Isaias 65 - Marahay na Bareta Biblia

An Padusa nin Dios sa mga Rebelde

¹ Nagsabi an Kagurangnan, “Andam ako kaidto sa pagsimbag kan mga pamibi nin sakong banwaan, alagad dai sinda namibi. Andam ako kaidto na makua ninda ako, alagad dai man lamang sinda naghingowang hanapon ako. Dai namibi sa sako an nasyon, maski andam ako sa pagsimbag nin, ‘Uya ako; tatabangan ko kamo.’

² Danay akong andam sa pag-ako kan sakong banwaan, an mga tawong padagos sa paggibo nin maraot asin sa paglakaw sa sadiri nindang dalan.

³ Daing sopog na pinapaanggot ninda ako. Nagdodolot sinda nin paganong mga sakripisyo sa banal na mga tatamnan asin nagtututong sinda nin mga insenso sa mga paganong altar.

⁴ Pagkabanggi, minaduman sinda sa mga lungib saka lulubngan tanganing makihumapot sa mga espiritu kan gadan. Nagkakakan sinda kan karne nin orig asin nag-iinom kan sabaw kan karne na idinolot sa mga paganong sakripisyo.

⁵ Dangan minasabi sindang, ‘Magrayo kamo samo. Mga banal kami asin dai kami dapat na madutaan nindo!’ Dai ko maaako an mga tawong siring kaiyan—an sakong kaanggotan tumang sainda nakakaagid sa sarong kalayo na dai napapalsok.

⁶ “Aram ko an gigibohon kong padusa sainda, asin nakasurat na an saindang sentensya. Dai ko papawaraan nin halaga an saindang ginibo; papadusahan ko sinda

⁷ huli kan mga kasalan ninda, asin kan kasalan kan saindang mga ginikanan. Nagtutong sinda nin mga insenso sa paganong mga lugar na pagsasambahan asin pinakaraot ako. Kaya papadusahan ko sinda sosog sa saindang mga ginibo.”

⁸ Nagsasabi an Kagurangnan, “Mayo nin siisay man na minaraot kan marahay na mga ubas; embes kaiyan minagibo sinda nin arak hale sa duga kaiyan. Dai ko man gagadanon an gabos na kabilang sa sakong banwaan—itatada ko idtong mga naglilingkod sako.

⁹ Bebendisyonan ko an mga Israelita na kabilang sa tribu ni Juda, asin sasadirihon kan saindang mga kapagarakian an sakong daga na dakul an bukid. An sakong piniling banwaan na naglilingkod sako iyo an mag-eerok duman.

¹⁰ Sasambahon ninda ako asin papangenotan ko an saindang mga hayop tanganing manabsab sa Kapatagan nin Sharon sa solnopan asin sa Kapantayan nin Acor sa sirangan.

¹¹ “Alagad laen man an para saindo na nagbabaya sako, na dai nagmimidbid sa Sion, an sakong banal na bulod, asin nagsasamba ki Gad saka ki Meni, an mga dios-dios kan swerte asin palad nin tawo.

¹² Magigin palad nindo an magadan sa madahas na paagi, huli ta dai kamo nagsimbag kan apodon ko kamo, ni nagdangog kan ako magtaram. Pinili nindong isikwal ako asin naggibo kamo nin maraot.

¹³ Kaya sinasabihan ko kamo na idtong nagsasamba saka nagkukuyog sa sako iyo sana an magkakaigwa nin dakul na pagkakan asin inomon, alagad magugutom saka mapapaha kamo. Magigin maogma sinda, alagad mapapasopog kamo.

¹⁴ Mag-aawit sinda sa kaogmahan, alagad maghihibi kamo sa dakulang kamondoan.

¹⁵ An saindong ngaran gagamiton kan sakong piniling banwaan bilang maldisyon. Ako, an Kagurangnan Dios, an magadan saindo. Alagad tatawan ko nin bagong ngaran an mga nagkukuyog sako.

¹⁶ An siisay man sa daga na maghagad nin bendisyon, maghahagad kan bendisyon kan maimbod na Dios. An siisay man na magsumpa, magsusumpa huli sa ngaran kan maimbod na Dios. An kasakitan kan nakalihis na panahon mawawara asin malilingawan.”

An Bagong Linalang

¹⁷ Nagsasabi an Kagurangnan, “Naglalalang ako nin bagong kinaban asin bagong kalangitan. An mga pangyayari kan nakaaging panahon dai na gigiromdomon.

¹⁸ Mag-ogma asin maggayagaya kamo sagkod pa man sa sakong linalalang. An bagong Jerusalem na linalalang ko magigin pano nin kaogmahan, asin an saiyang mga namamanwaan magigin maogma.

¹⁹ Ako mismo mapapano nin kaogmahan huli kan Jerusalem asin kan saiyang namamanwaan. Dai na magkakaigwa nin pagtangis diyan, ni paghagad nin tabang.

²⁰ An mga pasuso dai na magagadan mantang omboy pa, asin an gabos na tawo maghahalawig an buhay. An mga nakakaabot sa edad na sanggatos, ibibilang na aki pa. An magkagaradan bago kan edad na iyan magigin sarong tanda na pinapadusahan ko sinda.

^21-22 Matugdok nin mga harong an mga tawo asin sinda an mag-eerok diyan—dai iyan gagamiton nin iba. Magtatanom sinda nin mga ubas asin mag-iinom kan arak na hale diyan—bakong iba an mag-iinom kaiyan. Siring sa mga kahoy, mabubuhay nin halawig na panahon an sakong banwaan. Papakinabangan ninda an mga bagay na saindang pinagpagalan.

²³ Magigin mauswag an saindang pinagpagalan, asin dai mamumugtak sa kapahamakan an saindang kaakian. Sinda saka an saindang kapagarakian bebendisyonan ko sagkod sa mga maabot na panahon.

²⁴ Maski dai pa sinda nakakatapos kan pagpamibi, sisimbagon ko na sinda.

²⁵ Sabay na magkakakan an lalaw na ayam saka an kordero; magkakakan nin dagami an leon siring kan baka, asin dai na mangangagat an halas. Sa Sion, an sakong banal na bulod, mayo nin anoman na makakakulog o makakaraot.”