Isaias 66 - Marahay na Bareta Biblia

Hinukoman nin Kagurangnan an mga Nasyon

¹ Nagsasabi an Kagurangnan, “An langit iyo an sakong trono asin an kinaban iyo an sakong tungtongan. Anong harong an pwede nindong itugdok para sako; saen na lugar ako magpapahingalo?

² Ako mismo an naglalang kan bilog na kinaban! Alagad nawiwilihan ko an mga mapakumbaba asin nagsosolsol, an mga may pagkatakot saka nagkukuyog sa sako.

³ “An mga tawo naggigibo kan saindang nawiwilihan. Sa sainda, pareho an pagbono nin baka bilang sarong sakripisyo asin an pagsakripisyo kan buhay nin sarong tawo. Pareho sainda an pagsakripisyo nin sarong kordero asin an pagbari kan liog nin sarong ayam; an pagtao nin dolot na pagkakan asin an pagdolot kan dugo nin orig; dangan an pagdolot nin insenso asin an pagpamibi sa sarong dios-dios.

⁴ Kaya papadarahan ko sinda nin kapahamakan—an mga bagay mismo na saindang kinakatakotan—huli ta mayo nin nagsimbag kan ako mag-apod, o naghinanyog kan ako magtaram. Pinili ninda an pagsombikal sako asin an paggibo nin maraot.”

⁵ Dangoga nindo kun ano an sinasabi nin Kagurangnan, kamo na may pagkatakot asin nagkukuyog saiya: “Huli ta maimbod kamo sako, naoongisan kamo kan saindong mga kahimanwa asin isinisikwal. Pinag-oolog-olog kamo asin nagsasabi sinda, ‘Ipahiling logod nin Kagurangnan an saiyang kadakulaan asin iligtas kamo, tanganing mahiling mi kamo na nag-oogma.’ Alagad sinda man sana an mapapasopog!

⁶ Dangoga nindo! An makosog na ribok na idto sa laog kan syudad, an tanog na naghahale sa Templo, iyo an tanog kan pagpapadusa nin Kagurangnan sa saiyang mga kaiwal!

⁷ “An sakong banal na syudad nakakaagid sa sarong babae na nangaki maski dai nakamate kan kulog nin pangaki.

⁸ May nakahiling na daw o nakadangog kan siring na bagay? May nasyon daw na namundag sa saro sanang aldaw? Dai na mahahaloy an pagtitios nin Sion, asin mamumundag an nasyon.

⁹ Dai kamo mag-isip na papaaboton ko sa panahon nin pangaki an sakong banwaan asin dai ko sinda tutugotan na mamundag.” An Kagurangnan an nagtaram.

¹⁰ Mag-ogma kamo kaiba kan Jerusalem; mag-ogma kamo para saiya, kamo gabos na namomoot sa syudad na ini! Mag-ogma kamo ngunyan kaiba niya, kamo gabos na nagmondo para saiya!

¹¹ Papakinabangan nindo an saiyang kauswagan, siring sa sarong aki sa daghan nin saiyang ina.

¹² Nagsasabi an Kagurangnan, “Dadarahan ko kamo nin nagdadanay na kauswagan; magbubulos pasiring saindo an kayamanan kan mga nasyon siring sa sarong salog na dai nagmamara. Makakaagid kamo sa sarong aki na pinapasuso kan saiyang ina; sa sarong aki na kinikilik kan saiyang ina asin namomotan.

¹³ Rarangahon ko kamo sa Jerusalem, siring kan pagranga nin sarong ina sa saiyang aki.

¹⁴ Kun mahiling na nindo na nangyayari ini, maoogma kamo; ini an magpapakosog asin magpapataba saindo. Dangan maaaraman nindo na ako, an Kagurangnan, an nagtatabang sa mga nagkukuyog sako, asin ipinapahiling ko an sakong kaanggotan tumang sa sakong mga kaiwal.”

¹⁵ Madatong an Kagurangnan na may darang kalayo, asin malunad siya sa mga pakpak nin sarong bagyo, tanganing padusahan an mga tawong naanggotan niya.

¹⁶ Sa paagi kan espada asin kalayo papadusahan niya an gabos na tawo sa daga, mga tawong nagkasala—asin dakul sainda an magagadan.

¹⁷ Nagsasabi an Kagurangnan, “Harani na an kataposan para sa mga nagrilinig kan saindang sadiri para sa paganong pagsasamba, sa mga tawong nagduduman sa banal na mga tatamnan, asin sa mga nagkakakan nin karne nin orig saka kino patin mga maating kakanon.

¹⁸ Aram ko an saindang mga iniisip saka ginigibo. Madatong ako sa pagtipon kan katawohan kan gabos na nasyon. Kun magkatiripon na sinda, mahihiling ninda kun ano an nagigibo kan sakong kapangyarihan

¹⁹ asin maaaraman ninda na ako an nagpapadusa sa sainda. “Alagad dai ko gagadanon an iba sainda. Susugoon ko sinda sa mga nasyon asin sa mga hararayong lugar na dai pa nakakadangog kan sakong kabantogan saka kapangyarihan: sa Espanya, sa Libya, asin sa Lydia, na igwang ekspertong mga parapana, patin sa Tubal saka sa Grecia. Ipapahayag kan mga tawong ini an sakong kadakulaan sa mga nasyon na ini.

²⁰ Ibabalik ninda an saindong mga kahimanwa hale sa mga nasyon bilang regalo sako. Dadarahon ninda an mga tawong ini sa sakong banal na bulod sa Jerusalem. Malunad sinda sa mga kabayo, mga mula, asin mga kamelyo, patin sa mga karwahe saka mga kariton. Dadarahon ninda an mga kahimanwa ninda siring sa pagdara kan mga Israelita kan mga dolot na pagkakan sa Templo na nakabugtak sa mga malinig na laogan.

²¹ An iba sa mga tawong ini gigibohon kong mga padi asin mga Levita.

²² “Siring na an bagong kalangitan saka an bagong kinaban magdadanay huli sa sakong kapangyarihan, magdadanay man an saindong mga kapagarakian saka ngaran.

²³ Sa lambang Pyesta kan Bagong Bulan saka Sabbath, masaramba sa sako digdi sa Jerusalem an lambang nasyon,” an sabi kan Kagurangnan.

²⁴ “Mantang naghahale sinda, mahihiling ninda an mga bangkay kan mga tawong nagrebelde tumang sako. An mga ulod na nagkakakan sainda dai magagadan, asin an kalayong nagsusulo sainda dai nanggad mapapalsok. An tanawon na iyan ikakauyam kan bilog na katawohan.