Isaias 52 - Marahay na Bareta Biblia

Ililigtas nin Dios an Jerusalem

¹ Pagmata, O Jerusalem! Pagmakosog asin pagin dakula giraray! Banal na syudad nin Dios, sulotan an magagayon mong gubing! Dai na nanggad makakalaog sa saimong mga trangkahan an mga pagano.

² Pagbangon, O Jerusalem! Maghale ka diyan sa alpog asin magtukaw ka sa saimong trono! Tangkasa an kadena na nakagapos saimo, bihag na banwaan nin Sion!

³ Nagsasabi an Kagurangnan Dios sa saiyang banwaan, “Ipinabakal kamo na mayo nin bayad, kaya tutuboson man kamo na mayo nin bayad.

⁴ Kan magduman kamo sa Egipto tanganing mag-erok bilang mga dayuhan, nagduman kamo sa marahay na boot; alagad kinua kamo nin Asiria sa paagi nin kosog asin dai nagbayad para saindo.

⁵ Arog man kaiyan an nangyari saindo sa Babilonia; sinakop kamo saka dai binayadan. Nag-orgulyo saka nagpaabaw-abaw an mga namamayo saindo asin danay na ipinahiling ninda an pag-olog-olog sako.

⁶ Sa maabot na panahon, aakoon nindo na ako an Dios, asin na ako an nagtaram saindo.”

⁷ Magayon paghilingon sa ibabaw nin kabukidan, an mga bitis kan nagdadara kan marahay na bareta, an bareta nin katoninongan! Ipinapahayag niya an kapangganahan asin nagsasabi siya sa Sion, “Hade an saimong Dios!”

⁸ Nagkukurahaw an mga nagbabantay kan syudad, sarabay sindang nagkukurahaw sa kaogmahan! Nahihiling nanggad ninda an pagbalik nin Kagurangnan sa Sion!

⁹ Pagkurahaw kamo sa kaogmahan, kamong nagkagarabang lugar nin Jerusalem! Huli ta ililigtas nin Kagurangnan an saiyang syudad asin rarangahon niya an saiyang banwaan.

¹⁰ Gagamiton nin Kagurangnan an banal niyang kapangyarihan; ililigtas niya an saiyang banwaan, asin mahihiling iyan kan bilog na kinaban.

¹¹ Maghale kamo sa Babilonia, kamo gabos na paradara kan kagamitan sa Templo! Dai kamo magdotdot kan ipinangalad na bagay; magpakabanal kamo asin maghale diyan.

¹² Ngunyan mahale kamo na dai naghihidali, dai kamo malakaw na garo nagdudulag. An Kagurangnan na saindong Dios an mangengenot saindo asin maataman saindo.

An Nagtitios na Sorogoon

¹³ Nagsasabi an Kagurangnan, “Mag-uuswag an sakong sorogoon sa saiyang gibo; ilalangkaw siya asin gagalangan.

¹⁴ Kadakul na tawo an nabigla kan mahiling siya; garo bako na siyang tawo, huli kan makuring nangyari sa saiyang pigura.

¹⁵ Alagad ngunyan mangalas saiya an dakul na nasyon, asin sa pagngalas maalo an mga hade. Huli ta mahihiling ninda an dai pa ninda nabaretaan, asin masasabotan ninda an dai pa ninda nadangog.”