Jeremias 22 - Marahay na Bareta Biblia

An Mensahe ni Jeremias sa Lahi kan mga Hade nin Juda

¹ Tinaraman ako nin Kagurangnan na magduman sa palasyo kan hade nin Juda,

² asin ipinasabi niya sa hade, sa mga opisyal kaini, saka sa mga taga Jerusalem na maghinanyog kaining tataramon nin Kagurangnan:

³ “Ako, an Kagurangnan, nagboboot saindo na gibohon nindo an matanos asin tama. Iligtas nindo sa madaya an dinadaya. Dai nindo paggibohan nin maraot o pag-apihon an mga dayuhan, mga ilo, asin an mga babaeng balo; dai nindo paggadanon an mga tawong mayong sala sa lugar na ini.

⁴ Kun kukuyogon nindo an pagboot ko, magpapadagos bilang mga hade an mga kapagarakian ni David. Dangan magpapadagos sinda, kaiba an saindang mga opisyal saka nasasakopan, sa paglaog sa nga trangkahan kan palasyong ini, na nakalunad sa mga karwahe saka mga kabayo.

⁵ Alagad kun dai kamo maghinanyog kan sakong mga tataramon, minasumpa ako saindo na mararaot an palasyong ini. Ako, an Kagurangnan, an nagtaram.

⁶ “Para sako, an palasyo nin Juda arog kagayon kan daga nin Gilead asin kan Bukid nin Lebanon; alagad gigibohon ko iyan na sarong mamondong lugar na mayo nin nag-eerok.

⁷ Mapadara ako nin mga tawong magaba kaiyan; an lambang saro sainda may darang patok. Puputolon ninda an magagayon na hariging sedro kaiyan saka itatapok sa kalayo.

⁸ “Dangan maghihinarapotan an mga dayuhan na mag-aagi digdi, ‘Tadaw ta arog kaiyan an ginibo nin Kagurangnan sa dakulang syudad na ini?’

⁹ Dangan masirimbag sinda, ‘Huli ta tinalikodan ninda an tipan nin Kagurangnan na saindang Dios, asin sinamba ninda saka pinaglingkodan an ibang mga dios.’”

An Mensahe ni Jeremias Manongod ki Joahaz

¹⁰ Banwaan nin Juda, dai nindo pagtangisan si Hadeng Josias; dai nindo ipagmondo an saiyang pagkagadan. Alagad pagtangisan nindo nin mapait si Joahaz, na saiyang aking lalaki; dinara ninda siya sa harayo, dai na nanggad siya makakabalik, asin dai na nanggad niya mahihiling an daga na saiyang namundagan.

¹¹ An Kagurangnan nagsasabi manongod ki Joahaz na aking lalaki ni Josias, na nagsalihid sa saiyang ama bilang hade nin Juda, “Naghale siya sa lugar na ini asin dai na siya mabalik.

¹² Magagadan siya sa daga na dinarahan ninda saiya, asin dai na niya mahihiling giraray an dagang ini.”

An Mensahe ni Jeremias Manongod ki Jehoiakim

¹³ Herak man sa tawo na nagtutugdok kan saiyang harong huli sa inhustisya asin nagpapadakula kaiyan huli sa pandadaya; pinapatrabaho niya an saiyang mga kahimanwa na mayo nin bayad, dai niya itinatao an tandan ninda.

¹⁴ Herak man sa tawo na nagsasabi, “Matugdok ako nin sarong dakulang harong na may mga mahiwas na kwarto sa itaas.” Kaya binugtakan niya nin mga bintana an saiyang harong, linanoban nin sedro, asin pinintahan nin pula.

¹⁵ Naghohona ka daw na saro ka nang hade huli ta nakapatugdok ka nin harong na sedro, na mas magayon ki sa ginibo nin iba? Nakamit kan saimong ama an marahay na buhay. Nagdanay siyang matanos asin onesto, kaya nag-uswag siya sa gabos niyang gibo.

¹⁶ Itinao niya sa mga dukha an hustisya, kaya marahay gabos an nagin bunga kaiyan. Iyan an kahulogan kan pakamidbid sa Kagurangnan.

¹⁷ Alagad mayo ka nin ibang hinihiling kundi an saimong sadiri; ginagadan mo an mayo nin sala asin madahas mong inaapi an saimong banwaan. An Kagurangnan an nagtaram.

¹⁸ Kaya nagsasabi an Kagurangnan manongod ki Jehoiakim na aking lalaki ni Josias, na hade nin Juda: “Mayo nin magmomondo sa saiyang pagkagadan ni masabi, ‘O sakong tugang. O sakong tugang! Mayo nin magtatangis para saiya ni makurahaw, ‘Sakong kagurangnan! Sakong hade!’

¹⁹ Arog kan paglubong sa asno an gigibohon na paglubong saiya; guguyodon siya sa harayo saka itatapok sa luwas kan mga trangkahan nin Jerusalem.”

An Mensahe ni Jeremias Manongod sa Aabotan nin Jerusalem

²⁰ Mga taga Jerusalem, dumuman kamo sa Lebanon saka magkurahaw, dumuman kamo sa daga nin Basan saka magtangis; mag-apod kamo hale sa kabukidan nin Moab, huli ta nadaog na an gabos nindong kaalyansa.

²¹ Nagtaram saindo an Kagurangnan kan mauswag pa an saindong pamumuhay, alagad habo kamong maghinanyog. Iyo na iyan an gibo nindo poon kan kamo aki pa; dai nanggad kamo nagkuyog sa Kagurangnan.

²² Ipapalid kan doros an saindong mga lider, bibihagon an saindong mga kaalyansa, mawawaraan nin onra an saindong syudad asin mapapasopog, huli kan gabos na karatan na saindong ginibo.

²³ Matiwasay kamong nagpapahingalo sa tahaw kan mga sedrong hale sa Lebanon; alagad makaheherak kamo kun abotan na kamo nin kulog, kulog na arog kan namamatean nin sarong babaeng nangangaki.

An Paghukom nin Dios ki Jehoiakin

²⁴ Tinaraman nin Kagurangnan si Hadeng Jehoiakin, na aking lalaki ni Hadeng Jehoiakim nin Juda, “Mantang ako an buhay na Dios, maski pa ika an sakong singsing na pangmarka, huhugkoton taka sa sakong muro.

²⁵ Itatao taka sa mga tawong kinakatakotan mo, sa mga tawong boot gumadan saimo. Itatao taka ki Hadeng Nebukadnezzar nin Babilonia asin sa saiyang mga soldados.

²⁶ Itatapok taka asin an saimong ina sa sarong nasyon na dai nindo namundagan, asin duman kamo magagadan.

²⁷ Magmamawot ka na mahiling giraray an banwaan na ini, alagad dai ka na makakabalik.”

²⁸ Nagsabi ako, “Arog daw sa sarong pasang tapayan, na isinikwal, itinapok saka dai nagustohan nin siisay man si Hadeng Jehoiakin? Tadaw ta itinapok siya saka an saiyang mga aki sa sarong daga na dai ninda aram?”

²⁹ O daga, daga, daga! Hinanyoga kun ano an itinaram nin Kagurangnan:

³⁰ “An tawong ini kinondenar tanganing mawaraan nin mga aki, tanganing magin sarong tawo na dai nanggad mag-uuswag. Dai siya magkakaigwa nin mga kapagarakian na maghahade sa Juda bilang mga kasalihid ni David. Ako, an Kagurangnan an nagtaram.”