maogma kamong magsasayaw.

⁵ Matanom giraray kamo nin mga ubas sa kabubuldan nin Samaria, asin an mga nagtanom kaiyan makakan kan mga bunga kaiyan.

⁶ Maabot nanggad an panahon na makurahaw an mga bantay hale sa kabubuldan nin Efraim, ‘Magtukad kita sa Sion, pasiring sa Kagurangnan na satong Dios.’”

⁷ Nagsasabi an Kagurangnan, “Mag-awit kamo sa kaogmahan para sa Israel, an pinakadakula sa mga nasyon. Mag-awit kamo kan awit nin pag-omaw, ‘Ilinigtas nin Kagurangnan an saiyang banwaan, an mga natada sa Israel.’

⁸ Dadarahon ko sinda hale sa amihan saka titiponon hale sa mga poro kan kinaban. Magigin kaiba ninda an mga buta saka mga pilay, an mga bados asin an mangangaki na. Mabalik sinda na sarong dakulang nasyon.

⁹ Nagtatangis na mabalik an sakong banwaan; namimibi mantang sakong pinapangenotan. Dadarahon ko sinda sa mga sapang may tubig, sa sarong patag na agihan tanganing dai sinda madapa. Huli ta saro akong ama para ki Israel asin si Efraim an aki kong matua.”

¹⁰ Nagtataram an Kagurangnan, “Mga nasyon, maghinanyog kamo sako saka ipahayag nindo an sakong mga tataramon sa hararayong baybayon. Iwinarak ko an sakong banwaan, alagad titiponon ko sinda saka babantayan arog kan pagbantay kan pastor sa saiyang mga karnero.

¹¹ Tinubos ko an banwaan nin Israel asin ilinigtas sa kamot kan sarong mapangyaring nasyon.

¹² Maabot sinda dangan maawit nin makosog sa ibabaw kan Bukid nin Sion; mag-oogma sinda huli kan sakong mga regalo— mga regalong trigo, arak, saka lana nin oliba, mga regalong karnero saka baka. Makakaarog sinda sa tatamnan na may patubig; dai na nanggad sinda magtitios.

¹³ Dangan masayaw sa kaogmahan an mga daraga, asin an kalalakihan, hoben saka gurang, mag-oogma. Rarangahon ko sinda asin an saindang kamondoan magigin kaogmahan, an saindang kasakitan magigin kagayagayahan.

¹⁴ Babasogon ko nin masiram na kakanon an mga padi, asin makokontento an sakong banwaan kan sakong karahayan. Ako, an Kagurangnan, an nagtaram.”

An Pagkaherak nin Kagurangnan sa Israel

¹⁵ Nagsasabi an Kagurangnan, “Nadangog sa Rama an sarong tingog— an pagtangis asin pag-agrangay na makosog. Tinatangisan ni Rachel an mga aki niya; habo siyang magparanga, huli ta gadan na sinda.

¹⁶ Ontoka an saimong pagtangis saka pahida an saimong mga luha. Huli ta babalosan an pagpagal mo para sa saimong mga aki; mabalik sinda hale sa daga kan mga kaiwal.

¹⁷ May paglaom para saimo sa maabot na panahon; an saimong mga aki mapuli sa saindong harong. Ako, an Kagurangnan, an nagtaram.

¹⁸ “Nadangog ko an banwaan nin Israel na mamondong nagsasabi, ‘Kagurangnan, arog kami sa sarong hayop na dai pa minagaro, alagad tinukdoan mo kami na magkuyog. Ibalik mo kami; andam kami na magbalik saimo, an Kagurangnan na samong Dios.

¹⁹ Nagtalikod kami saimo, alagad boot ming magbalik ngunyan. Pakatapos na padusahan mo kami, idinuko mi an samong mga payo huli sa kamondoan. Nasopog kami saka nawaraan nin onra huli ta nagkasala kami mantang kami mga hoben pa.’

²⁰ “Israel, ika an aki kong namomotan, an aki na sakong nawiwilihan. Kun nasasambit ko an saimong ngaran, ginigiromdom taka na may pagkamoot. Hinihidaw taka kaya maheherakan taka.

²¹ Magbugtak ka nin mga tanda sa saimong agihan; hanapa giraray an dalan na saimong linakawan. Magbalik ka, banwaan nin Israel, magbalik ka sa mga syudad na saimong binayaan.

²² Sagkod nuarin ka magduduwa-duwa, banwaan na bakong maimbod? Naglalang ako nin bagong bagay sa ibabaw nin kinaban, siring kabago sa babae na iyo na an nag-iingat sa lalaki.”

An Maabot na Kauswagan kan Banwaan nin Dios

²³ An Kagurangnan nin mga hukbo, an Dios nin Israel, nagtataram, “Kun ibalik ko na an banwaan sa saindang daga, masabi giraray sinda sa daga nin Juda asin sa saiyang mga banwa, ‘Bendisyonan logod nin Kagurangnan an sagradong bulod nin Jerusalem, an banal na lugar na saiyang pinag-eerokan.’

²⁴ An mga tawo mag-eerok sa Juda asin sa gabos niyang banwa, siring man an mga paraoma asin an mga pastor kaiba an saindang mga karnero.

²⁵ Papakosogon ko an mga napapagal saka pakakakanon ko an mga nanluluya huli sa gutom.

²⁶ Kaya masabi an siisay man, ‘Nagkatorog ako dangan maginhawang nagbangon.’

²⁷ “Ako, an Kagurangnan, an nagsasabi na maabot an panahon na papanoon ko nin tawo saka hayop an daga nin Israel asin Juda.

²⁸ Kun paano ako nagin maingat kan sinda sakong gaboton, gabaon, pabagsakon, raoton saka pahaleon, maingat ko man sindang itatanom saka papatindogon.

²⁹ Pag-abot kan panahon na iyan, dai na masabi an mga tawo, ‘Nagkakan nin maalsom na ubas an mga ama, alagad an mga aki an pinagngilohan.

³⁰ Embes kaiyan, kun siisay an magkakan kan maalsom na ubas, iyo an mangingilohan; an sarong tawo magagadan huli kan sadiri niyang kasalan.”

³¹ Nagtataram an Kagurangnan, “Maabot an panahon na magibo ako nin bagong tipan sa mga taga Israel saka sa mga taga Juda.

³² Bako iyan arog kan tipan na ginibo ko sa saindang mga ginikanan kan kabiton ko sinda saka giyahan paluwas sa Egipto. Maski ako nagin arog sa sarong agom na lalaki sa sainda, dai ninda kinuyog an tipan na idto.

³³ Siring kaini an gigibohon kong tipan sa mga taga Israel: Ibubugtak ko an sakong togon sa saindang isip saka isusurat ko iyan sa saindang puso. Ako an magigin Dios ninda, asin sinda an magigin banwaan ko.

³⁴ Dai na ninda kaipuhan na tukdoan an lambang saro tanganing mamidbidan an Kagurangnan, huli ta gabos sinda, magpoon sa kasaradayan sagkod sa haralangkaw na tawo, makakamidbid sako. Papatawadon ko an saindang mga kasalan asin dai ko na gigiromdomon an mga gibo nindang maraot. Ako, an Kagurangnan, an nagtaram.”

³⁵ An Kagurangnan iyo an nagtatao kan aldaw, bilang ilaw kun aldaw, an bulan asin an mga bitoon tanganing maliwanag kun banggi. Pinapahiro niya an dagat kaya naghahagubohob an mga alon; Kagurangnan nin mga hukbo an saiyang ngaran.

³⁶ Nanunuga siya na sagkod na nagdadanay an siring na orden, magdadanay man an Israel bilang sarong nasyon.

³⁷ Kun masukol na an kalangitan saka masiyasat an pundasyon kan daga, dangan pa sana niya isisikwal an banwaan nin Israel, huli kan gabos nindang ginibo. An Kagurangnan an nagtaram.

³⁸ “Maabot an panahon,” an sabi nin Kagurangnan, “na itutugdok giraray an Jerusalem bilang syudad ko, magpoon sa Tore nin Hananel sagkod sa Kantong Trangkahan.

³⁹ An pagdolonan kaiyan makakasagkod sa bulod nin Gareb saka maliko pasiring sa Goa.

⁴⁰ Magigin banal sako an bilog na kapantayan na pinaglulubongan kan mga gadan saka pinagtatapokan kan mga ati, asin an gabos na oma sa itaas kan Sapa nin Kidron sagkod sa Trangkahan nin Kabayo sa parteng sirangan. Dai na nanggad magagaba o masasakop nin siisay man an syudad na ini.”