Isaias 51 - Marahay na Bareta Biblia

Mga Tataramon nin Pagranga sa Jerusalem

¹ Nagsasabi an Kagurangnan, “Pagdangog kamo sako, kamo na boot na makaligtas, kamo na minadolok sako tanganing magpatabang. Isipa nindo an gapong saindong hinalean, an lugar na pinagkuahan saindo.

² Isipa nindo an saindong ginikanan na si Abraham, saka si Sara, na saindong hinalean. Kan apodon ko si Abraham, mayo siya nin aki, alagad kan bendisyonan ko siya, nagdakul an saiyang aki saka mga kapagarakian.

³ “Maheherakan ko an Jerusalem, an gabos na nag-eerok sa mga raot na lugar kaiyan. Maski saro nang desyerto an saiyang daga, gigibohon ko iyan na sarong tatamnan, siring sa tatamnan na ibinugtak ko sa Eden. Makukua diyan an kaogmahan saka an kagayagayahan, an mga pasasalamat sako saka an mga awit nin pag-omaw.

⁴ “Pagdangog kamo, sakong banwaan, dangoga nindo an sakong sasabihon: itinatao ko an sakong katukdoan sa mga nasyon; maliliwanagan sinda huli kan sakong mga togon.

⁵ Madatong tolos ako sa pagligtas sainda; harani na an panahon nin sakong kapangganahan. Ako mismo an masakop sa mga nasyon. Hinahalat kan hararayong daga an sakong pagdatong; may paglaom na naghahalat sinda sako nganing iligtas ko sinda.

⁶ Tingkalagan an saindong mga mata sa kalangitan, asin hilinga nindo an daga! An kalangitan mawawara siring sa aso; an daga magigin siring sa daan na gubing; an gabos na tawo diyan magagadan siring sa mga langaw. Alagad an sakong kaligtasan magdadanay sagkod lamang; an sakong pagligtas mayo nanggad nin kataposan.

⁷ “Pagdangog kamo, kamo na nakakaaram kan katanosan, kamo na an nasa puso iyo an sakong katogonan. Dai kamo matakot kun pagtuya-tuyaon asin pag-olog-ologon kamo nin katawohan;

⁸ mawawara sinda siring sa gubing na kinakan nin mga anay! Alagad an sakong kaligtasan magdadanay sagkod lamang; an sakong pagligtas para sa gabos na henerasyon.”

⁹ Pagmata, Kagurangnan, asin kami saimong tabangan! Gamita an saimong kapangyarihan asin kami ligtasan; gamita iyan siring kan ginibo mo kaidtong panahon. Ika an nagperedaso kan impakto sa dagat na si Rahab.

¹⁰ Ika man an nagpamara kan dagat dangan naggibo nin dalan sa katubigan, nganing makabalyo idtong saimong iliniligtas.

¹¹ May kaogmahan na makakaabot sa Jerusalem an mga ilinigtas mo, na nag-aawit saka nagkukurahaw sa kaogmahan. Magigin maogma sinda sagkod lamang, sagkod pa man ligtas sa dusa asin sa kamondoan.

¹² Nagsasabi an Kagurangnan, “Ako, ako an nagraranga saindo. Tadaw ta matatakot kamo sa kapwa nindo tawo, na magagadan man siring sa mga doot?

¹³ Nalingawan na nindo an Kagurangnan na naggibo saindo, na nag-unat kan kalangitan asin nagpamugtak kan pundasyon kan kinaban? Tadaw ta mamumuhay kamong danay na takot sa kaanggotan kan mga nag-aapi saindo, kan mga andam sa pagraot saindo? Dai na makakaduta saindo an saindang kaanggotan.

¹⁴ Madali nang talingkasan an mga bilanggo; mabubuhay sinda sa halawig na panahon asin dai magkukulang an saindang pagkakan.

¹⁵ “Ako an Kagurangnan na saindong Dios, na nagbubukag kan dagat asin nagpapahagubohob kan mga alon. Kagurangnan nin mga hukbo an sakong ngaran!

¹⁶ Ako an nag-unat kan kalangitan asin an nagbugtak kan pundasyon kan kinaban; sinasabihan ko an Jerusalem, ‘Ika an sakong banwaan! Tinawan taka kan sakong katukdoan, asin kamot ko an nag-iingat sa saimo.’”

An Kataposan kan Pagtios nin Jerusalem

¹⁷ Pagmata, O Jerusalem! Pagmata asin pagbangon! Ininom mo an kalis nin padusa na ipinainom saimo nin Kagurangnan sa saiyang kaanggotan; inubos mo iyan, dangan ika nagsasayasay.

¹⁸ Mayo na nin mangengenot saimo, mayo sa saimong mga namamanwaan na makabit kan saimong kamot.

¹⁹ Duwang bagay an nag-abot saimo: naraot an saimong daga huli kan gera asin nagutom an saimong namamanwaan. Mayo nin saro man na madamay saimo.

²⁰ Sa lambang kanto kan tinampo an mga aki mo nagkakapurukan sa kaluyahan; garo sinda mga usa na nagkadarakop sa litag kan paraayam. Namatean ninda an kosog kan kaanggotan nin Dios.

²¹ Kamo na nagtitios sa Jerusalem, kamo na nagsasayasay na garo kamo mga burat,

²² sinusurog kamo nin Kagurangnan na saindong Dios asin nagsasabi, “Uya, hinahale ko na sa saindong kamot an kalis nin sakong kaanggotan. Dai na kamo kaipuhan na mag-inom kan arak na sa saindo nakakapasayasay.

²³ Itatao ko iyan sa mga tawong nag-api saindo, sa mga nagpahigda saindo sa tinampo asin nagtimaktimak saindo na garo ati kamo.”