Isaias 56 - Marahay na Bareta Biblia

An Gabos na Nasyon Magigin Kaapil sa Banwaan nin Dios

¹ Nagsasabi an Kagurangnan sa saiyang banwaan, “Giboha nindo an matanos asin tama, huli ta maabot asin mahahayag na an gigibohon kong pagligtas.

² Bebendisyonan ko an mga danay na nag-ootob kan Sabbath asin dai nagbabasang-basang kaiyan. Bebendisyonan ko an mga dai naggigibo nin maraot.”

³ An dayuhan na nag-apil sa banwaan nin Kagurangnan dai magsabi, “Habo nin Kagurangnan na magsamba ako kaiba kan saiyang banwaan.” An lalaking kinapon dai mag-isip na dai siya pwedeng magin kabtang kan banwaan nin Dios huli ta dai siya magkakaigwa nin mga aki.

⁴ An Kagurangnan nagsasabi sa siring na tawo, “Kun ginagalangan mo ako huli sa pag-otob kan Sabbath, kun ginigibo mo an nawiwilihan ko asin kun maimbod mong inootob an sakong tipan,

⁵ an saimong ngaran orog na magigiromdoman sa sakong Templo saka sa tahaw nin sakong banwaan, ki sa kun nagkaigwa ka nin dakul na aki. Dai ka nanggad malilingawan.”

⁶ An Kagurangnan nagsasabi sa mga dayuhan na nagin kabtang na kan saiyang banwaan, na namomoot saka naglilingkod saiya, na nag-ootob kan Sabbath asin maimbod na nag-ootob kan saiyang tipan:

⁷ “Dadarahon ko kamo sa Sion, an sakong banal na bukid, tatawan ko nin kaogmahan sa sakong harong nin pamibian, asin aakoon ko an mga sakripisyo na idinodolot nindo sa sakong altar. An sakong Templo aapodon na harong nin pamibian para sa gabos na banwaan.”

⁸ An Kagurangnan Dios, na nagdara pabalik kan saiyang banwaan hale sa pagkatapokan, nangako na dadarahon pa niya an ibang tawo tanganing makaiba kan saiyang banwaan.

Kinondenar an mga Lider nin Israel

⁹ Sinabihan nin Kagurangnan an dayuhan na mga nasyon na magdolok siring sa mga lalaw na hayop tanganing kakanon an saiyang banwaan.

¹⁰ Nagsasabi siya, “Buta an gabos na lider na iyo kutana an mapatanid sa sakong banwaan! Mayo sindang naaaraman. Arog sinda sa mga ayam na dai nagbabatok—mayo sindang ginigibo kundi maghigda saka mangatorogan. Boot sana nindang magkatorog.

¹¹ Arog sinda sa sablok na mga ayam na dai nagkakabarasog. Mayo nin pakasabot an mga lider na ini. Ginigibo kan lambang saro sainda an saiyang nawiwilihan asin hinahanap sana an saiyang karahayan.

¹² ‘Madya, magkua kita nin arak’, an sabi ninda, ‘asin mag-inom kita sagkod na kaya ta! An sunod na aldaw magigin mas maogma ki sa ngunyan.’”