Jeremias 11 - Marahay na Bareta Biblia

Si Jeremias asin an Tipan

¹ Tinaraman ako nin Kagurangnan,

² “Hinanyoga an mga kahagadan kaining tipan. Sabihan mo an mga taga Juda asin an mga taga Jerusalem

³ na ako, an Kagurangnan Dios nin Israel, nagbugtak nin sarong maldisyon sa siisay man na dai nagkukuyog sa kahagadan kan tipan na ini.

⁴ Iyo ini an tipan na ginibo ko sa saindang mga ginikanan kan iluwas ko sinda sa Egipto, an daga na garo sarong nagkakalayong horno sa sainda. Tinaraman ko sinda na kuyogon ninda ako saka gibohon an gabos na pagboot ko. Nagtaram pa ako na kun magkuyog sinda, magigin banwaan ko sinda asin ako an magigin Dios ninda.

⁵ Dangan ootobon ko an panuga na ginibo ko sa saindang mga ginikanan, na itatao ko sainda an mayaman saka matubang na daga na ngunyan pagsadiri na ninda.” Nagsimbag ako, “Opo, Kagurangnan.”

⁶ Dangan tinaraman ako nin Kagurangnan, “Magduman ka sa mga syudad nin Juda asin sa mga tinampo nin Jerusalem. Irukyaw mo duman an sakong mensahe saka sabihan mo an mga tawo na hinanyogon an kahagadan kan tipan saka otobon iyan.

⁷ Huli ta kan darahon ko an saindang mga ginikanan sa luwas kan Egipto, maigot ko sindang pinatanidan na kuyogon ako, asin padagos na pinapatanidan ko an mga tawo sagkod ngunyan.

⁸ Alagad dai sinda naghinanyog ni nagkuyog, kundi an lambang saro nagdanay sa katagasan kan saiyang makasalan na puso. Pinagbotan ko sinda na otobon an sakong tipan, alagad habo ninda akong kuyogon. Kaya dinara ko sainda an gabos na padusa na sinasabi sa sakong tipan.”

⁹ Dangan tinaraman ako nin Kagurangnan, “Nagpaplano tumang sako an mga taga Juda saka an mga taga Jerusalem.

¹⁰ Binalikan ninda an mga kasalan kan saindang mga ginikanan, na habong maghinanyog kan sakong mga tataramon; nagsamba sinda sa ibang mga dios. Linapas kan Israel saka kan Juda an tipan na ginibo ko sa saindang mga ginikanan.

¹¹ Kaya ngunyan ako, an Kagurangnan, an madara sainda nin karatan na dai ninda madudulagan; maski pa mag-agrangay sinda sako, dai ko sinda dadangogon.

¹² Dangan an mga taga Juda saka mga taga Jerusalem maduruman sa mga dios-dios na saindang pinagdolotan nin mga sakripisyo asin maagrangay. Alagad an mga dios-dios na iyan dai makakaligtas sainda sa panahon kan saindang kasakitan.

¹³ An mga dios-dios kan mga taga Juda arog kadakul kan saindang mga syudad asin an mga altar na itinugdok kan mga nag-eerok sa Jerusalem para sa makauuyam na dios-dios na si Baal arog kadakul kan mga tinampo nin Jerusalem.

¹⁴ Jeremias, dai mo ipagpamibi an mga tawong ini, ni ipakimaherak sinda sako, huli ta dai ko sinda dadangogon kun mag-apod sinda sako sa panahon kan saindang kasakitan.”

¹⁵ Nagsasabi an Kagurangnan, “An banwaan na sakong namomotan naggigibo nin mga karatan. Ano an saindang deretso na maglaog sa sakong Templo? Sa paghona daw ninda mapupugol ninda an pag-abot kan kasakitan huli sa paggibo nin mga panuga saka pagdolot nin mga atang na hayop? Dangan makakapag-ogma na daw sinda?

¹⁶ Inapod ko sinda kaidto na sarong madahon na kahoy na oliba, na pano nin magagayon na bunga; alagad ngunyan sa sarong hagubohob na garo daguldol, susuloon ko an mga dahon kaiyan saka puputolon ko man an mga sanga.

¹⁷ “Ako, an Kagurangnan nin mga hukbo, iyo an nagtanom kan Israel asin kan Juda; alagad ngunyan hinohomaan ko sinda nin kasakitan. Sinda an nagdara kaini sa saindang sadiri huli ta naggibo sinda nin maraot; pinaanggot ninda ako huli sa pagdolot nin mga sakripisyo ki Baal.”

Plano laban ki Jeremias

¹⁸ Ipinaaram sako kan Kagurangnan an mga plano laban sako na ginigibo kan sakong mga kaiwal.

¹⁹ Garo ako mahuyong kordero na dinara pasiring sa bunoan, asin dai ko aram na laban sako an pinaplano nindang karatan. Nagsabi sinda, “Palodon ta an kahoy mantang namumunga; gadanon ta siya tanganing mayo na nin makagiromdom saiya.”

²⁰ Dangan namibi ako, “Kagurangnan nin mga hukbo, saro kang matanos na hukom; binabalo mo an puso asin isip nin tawo. Ibinugtak ko an sakong kaso sa saimong kamot; kaya pahilingan sako an pagbalos mo sainda.”

²¹ Boot akong ipagadan kan mga lalaking taga Anatot, asin sinabihan ninda ako na gagadanon ako ninda kun ipadagos ko an pagpahayag kan mensahe nin Kagurangnan.

²² Kaya nagtaram an Kagurangnan nin mga hukbo, “Papadusahan ko sinda! Magagadan sa gera an mga hoben na lalaki; magagadan sa gutom an saindang mga aki.

²³ Nagtalaan na ako nin panahon para sa pagpadara kan kasakitan sa mga taga Anatot, asin kun mag-abot na an panahon na iyan, mayo nin matatada sainda.”