Isaias 8 - Marahay na Bareta Biblia

An Aking Lalaki ni Isaias bilang Tanda para sa mga Tawo

¹ Dangan sinabihan ako nin Kagurangnan, “Magkua ka nin masusuratan asin isurat mo sa darakulang letra an, ‘Ki Maher-salal-has-baz.’

² Magkua ka nin duwang masasarigan na lalaki, an pading si Urias asin si Zacarias na aking lalaki ni Jeberekias, bilang mga saksi.”

³ Dai nahaloy, nagbados an sakong agom. Kan mamundag an samong aking lalaki, tinaraman ako nin Kagurangnan, “Ngarani siyang ‘Maher-salal-has-baz’;

⁴ huli ta bago siya makanood na magtaram nin ‘Ama ko’ o ‘Ina ko’, an gabos na kayamanan nin Damasco asin an gabos na sinamsaman nin Samaria dadarahon kan hade nin Asiria.”

Nagdadangadang an Hade nin Asiria

⁵ Tinaraman giraray ako nin Kagurangnan:

⁶ “Huli ta an mga tawong ini habo kan matoninong na katubigan hale sa burabod nin Siloa, asin nagtatakig sa atubang ni Hadeng Rezin saka ni Hadeng Peka,

⁷ ako, an Kagurangnan, an madara kan emperador nin Asiria saka an bilog niyang hukbo tanganing salakayon an Juda. Madatong sinda arog sa nagbabahang tubig kan Salog nin Eufrates, na nagsusupay sa mga pangpang kaiyan.

⁸ Mabulos iyan sa bilog na Juda siring sa sarong baha na minalangkaw paliog asin minatahob kan gabos.” An Dios nasa sato! An saiyang unat na mga pakpak an nag-iingat kan daga.

⁹ Magtiripon kamo huli sa takot, kamong mga nasyon! Pagdangog kamo, mga harayong kabtang kan kinaban. Mag-andam kamo sa pakilaban, alagad matakot kamo! Iyo, mag-andam kamo, alagad matakot kamo!

¹⁰ Maggibo kamo nin mga plano! Alagad dai mangyayari an mga iyan. Mag-orolay kamo sagkod na boot nindo! Alagad an gabos mayo nin halaga, huli ta an Dios nasa sato.

Pinatanidan nin Kagurangnan an Propeta

¹¹ Huli kan saiyang dakulang kapangyarihan, pinatanidan ako nin Kagurangnan na dai magsunod sa dalan na sinusunod kan mga tawo. Nagsabi siya,

¹² “Dai ka mag-apil sa mga plano kan mga tawo asin dai ka matakot sa mga bagay na saindang natatakotan.

¹³ Giromdoma na ako, an Kagurangnan nin mga hukbo, banal; ako an saimong dapat na matakotan.

¹⁴ Huli kan sakuyang makangangalas na kabanalan, arog ako sa sarong gapo na nasisingkogan nin mga tawo; arog ako sa sarong siod na madakop sa mga tawo kan kahadean nin Juda saka Israel asin sa mga taga Jerusalem.

¹⁵ Dakul an masisingkog; matutumba sinda asin maroronot. Madadakop sinda sa sarong siod.”

Patanid laban sa Paghapot sa Gadan

¹⁶ Kamo, sakong mga disipulo, dapat na ingatan nindo asin papagdanayon an mga mensahe na itinao sako nin Dios.

¹⁷ Hahalaton ko an Kagurangnan, na nagtatago kan saiyang lalawogon sa saiyang banwaan, asin ibubugtak ko an sakong paglaom saiya.

¹⁸ Uya ako sa kaibahan kan mga aki na itinao sako nin Kagurangnan. An Kagurangnan nin mga hukbo, na an trono nasa Bukid nin Sion, iyo an nagsugo sato bilang mga buhay na mensahe sa banwaan nin Israel.

¹⁹ Alagad sasabihan kamo kan mga tawo na maghagad nin mga mensahe sa mga parahula saka mga nakikiolay sa mga gadan na naghuhuni asin nagugumodgumod. Masabi sinda, “Kaipuhan makihumapot an mga tawo sa mga espiritu asin maghapot sa gadan para sa mga buhay pa.”

²⁰ Simbagon nindo sinda nin, “Dangoga an itinutukdo saindo nin Kagurangnan! Dai kamo magdangog sa mga nakikiolay sa mga gadan—dai magbubunga nin marahay an sasabihon ninda saindo.”

Panahon nin Kasakitan

²¹ Maglalagalag an mga tawo sa daga, manluluya an boot ninda asin magugutom sinda. Sa saindang pagkagutom saka kaanggotan, mamaldisyonon ninda an saindang hade patin an saindang Dios. Matingkalag sinda sa langit

²² o mahiling sa daga, alagad mayo sindang mahihiling kundi kasakitan asin kadikloman, makangirhat na kadikloman na saindang padudumanan.