Jeremias 30 - Marahay na Bareta Biblia

An mga Panuga nin Kagurangnan sa saiyang Banwaan

¹ An Kagurangnan, an Dios nin Israel,

² nagtaram sako, “Isurat mo sa sarong libro an gabos na sinabi ko saimo,

³ huli ta nagdadangadang na an aldaw na ibabalik ko an banwaan ko, an Israel asin an Juda, saka an saindang kayamanan. Ibabalik ko sinda sa daga na itinao ko sa mga ginikanan ninda, asin masasadirihan ninda giraray iyan. Ako, an Kagurangnan, an nagtaram.”

⁴ An Kagurangnan nagtataram sa mga taga Israel saka sa mga taga Juda:

⁵ “Nadangog ko an kurahaw nin pagkataranta, an kurahaw nin pagkatakot asin bakong katoninongan.

⁶ Pag-ontok ngunyan saka paghorophorop! Mangangaki daw an sarong lalaki? Tadaw ta kapot kan lambang lalaki an saiyang tulak arog sa sarong babae na nangangaki? Tadaw ta nanlolongsi an lambang saro?

⁷ Makatatakot an aldaw na iyan. Mayo iyan nin kaarog; panahon iyan nin kahaditan para sa sakong banwaan, alagad makakaligtas sinda diyan.”

⁸ Nagsasabi an Kagurangnan nin mga hukbo, “Pag-abot kan aldaw na iyan, babarion ko an sakal na yaon sa saindang loong asin hahaleon ko an saindang kadena; dai na sinda magigin oripon kan mga dayuhan.

⁹ Embes kaiyan, maglilingkod sinda sako, an Kagurangnan na saindang Dios, saka sa sarong kapagarakian ni David, na patutukawon ko bilang hade.

¹⁰ “Banwaan ko, dai kamo matakot; mga taga Israel, dai kamo makubhanan. Ililigtas ko kamo hale sa harayong daga na iyan, hale sa daga na pinagbilanggoan saindo. Mapuli kamo saka mamumuhay sa katoninongan; magigin matiwasay kamo, asin mayong mapatakot saindo.

¹¹ Masasakaibahan nindo ako tanganing iligtas kamo. Roronoton ko an gabos na nasyon na pinagwarakan ko saindo, alagad dai ko kamo pupuhoon. Dai ako matugot na dai kamo mapadusahan; alagad kun padusahan ko na kamo, gigibohon ko an matanos para saindo! Ako, an Kagurangnan, an nagtaram.”

¹² An Kagurangnan nagtataram sa saiyang banwaan, Dai mabobolong an saindong kulog, saka hararom an saindong lugad.

¹³ Mayo nin mag-aataman saindo, mayo na nin bolong para sa saindong lugad mayo na nin paglaom na maomayan pa kamo.

¹⁴ Liningawan na kamo kan saindong ilusyon; dai na sinda nagmamakulog saindo. Huli ta tinawan ko kamo kan hampak nin sarong kaiwal, kan padusa nin sarong mayong herak na kalaban, huli ta dakula an saindong karatan asin kadakul kan saindong kasalan.

¹⁵ Tadaw ta nag-aagrangay kamo manongod kan saindong kulog? Dai na mabobolong iyan. Pinadusahan ko kamo nin siring kaini huli ta dakula an saindong karatan asin kadakul kan saindong ginibong kasalan.

¹⁶ Alagad ngunyan, hahalonon an gabos na naghahalon saindo, asin an gabos nindong kaiwal dadarahon bilang mga bihag. An gabos na nag-aapi saindo aapihon asin an gabos na nananamsam saindo sasamsaman.

¹⁷ Itatao ko giraray saindo an marahay na hawak; bobolongon ko an mga lugad nindo maski nagsasabi an mga kaiwal nindo, ‘Isinikwal an Sion; mayo nin siisay man na nagmamakulog saiya!’ Ako, an Kagurangnan, an nagtaram.”

¹⁸ Nagtataram an Kagurangnan, “Ibabalik ko an sakong banwaan sa saindang daga saka maheherakan ko an lambang pamilya; papatindogon giraray an Jerusalem asin an palasyo ibabalik sa dating lugar.

¹⁹ An mga nag-eerok duman mag-aawit nin pag-omaw; magkukurahaw sinda sa kaogmahan. Huli kan sakong bendisyon madakul sinda sa bilang; an sakong bendisyon matao sainda nin kaomawan.

²⁰ Ibabalik ko an dating kosog kan nasyon, saka gigibohon ko ining pusog giraray; papadusahan ko an gabos na nag-aapi sainda.

^21-22 An saindang pamayo magikan sa sadiri nindang nasyon, an saindang prinsipe maghahale sa sainda man sana. Madolok siya sako kun alokon ko siya, huli ta siisay an mangangahas na dumolok na dai inalok? Sinda magigin banwaan ko, asin ako an magigin Dios ninda. Ako, an Kagurangnan, an nagtaram.”

^23-24 An kaanggotan nin Kagurangnan sarong bagyo, sarong makosog na doros na naghahagubohob sa ibabaw kan mga payo kan mga tampalasan. Dai iyan matatapos sagkod na dai niya nagigibo an gabos na boot niyang gibohon. Malinaw na masasabotan iyan kan saiyang banwaan sa maabot na aldaw.