Jeremias 26 - Marahay na Bareta Biblia

Idinimanda si Jeremias

¹ Kan pagpoon kan paghahade sa Juda ni Jehoiakim na aking lalaki ni Josias,

² tinaraman ako nin Kagurangnan, “Tumindog ka sa patyo kan Templo saka ipahayag mo an gabos na tataramon na ipinagboot kong sabihon mo sa mga tawong hale pa sa mga banwa nin Juda na nagduruman sa Templo tanganing magsamba. Dai mo pagpakulangan maski sarong tataramon.

³ Tibaad maghinanyog an mga tawo saka talikodan ninda an maraot na pamumuhay. Kun gibohon ninda iyan, babagohon ko an sakong desisyon manongod sa paggaba na inisip kong dadarahon sainda huli kan gabos na karatan na ginigibo ninda.”

⁴ Tinaraman ako nin Kagurangnan na isabi sa mga tawo an siring, “Ako, an Kagurangnan, nagtaram na dapat kamong magkuyog sako sa paagi nin pag-otob kan katukdoan na itinao ko saindo,

⁵ asin sa paagi nin paghinanyog sa mga tataramon kan sakong mga sorogoon, an mga propeta, na danay kong ipinapadara sa saindo. Dai nanggad nindo kinuyog an mga itinaram ninda.

⁶ Kun padagos kamong dai magkuyog, gigibohon ko sa Templong ini an ginibo ko sa Shilo, dangan gagamiton kan gabos na nasyon sa kinaban an ngaran kan syudad na ini bilang sarong maldisyon.”

⁷ Nagtaram ako kan mga bagay na ini sa laog kan Templo asin nadangog ako kan mga padi, kan mga propeta, saka kan gabos na tawo.

⁸ Pakatapos kong magtaram kan gabos na ipinagboot sako nin Kagurangnan na itaram ko sa mga tawo, tolos akong pinugol ninda saka kinurahawan, “Dapat kang magadan!

⁹ Tadaw ta nagsabi ka sa ngaran nin Kagurangnan na an Templong ini makakaarog sa Shilo, na raraoton an syudad na ini saka mayo nin mag-eerok digdi?” Dangan pinalibotan ako kan mga tawo.

¹⁰ Kan maaraman kan mga lider nin Juda an nangyari, hidali sindang nagduman sa Templo hale sa palasyo asin nagtukaw sinda sa may Bagong Trangkahan.

¹¹ Dangan tinaraman kan mga padi asin kan mga propeta an mga lider saka mga tawo, “Maninigong hatolan nin kagadanan an tawong ini huli ta nagtaram siya laban sa satong syudad siring sa nadangog nindo.”

¹² Dangan nagtaram ako, “Sinugo ako nin Kagurangnan na magpahayag kan gabos na nadangog nindong sinabi ko laban sa Templong ini saka laban sa syudad na ini.

¹³ Dapat nindong bagohon an saindong mga gawe asin mga gibo, dangan kuyogon nindo an Kagurangnan na saindong Dios. Kun gibohon nindo iyan, babagohon niya an saiyang desisyon manongod sa paggaba na itinaram niyang dadarahon saindo.

¹⁴ Alagad nasa irarom ako kan kapangyarihan nindo; giboha nindo an pinaghohona nindong marahay saka tama.

¹⁵ Aramon nanggad nindo na kun gadanon nindo ako, kamo asin an mga nag-eerok sa syudad na ini magkakasala nin paggadan sa sarong tawo na mayo nin sala, huli ta an Kagurangnan an nagsugo sako tanganing itao saindo an patanid na ini.”

¹⁶ Dangan tinaraman kan mga lider asin kan mga tawo an mga padi saka an mga propeta, “An lalaking ini dai maninigong padusahan nin kagadanan huli ta nagtaram siya sato sa ngaran nin Kagurangnan na satong Dios.”

¹⁷ Pakatapos kaiyan, nagtindog an nagkapira sa kamagurangan saka nagsabi sa mga tawo na nagkatiripon,

¹⁸ “Kan si Ezekias iyo an hade nin Juda, tinaraman ni Mikas na taga Moreset an gabos na tawo na nagtaram an Kagurangnan nin mga hukbo, ‘An Sion aaradohon arog sa sarong oma; an Jerusalem magigin sarong tambak nin mga raot, asin an bulod na natitindogan kan Templo magigin sarong kadlagan.’

¹⁹ Dai ginadan ni Hadeng Ezekias asin kan mga taga Juda si Mikas. Embes kaiyan, natakot sa Kagurangnan si Ezekias saka hiningowa niyang mawilihan siya nin Kagurangnan. Binago nin Kagurangnan an saiyang desisyon manongod sa kasakitan na sinabi niyang dadarahon niya sainda. Ngunyan, kita man sana an naghahagad nin kasakitan para sa satong mga sadiri.” (

²⁰ Igwa kaidto nin saro pang lalaki, si Urias na aking lalaki ni Semaias na taga Kiriat-Jearim, na nagpropesiya laban sa syudad na ini asin sa nasyon, arog kan ginibo ni Jeremias.

²¹ Kan an itinaram ni Urias maaraman ni Hadeng Jehoiakim asin kan mga soldados saka mga opisyal kaini, hiningowa kan hade na gadanon si Urias. Alagad naaraman ini ni Urias; kaya sa katakotan, nagdulag siya saka nagtago sa Egipto.

²² Alagad sinugo ni Hadeng Jehoiakim si Elnatan na aking lalaki ni Acbor asin an nagkapirang lalaki tanganing kuahon si Urias sa Egipto.

²³ Kinua kan mga ini si Urias saka ibinalik ki Hadeng Jehoiakim, na guminadan saiya saka nagtapok kan saiyang bangkay sa lulubngan kan mga ordinaryong tawo.)

²⁴ Alagad huli ta tinabangan ako ni Ahikam na aking lalaki ni Safan, dai ako ikinatao sa mga tawo tanganing gadanon.