Jeremias 28 - Marahay na Bareta Biblia

Si Jeremias asin an Propeta na si Ananias

¹ Kan taon man sanang idto, kan ikalimang bulan kan ikaapat na taon nin paghahade ni Zedekias sa Juda, kinaolay ako ni Ananias na aking lalaki ni Azzur, sarong propeta na taga Gibeon. Nasa Templo kami kaidto. Sa atubangan kan mga padi asin kan mga tawo sinabihan niya ako

² na an Kagurangnan nin mga hukbo, an Dios nin Israel, nagtaram nin siring, “Hinale ko na an kapangyarihan kan hade nin Babilonia.

³ Sa laog nin duwang taon ibabalik ko sa lugar na ini an gabos na kayamanan kan Templo na dinara ni Hadeng Nebukadnezzar sa Babilonia.

⁴ Ibabalik ko man digdi si Jehoiakin na aking lalaki ni Jehoiakim, na hade nin Juda, asin an gabos na taga Juda na ipinatapok sa Babilonia. Hahaleon ko na an kapangyarihan kan hade nin Babilonia. Ako, an Kagurangnan, an nagtaram.”

⁵ Dangan sa atubangan kan mga padi saka kan mga tawo na nagtitirindog sa laog kan Templo, sinabihan ko si Ananias,

⁶ “Amen! Gibohon logod iyan nin Kagurangnan; magkatotoo logod an propesiya mo asin ikabalik sa lugar na ini hale sa Babilonia an gabos na kayamanan kan templo asin an gabos na tawong dinara duman bilang mga bihag.

⁷ Alagad hinanyoga an sasabihon ko saimo saka sa mga tawo.

⁸ An mga propetang naenot sato nagpropesiya na magkakaigwa nin gera, gutom, saka peste sa dakul na nasyon asin sa darakulang kahadean.

⁹ Manongod sa propetang nagpapahayag nin katoninongan, masasabing totoong sugo siya nin Kagurangnan kun nagkakatotoo an saiyang pahayag.”

¹⁰ Dangan kinua ni Ananias an sakal sa loong ko, binari,

¹¹ saka nagsabi sa atubangan kan mga tawo: “An Kagurangnan nagtaram na arog kaini an gigibohon niyang pagbari sa sakal na ibinugtak ni Hadeng Nebukadnezzar sa loong kan gabos na nasyon; gigibohon niya ini sa laog nin duwang taon.” Pakasabi niya kaini, naghale ako.

¹² Pakalihis nin kadikit na panahon, tinaraman ako nin Kagurangnan na

¹³ magduman saka magsabi ki Ananias: “Nagtaram an Kagurangnan na kaya mong barion an kahoy na sakal alagad riribayan niya iyan nin lansang na sakal.

¹⁴ Nagtaram an Kagurangnan nin mga hukbo, an Dios nin Israel, na bubugtakan niya nin lansang na sakal an gabos na nasyon na ini asin maglilingkod sinda ki Hadeng Nebukadnezzar nin Babilonia. Sinabi nin Kagurangnan na papaglingkodon niya ki Nebukadnezzar maski an mga lalaw na hayop.”

¹⁵ Sinabihan ko pa si Ananias, “Paghinanyog, Ananias! Dai ka sinugo nin Kagurangnan alagad pinapatubod mo an mga tawong ini sa sarong kaputikan.

¹⁶ Kaya nagsasabi mismo an Kagurangnan na hahaleon ka niya sa ibabaw kan daga. Sa taon na ini magagadan ka huli ta tinaraman mo an mga tawo na magrebelde sa Kagurangnan.”

¹⁷ Dangan nagadan si Ananias kan ikapitong bulan kan taon na idto.