Isaias 53 - Marahay na Bareta Biblia

¹ Nagsimbag an mga tawo, “Siisay daw an pwedeng magtubod sa samong ibinabareta? Siisay daw an pwedeng nakahiling kan kamot nin Kagurangnan sa nangyaring ini?

² Kabotan nin Kagurangnan na an saiyang sorogoon magtalubo siring sa sarong tinanom na nagkakagamot sa mamarang daga. Mayo siya nin porma o dignidad tanganing madagka kitang hilingon siya; mayo nin kagayonan tanganing mawoton ta siya.

³ Pinag-olog-olog asin isinikwal ta siya; tinios niya an sakit saka kulog. Mayo man lamang nin boot na maghiling saiya— pinag-olog-olog ta siya asin dai ginalangan.

⁴ “Alagad tinios niya an sakit na kuta para sato, an kulog na kita kuta an nagtios. Naghona kita na an saiyang pagtios sarong padusa na hale sa Dios.

⁵ Alagad huli kan satong mga kasalan linugad siya, huli kan ginibo tang karatan hinampak siya. Nabolong kita huli kan padusa na saiyang tinios, naomayan kita huli kan mga hampak na saiyang inako.

⁶ Gabos kita siring sa karnero na nagkawarara, an lambang saro sato naglakaw sa sadiring dalan. Alagad sa saiya pinahugpa nin Kagurangnan an padusa, an padusa na dapat kita kuta an mag-ako.

⁷ “Pinasakitan siya nin makuri, alagad mapakumbabang tinios niya iyan; dai lamang siya nagtaram nin anoman. Siring sa kordero na dinadara sa bunoan, siring sa karnero na guguntingan, dai lamang siya nagtaram nin anoman.

⁸ Dinakop siya asin sinentensyahan dangan dinara tanganing gadanon, asin mayong nagmakulog kun ano an mangyayari saiya. Ginadan siya para sa kasalan kan satong banwaan.

⁹ Ilinubong siya sa lulubngan kan mga tampalasan, ilinubong siya kaiba kan mayaman, maski dai lamang siya nakagibo nin krimen o nin kaputikan.”

¹⁰ Nagsasabi an Kagurangnan, “Kabotan ko na siya magtios; an saiyang kagadanan sarong sakripisyo na magdadara nin kapatawadan. Halawig an saiyang magigin buhay, kaya mahihiling pa niya an saiyang kapagarakian, asin sa paagi niya maootob an sakong katuyohan.

¹¹ Pakatapos kan gabos niyang kasakitan, magkakaigwa giraray siya nin kaogmahan; maaaraman niyang dai nasayang an saiyang pagtios. An maimbod kong sorogoon, na sakong nawiwilihan, iyo an mapasan kan padusa kan kadaklan asin huli sa saiya sinda sakong papatawadon.

¹² Kaya tatawan ko siya nin kaomawan, kaiba kan mga dakula saka mapangyaring mga tawo. Idinusay niya an saiyang buhay asin ibinilang siya sa kaibahan kan mga tampalasan. Inako niya an kasalan kan kadaklan asin ipinamibi niya na sinda patawadon.”