Jeremias 15 - Marahay na Bareta Biblia

Kapahamakan para sa mga taga Juda

¹ Dangan tinaraman ako nin Kagurangnan, “Maski pa si Moises saka si Samuel an nagtitindog digdi tanganing makimaherak sako, dai ko nanggad pahihilingan nin pagkaherak an mga tawong ini. Pahaleon mo sinda; habo ko sindang mahiling.

² Kun hapoton ka ninda kun saen sinda dapat mapaduman, sabihan mo sinda na nagtaram akong: An iba sainda itinalaan nang magadan sa helang— iyan an saindang padudumanan! An iba sainda itinalaan nang magadan sa gera— iyan an saindang padudumanan! An iba sainda itinalaan nang magadan sa gutom— iyan an saindang padudumanan! An iba sainda itinalaan sa pagkabihag— iyan an saindang padudumanan!

³ Ako, an Kagurangnan, an mapadara sainda nin apat na makangingirhat na bagay: magagadan sinda sa gera; guguyodon kan mga ayam an saindang mga bangkay; kakakanon sinda kan mga gamgam; asin sisimoton kan mga lalaw na hayop an matatada sa saindang mga bangkay.

⁴ Gigibohon kong matakot sainda an gabos na tawo sa kinaban huli kan ginibo ni Manases, na aking lalaki ni Ezekias, sa Jerusalem kan siya iyo an hade nin Juda.”

⁵ Nagtataram an Kagurangnan, “Siisay an maheherak saindo, mga taga Jerusalem, asin siisay an magmomondo huli kan nangyari saindo? Siisay an maontok maski sa kadikit na panahon tangani sanang maghapot kan saindong kamugtakan?

⁶ Isinikwal nindo ako; nagtalikod kamo sako. Kaya ibinikyaw ko an sakong kamot saka rinonot ko kamo huli ta dai ko na mapugolan an kaanggotan ko.

⁷ Sa lambang banwa sa daga itinapok ko kamo sa doros arog sa dagami. Banwaan ko, rinaot ko kamo, ginadan ko an saindong mga aki huli ta dai kamo nagbakle sa maraot nindong gawe.

⁸ An mga babaeng balo sa daga nindo mas dakul pa ki sa baybay sa tampi kan dagat. Ginadan ko an saimong mga lalaki sa saindang pagkahoben, asin pinatios ko an saindang mga ina. Bigla kong hinampak sinda nin makuring sakit asin takot.

⁹ Nanluya an ina na nawaraan nin pitong aki asin nadismayo siya. Nagin madiklom para saiya an liwanag; sinopog siya asin hinalean nin onra. Tutugotan ko an saindong mga kaiwal na gadanon an natatadang buhay pa saindo. Ako, an Kagurangnan, an nagtaram.”

Si Jeremias Nagreklamo sa Kagurangnan

¹⁰ Mamondo ako nin marahay! Tadaw ta inaki pa ako kan sakong ina sa kinaban na ini? Danay akong may kaiwal asin kadiskutiran sa bilog na daga. Dai ako nagpasubli nin kwarta ni nagsubli, alagad minamaldisyon ako kan gabos.

¹¹ Kagurangnan, magkatotoo logod an saindang mga maldisyon kun dai taka pinaglingkodan nin marahay, asin kun dai ako nakimaherak saimo para sa mga kaiwal ko kan sinda nasa kahosayan saka kahaditan. (

¹² Mayo nin makakabari nin lansang, orog na an lansang na hale sa amihan, na may salak na bronse.)

¹³ Tinaraman ako nin Kagurangnan, “Mapadara ako nin mga kaiwal tanganing hakoton an mga rogaring asin kayamanan kan sakong banwaan, bilang padusa sa ginibo nindang mga kasalan sa bilog na daga.

¹⁴ Papalingkodon ko sinda sa saindang mga kaiwal, sa dagang dai ninda naaaraman, huli ta an kaanggotan ko garo kalayo na naglalaad sagkod lamang.”

¹⁵ Dangan nagsabi ako, “Kagurangnan, ika an nakakaaram. Giromdoma ako asin tabangi. Ibalos mo ako sa mga nagpasakit sako. Dai ka magmaboot sainda huli ta tibaad magadan ninda ako. Giromdoma na nagtios ako nin kasosopgan huli saimo.

¹⁶ Nagtaram ka sako, asin dinangog ko an lambang tataramon mo. Sadiri mo ako, Kagurangnan Dios nin mga hukbo, kaya an saimong tataramon kaogmahan asin kagayagayahan kan sakong puso.

¹⁷ Dai ko sinayang an sakong panahon sa kaibahan kan mga tawo tanganing mag-ogma saka magpasiram-siram. Nagsolo-solo ako huli ta igwa ka nin ipinagboot sako, asin huli ta pinano mo ako nin kaanggotan.

¹⁸ Tadaw ta dai na natatapos an sakong kasakitan? Tadaw ta dai na nabobolong an sakong mga lugad? Tinutuyo mo daw na, para sako, ika magin arog sa sarong sapa na nagmamara sa tig-init?”

¹⁹ Sinimbag ako nin Kagurangnan, “Kun magbalik ka, aakoon taka asin magigin sorogoon taka giraray. Kun magpapahayag ka nin sarong mahalagang mensahe, embes na magparataram ka kan bagay na mayo nin halaga, gigibohon taka giraray na propeta. Madorolok giraray saimo an mga tawo asin dai mo na kaipuhan na magduman sainda.

²⁰ Para sa mga tawong ini, gigibohon takang pusog na kudal na bronse. Makikiiwal sinda saimo, alagad dai ka ninda madadaog, huli ta iibahan taka tanganing ingatan asin iligtas.

²¹ Ililigtas taka sa kamot kan maraot saka madahas na mga tawo. Ako, an Kagurangnan, an nagtaram.”