Jeremias 21 - Marahay na Bareta Biblia

Hinulaan an Pagkadaog kan Jerusalem

¹ Sinugo sako ni Hadeng Zedekias nin Juda si Pasur na aking lalaki ni Malkias asin an padi na si Sofonias na aking lalaki ni Maaseias. Dara ninda an siring na kahagadan:

² “Makiolay ka sa Kagurangnan para samo, huli ta an syudad sinasalakay ni Hadeng Nebukadnezzar nin Babilonia asin kan saiyang hukbo. Tibaad pa gibohon sato kan Kagurangnan an saro kan saiyang mga ngangalasan asin paatrason niya si Nebukadnezzar.”

³ Dangan tinaraman ako kan Kagurangnan, asin sinabihan ko an mga tawong sinugo sako

⁴ na sabihan ninda si Zedekias na an Kagurangnan, an Dios nin Israel, nagtaram nin siring, “Zedekias, dadaogon ko an saimong hukbo na nakikilaban sa hade nin Babilonia asin sa saiyang hukbo. An mga armas kan saimong mga soldados tatambakon ko sa tahaw kan syudad.

⁵ Lalabanan taka sa bilog kong kosog, kaanggotan asin makuring kabangisan.

⁶ Gagadanon ko an mga nag-eerok sa syudad na ini; magin tawo o hayop parehong magagadan sa makuring peste.

⁷ Alagad ika, an saimong mga opisyal saka an mga tawong nakaligtas sa gera, sa gutom, asin sa peste, mabibihag ni Hadeng Nebukadnezzar asin nin saimong mga kaiwal, na boot gumadan saimo. Gagadanon ka ni Nebukadnezzar. Dai niya ililigtas ni maheherakan an siisay man saindo. Ako, an Kagurangnan, an nagtaram.”

⁸ Dangan tinaraman ako nin Kagurangnan na magsabi sa mga tawo, “Paghinanyog! Ako, an Kagurangnan, nagtatao saindo nin pagpipilian: an dalan pasiring sa buhay o an dalan pasiring sa kagadanan.

⁹ An siisay man na magdanay sa syudad magagadan sa gera, sa gutom asin sa peste. Alagad an siisay man na magluwas sa syudad saka magsuko sa mga taga Babilonia, na nagsasalakay ngunyan sa syudad, dai magagadan; ikakaligtas niya an saiyang buhay.

¹⁰ Nagdesisyon na ako na dai iligtas an syudad na ini kundi raoton. Itatao ini sa hade nin Babilonia, asin susuloon niya ini. Ako, an Kagurangnan, an nagtaram.”

An Paghukom sa Lahi kan Hade nin Juda

^11-12 Tinaraman ako nin Kagurangnan na itao an mensaheng ini sa lahi kan hade nin Juda, na mga kapagarakian ni David. “Hinanyoga nindo an sasabihon ko. Padanayon nindo aroaldaw an hustisya. Iligtas nindo sa madaya an dinadaya. Kun dai, maglalaad an sakong kaanggotan siring sa kalayo na dai nasisigbo huli kan ginigibo nindong karatan.

¹³ Nagtutukaw ka, Jerusalem, sa itaas kan mga kapantayan, arog sa gapo na nasa tahaw nin kahiwasan. Alagad ako kalaban mo. Sinasabi mo na mayo nin makakasalakay saimo o maglaog sa saimong mga bantayan.

¹⁴ Alagad papadusahan taka sa ginibo mo. Susuloon ko an saimong palasyo, asin an gabos sa palibot kaiyan. Ako, an Kagurangnan, an nagtaram.”