Jeremias 14 - Marahay na Bareta Biblia

An Makuring Pag-alang kan Daga

¹ Tinaraman ako nin Kagurangnan manongod sa pag-alang kan daga,

² “Nagmomondo an Juda, naghihingagdan an saiyang mga syudad, naghihigda sa daga an mga tawo huli sa kamondoan, asin naghahagad nin tabang an Jerusalem.

³ Sinugo kan mayayaman an saindang mga sorogoon tanganing magharok; nagduman sinda sa mga bubon, alagad mayo sinda nin nakuang tubig; nagbalik sinda na mayo nin laog an mga tapayan. Huli sa kasosopgan saka pagkaribong, tinahoban ninda an saindang mga lalawogon.

⁴ Huli ta dai nag-uuran asin alang na an daga, nagkasoropog an mga paraoma kaya tinahoban ninda an saindang mga lalawogon.

⁵ Binayaan kan inang usa an saiyang ogbon na bagong mamundag huli ta mayo nang doot.

⁶ Nagtitindog sa ibabaw kan mga bulod an mga lalaw na asno asin naghahalhal na garo mga lalaw na ayam; nandidiklom na an saindang mga mata huli ta mayo na sinda nin pagkakan.

⁷ Nakimaherak sako an banwaan ko, ‘Maski nagsasaksi an samong mga kasalan tumang samo, tabangi kami, Kagurangnan, siring kan saimong panuga. Kadakul na beses kaming nagtalikod saimo; nagkasala kami saimo.

⁸ Ika sana an paglaom nin Israel; ika an nagliligtas samo sa panahon nin kasakitan. Tadaw ta arog ka sa sarong dayuhan sa samong daga, arog sa sarong parabaklay na nakikitorog sana sa laog nin sarong banggi?

⁹ Tadaw ta arog ka sa sarong tawong namongnan, arog sa sarong soldados na dai kayang tumabang? Alagad ika, O Kagurangnan, uya sa samong kaibahan! Kami an banwaan mo; dai mo kami pagbayaan.’”

¹⁰ Nagsasabi an Kagurangnan manongod sa mga tawong ini, “Mas boot nindang magharayo sako, asin dai ninda pinugol an saindang sadiri. Kaya dai ko sinda nawiwilihan. Gigiromdomon ko an mga maraot nindang gibo asin papadusahan ko sinda huli kan mga kasalan ninda.”

¹¹ Nagtaram sako an Kagurangnan, “Dai mo paghagadon sako na tabangan ko an mga tawong ini.

¹² Maski sinda mag-ayuno, dai ko hihinanyogon an saindang pag-agrangay; asin maski pa magdolot sinda sako nin mga tinutong na atang saka mga pagkakan, dai ako mawiwili sainda. Embes kaiyan, gagadanon ko sinda sa gera asin sa gutom saka sa helang.”

¹³ Dangan nagsabi ako, “Kagurangnan Dios, aram mong sinasabihan sinda kan mga propeta na dai magkakaigwa nin gera o gutom, huli ta nanuga ka na magkakaigwa nin katoninongan sa samong daga.”

¹⁴ Alagad nagsimbag an Kagurangnan, “An mga propeta nagtataram nin mga kaputikan sa ngaran ko; dai ko sinda sinugo, pinagbotan, ni kinaolay man lamang. An bisyon na sinasabi ninda dai naghahale sako; an mga hula na gibo-gibo lamang ninda mayo nin halaga.

¹⁵ Ako, an Kagurangnan, masabi saimo kan gigibohon ko sa mga propetang iyan na dai ko man sinugo alagad nagtataram sa ngaran ko, dangan nagsasabi na dai magkakaigwa sa dagang ini nin gera asin gutom—gagadanon ko sinda sa gera asin sa gutom.

¹⁶ An mga tawong pinagsabihan ninda kan mga bagay na ini magagadan man sa gera saka sa gutom. Itatapok sa mga tinampo nin Jerusalem an saindang mga bangkay asin mayo nin malubong sa sainda. Ini an mangyayari sainda gabos—pati sa saindang mga agom, saka mga aking lalaki asin babae. Papabayadon ko sinda kan saindang mga karatan.”

¹⁷ Pinagbotan ako nin Kagurangnan na itaram ko sa banwaan an manongod sa sakong kamondoan asin magsabi: “Magbulos logod an mga luha sa sakong mga mata aldaw banggi; dai logod ako mag-ontok sa pagtangis, huli ta hararom an lugad kan sakong banwaan asin an kulog na saiyang namamatean makuring marahay.

¹⁸ Kun minaduman ako sa kaomahan, nahihiling ko an mga nagadan sa gera. Kun minaduman ako sa mga banwa, nahihiling ko an mga tawong nagagadan sa gutom. Padagos sa pag-otob kan saindang katongdan an mga propeta saka mga padi, alagad dai ninda aram kun ano an saindang ginigibo.”

Nakimaherak sa Kagurangnan an mga Tawo

¹⁹ Kagurangnan, isinikwal mo na daw nanggad an Juda? Kinakaongisan mo na daw an mga tawo sa Sion? Tadaw ta kinulogan mo kami nin marahay, kaya dai na kami maoomayan? Naghanap kami nin katoninongan, alagad mayo nin nag-abot na karahayan; naglaom kami na maomayan, alagad an nag-abot katakotan.

²⁰ Nagkasala kami saimo, Kagurangnan; ikinukumpisal nyamo an samong mga kasalan asin an mga kasalan kan samong mga ginikanan.

²¹ Giromdoma an saimong mga panuga asin dai mo kami ipagsikwal; dai mo paghalean nin onra an Jerusalem, an namumugtakan kan mamuraway mong trono. Dai mo paglapason an tipan na ginibo mo samo.

²² Dai nakakapagpauran an mga dios-dios kan mga nasyon; maski na an langit dai nakakapahulog nin uran. Ibinubugtak mi saimo an samong paglaom, O Kagurangnan na samong Dios, huli ta ika an naggigibo kaini gabos.