Jeremias 2 - Marahay na Bareta Biblia

An Pag-ataman nin Dios sa Israel

¹ Tinaraman ako nin Kagurangnan

² na ipahayag an mensaheng ini sa lambang saro sa Jerusalem. “Nagigiromdoman ko an saimong pagkamaimbod kan ika hoben pa, an saimong pagkamoot sako kan bago kitang kasalon; nagsunod ka sako sa kalangtadan, sa sarong daga na mayo nin maski anong tinanom.

³ Israel, ika para sa sakuya sana; ika an sakong banal na rogaring. Pinadarahan ko nin kasakitan asin kapahamakan an siisay man na nagkulog saimo. Ako, an Kagurangnan, an nagtaram.”

An Kasalan kan mga Ginikanan nin Israel

⁴ Hinanyoga nindo an mensahe nin Kagurangnan, mga kapagarakian ni Jacob, mga tribu nin Israel.

⁵ Ini an sinasabi nin Kagurangnan: “Anong karatan an nakua sako kan saindong mga ginikanan ta sinda nagharayo sako? Nagsamba sinda sa mga ladawan na mayo nin halaga kaya sinda nagin mayo na man nin halaga.

⁶ Dai ninda ako nagiromdoman maski ako an nagluwas sainda hale sa Egipto saka nangenot sainda sa kalangtadan: sarong daga nin mga desyerto asin mga kalot, sarong dagang alang saka pano nin pag-alaman, na mayo nin tawong nag-eerok saka nag-aagi.

⁷ Dinara ko sinda sa sarong matubang na daga, tanganing magpakabasog sinda sa mga bunga asin sa iba pang marahay na mga bagay na makukua duman. Alagad paglaog ninda, rinaot ninda an sakong daga; dinigtaan ninda an dagang itinao ko sainda.

⁸ An mga padi dai naghapot, ‘Haen an Kagurangnan?’ Dai ako midbid kan sadiri kong mga padi. Nagrebelde sako an mga pamayo; an mga propeta nagpropesiya sa ngaran ni Baal, saka nagsamba sa mga ladawan na mayo nin halaga.

An Reklamo nin Kagurangnan Laban sa Saiyang Banwaan

⁹ “Kaya ako, an Kagurangnan, mareklamo laban sa sakong banwaan. Irereklamo ko an saindang mga kapagarakian.

¹⁰ Lakaw pasiring sa amihan sa isla nin Chipre, o sugoa sa sirangan an sarong tawo, sa daga nin Kedar. Maaaraman mo na mayo kaidto nin nangyaring siring kaini.

¹¹ Igwa daw nin nasyon na nagribay kan saiyang mga dios-dios, maski ngani an mga iyan bakong tunay? Alagad rinibayan ako kan sakong banwaan, ako na nagtao sainda nin kaomawan, irinibay sako an mga dios-dios na dai makakatabang sainda.

¹² Kaya pinagbobotan ko an langit na magtakig sa takot, na magngalas saka mamongnan,

¹³ huli ta an sakong banwaan naggibo nin duwang kasalan: tinalikodan ninda ako, an burabod nin buhay na tubig, asin naggibo sinda nin mga tangke, may labot na mga tangke na dai nabubugtakan nin tubig.

An mga Bunga kan Pagsombikal nin Israel

¹⁴ “Bakong oripon an Israel; dai siya namundag sa kaoripnan. Alagad tadaw ta linalamag siya kan saiyang mga kaiwal?

¹⁵ Nag-urungal sinda saiya na garo mga leon; ginibo nindang desyerto an saiyang daga, asin rinaot ninda an saiyang mga banwa, kaya mayo na nin nag-erok duman.

¹⁶ Pinasa kan mga taga Memfis saka taga Tafanhes an saiyang payo.

¹⁷ Israel, ika an nagdara kaini sa saimong sadiri! Tinalikodan mo ako, an Kagurangnan na saimong Dios, kan pinapangenotan ko kamo sa saindong pagbaklay.

¹⁸ Ano an papakinabangon mo sa pagduman sa Egipto, tanganing mag-inom kan tubig kan Salog nin Nilo? Ano an papakinabangon mo sa pagduman sa Asiria, tanganing mag-inom kan tubig nin Eufrates?

¹⁹ An saimong karatan iyo an mapadusa saimo dangan an pagtalikod mo sako iyo an makondenar saimo. Maaraman mo kun gurano kapait asin karaot an pagtalikod sako, an Kagurangnan na saimong Dios, pati an dai mo pagdanay na maimbod sako. Ako, an Kagurangnan, an Dios nin mga hukbo, an nagtaram.”

Habong Magsamba sa Kagurangnan an Israel

²⁰ Nagsasabi an Kagurangnan na Makakamhan, “Israel, haloy mo nang isinikwal an kapangyarihan ko; habo mo akong kuyogon saka sambahon. sa ibabaw nin lambang halangkaw na bulod asin sa lindong nin lambang berdeng kahoy nagsamba ka arog sa sarong babaeng maraot.

²¹ Itinanom taka arog sa sarong piling poon nin ubas na hale sa pinakamarahay na banhi. Tano ta nagin saro kang maraot na tinanom, sarong ubas na mayong halaga?

²² Maski ka pa maggamit nin lihiya saka dakul na sabon sa paghugas, mahihiling ko man giraray an digta kan saimong kasalan.

²³ Paanong nakakasabi ka na dai ka nadigtaan, na dai ka lamang nagsamba ki Baal? Hilinga kun paano ka nagkasala sa kapantayan; hilinga kun ano an saimong ginibo. Garo ka lalaw na babaeng kamelyo na hinahabagat na nagdadalagan sa gabos na direksyon,

²⁴ na hidali sanang minapasiring sa desyerto. Kun hinahabagat siya, siisay an makakapugol saiya? Dai na magpapagal saiya an lalaking kamelyo huli ta danay siyang andam.

²⁵ Israel, dai mo pagpagalon an saimong mga bitis, ni pagpamarahon an saimong halonan sa pagparalamag kan ibang dios. Alagad nagsasabi ka, ‘Dai ako pwedeng tumalikod. Namotan ko na an mga dayuhan na dios-dios asin susunodon ko sinda.’”

Maninigong Padusahan an Israel

²⁶ Nagsasabi an Kagurangnan, “Arog kan mahabon na sinosopog kun nadadakop, kamong banwaan nin Israel sosopogon man—an saindong mga hade saka mga opisyal, an saindong mga padi saka mga propeta.

²⁷ Sosopogon kamo gabos—kamong nagsasabi na sarong kahoy an saindong ama saka sarong gapo an saindong ina. Mangyayari ini huli ta nagtalikod kamo sako embes na magdolok. Alagad kun kamo nasa kasakitan, pinapakiolayan nindo akong magdiyan saka iligtas kamo.

²⁸ “Haen an saindong mga dios-dios na ginibo nindo? Sa saindong kasakitan magpatabang kamo sainda—kun kaya ninda! Juda, an saimong mga dios-dios arog kadakul kan saimong mga syudad.

²⁹ Ano an reklamo mo? Tadaw ta nagrebelde ka sako?

³⁰ Pinadusahan taka, alagad mayo ini nin ibinungang karahayan; habo mong sagweon taka. Arog kan maringis na leon, ginadan mo an saimong mga propeta.

³¹ Banwaan nin Israel, hinanyoga an sakong tataramon. Nagin daw ako siring sa sarong desyerto sa saindo, siring sa dagang madiklom saka pano nin pag-alaman? Tadaw ta nagsasabi kamo na gigibohon nindo an saindong mawilihan, na dai na kamo mabalik sako?

³² Malilingawan daw nin sarong daraga an saiyang mga alahas, o nin sarong nobya an saiyang gubing na pangkasal? Alagad nalingawan ako kan sakong banwaan sa halawig na panahon.

³³ Israel, aram mo kun paano mandagka nin mga ilusyon. Kaya maski an pinakamaraot na babae, pwedeng mag-adal saimo.

³⁴ An saimong mga gubing panong dugo kan dukha saka mayong sala, bakong dugo kan mga mahabon. “Alagad maski arog kaini an mga ginigibo mo,

³⁵ nagsasabi ka, ‘Mayo ako nin sala; siguradong mayo na an kaanggotan nin Kagurangnan sako!’ Alagad ako, an Kagurangnan, an mapadusa saimo huli ta pinagnenegaran mo na nagkasala ka.

³⁶ Hinalean mo nin halaga an saimong sadiri huli sa pagsunod sa mga dios-dios kan ibang mga nasyon. Sosopogon ka kan Egipto, siring kan ginibo saimo kan Asiria.

³⁷ An Egipto babayaan mo na nakaduko an saimong payo huli sa sopog. Ako, an Kagurangnan, an nagsikwal kan mga sinasarigan mo; dai kang papakinabangon sainda.”