Isaias 58 - Marahay na Bareta Biblia

An Tunay na Pag-ayuno

¹ Nagsasabi an Kagurangnan, “Pagkurahaw nin makosog! Sabihi an sakong banwaan na Israel dapit kan saindang mga kasalan!

² Sinasamba ninda ako aroaldaw, asin sinasabi nindang boot nindang maaraman an sakong mga dalan saka mga pagboot. Sinasabi nindang boot nindang tawan ko sinda nin matanos na mga pagboot asin naoogma sinda sa pagsamba sako.”

³ Naghahapot an mga tawo, “Tadaw ta mag-aayuno kami? Dai man iyan nahihiling kan Kagurangnan. Tadaw ta dai kami magkakan kun dai man niya iyan papahalagahan? An Kagurangnan nagsasabi sainda, “Sa katotoohan, mantang nag-aayuno kamo, padagos nindong hinahanap an kaogmahan asin inaapi nindo an saindong mga trabahador.

⁴ Kun an saindong pag-ayuno minabunga nin mga pag-iriwal, sa paghona nindo dadangogon ko an saindong mga pamibi?

⁵ Kun nag-aayuno kamo, pinapasakitan nindo an saindong mga hawak; idinuduko nindo an saindong payo siring sa sarong dahon nin doot, asin binibiklad nindo an sako dangan minahigda kamo sa abo. Aapodon daw nindong pag-aayuno an siring? Sa paghona nindo, mawiwili ako sa siring na gibo?

⁶ “An pag-ayuno na boot ko iyo ini: Tangkason nindo an kadena nin pang-aapi asin an sakal nin inhustisya, saka talingkasan nindo an mga naaapi.

⁷ Hirasan nindo nin pagkakan an mga nagugutom asin pasakaton nindo sa saindong mga harong an mga dukhang mayo nin harong. Tawan nindo nin gubing an mga mayo, asin dai kamo magsayuma sa pagtabang sa saindong mga kadugo.

⁸ “Dangan maliwanag sa saindo siring sa liwanag kan aldaw pagkaaga an sakong pagkawili, asin madaling mararahay an saindong mga lugad. Danay ko kamong iibahan tanganing iligtas kamo; an sakong presensya an mag-iingat saindo sa gabos na pag-alaman.

⁹ Kun mamibi kamo, sisimbagon ko kamo. Kun mag-apod kamo sako, masimbag ako. “Kun ontokon nindo an pang-api, an pagmenos sa kapwa, asin an pagtaram nin maraot na tataramon;

¹⁰ kun tawan nindo nin pagkakan an mga nagugutom saka tawan kan saindang kaipuhan an mga mayong sukat, dangan an nakapalibot saindong kadikloman magigin siring sa liwanag nin kaodtohan.

¹¹ Danay ko kamong papangenotan asin tatawan kan marahay na mga bagay. Papakosogon ko kamo asin dai papahelangon. Makakaagid kamo sa sarong tatamnan na danay na binabaribi, siring sa burabod na dai nanggad nagmamara.

¹² Papatindogon giraray nindo an haloy nang nagkararaot na mga edipisyo sa dati kaining pundasyon. Mimidbidon kamo bilang mga tawong naghirahay kan mga kudal, mga tawong nagpakarhay kan raot na mga harong.”

An Balos sa Pag-otob kan Sabbath

¹³ An Kagurangnan nagsasabi, “Kun galangan nindo an Sabbath bilang sagradong aldaw, asin dai kamo maggibo kan saindong nawiwilihan sa aldaw na iyan; kun pahalagahan nindo an sakong banal na aldaw asin galangan nindo iyan sa paagi kan dai pagbyahe, pagtrabaho, o pagtaram nin mga mayong kahulogan,

¹⁴ dangan makukua nindo an kaogmahan na minadatong huli sa paglingkod sako. Itatao ko saindo an kaomawan sa bilog na daga, asin papakinabangan nindo an daga na itinao ko sa saindong ginikanan na si Jacob. Ako, an Kagurangnan, an nagtaram.”